17
1 Bze nag da' ẕnnia', X̱ana' Dios. Benle da' žḻiža' Le'.
Wẕí' da' ẕnnabla' Le' ḻo yeḻa' ḻi ḻaže' chia'.
2 Benn latje ḻa'a ḻawo' Le' nich wchi'a ḻažo'o neda',
dan' ẕḻe'elo' yógo'te ka zej nakkzen.
3 Le' ẕwíakzo' yichj ḻáẕda'wa', na' ẕḻe'elo' neda' žel.
Bwíakzo' da' žona', na' bi be da' ẕinnj bḻe'elo'.
Wdape chi'a loža'a nich bi be diža' ka'ze nnia'.
4 Žona' ka nak da' ẕnna x̱tižo'o,
na' bi žona' kan žongak benne' wen da' ẕinnj ka'.
5 Wdape chi'i neda' ḻo nez chawe' chio',
nich bi chejchaza' ḻo da' bi nak chawe'.
6 Žḻiža' Le', Dios, dan' ženlo' chi'a.
Bze nag chi'a, na' benle da' ẕnnia'.
7 Bḻoe'el neda' kan žeyache' ḻáže'ḻe'elo' benách ka'.
Beslá benne' ka' žx̱en ḻáže'gake' Le' ḻo na'gak benne' ka' bi ẕḻé'egekle' ḻégake' chawe'.
8 Bwia neda' ka žon no benne' ẕwíakze' yej ḻawe'.
Wdape chi'i neda' ka žon ẕkoko', bian' žape chi'iba' bríse'do' ka' ẕan x̱ilba'
9 nich bi be gongak chia' benne' wen da' ẕinnj ka',
benne' ka' bi ẕḻé'egekle' neda' chawe', na' žénegekle' gótgake' neda'.
10 Bi žeyache' ḻáže'gekle' ljéžgake' ka',
na' ḻo yeḻa' ẕka'n ẕen kwíngake' ẕcháḻjgake'.
11 Gáte'teze gan ẕda' ẕwíagake' neda'.
Žénegekle' wžía yí'gake' neda'.
12 Zej nake' ka to bež yíx̱e'do' žénelba' bi da' gawba'.
Zej nake' ka to bež yix̱e', bia ẕkache' kwinba' nich senba' biado' ka'.
13 Da, X̱ana' Dios, bdiḻ-ḻen benne' ka' bi zej nake' chawe', na' bžia yi' ḻégake'.
Beslá neda' ḻo na'gak benne' ka' bi zej nake' chawe', wkonlo' žin ya ntoche' chio'.
14 Beslá neda' ḻo na'gak benne' ka' ḻen no'o waḻe, X̱ana' Dios.
Beslá neda' ḻo na'gak benne' ka', benne' zej ze'e nich yekwásgake' yežlyó cheto' nga,
benne' ka' žáwgake' da' záka'ḻe'e chio' na' ẕwáwgaken' ẕí'ngake' ka',
na' ẕga'nkze da' gawgak ẕa'sógake' ka',
15 san neda', ḻe'ela' ḻawo' Le' dan' naka' chawe'.