139
1 X̱ana' Dios, ba bwíakzo' neda' na' binlo nónbi'o neda'.
2 Nnézkzelo' kate' ži'a, na' kate' ẕzo ža'a.
Zíto'le nnézkzelo' da' yo'o yichj ḻáẕda'wa'.
3 Ẕwíakzo' da' žona', na' da' žezá' ḻaža'a.
Nnézkzelo' yógo'te da' žona'.
4 Kate' bi na' wchaḻja',
ba nnézkzelo' Le', X̱ana' Dios, yógo'te da' nnia'.
5 Gáte'tezle kwita' neda' zoakzo' Le', X̱ana' Dios,
na' no'o žon chochen neda'.
6 Dan' ẕente nak da' nnezlo' Le' žonen ga žebanla'.
Nakḻe'en sina', na' bi gak chejni'ilan'.
7 ¿Gaẕ gak cha'a zi'to' gan bi zoakze Be' La'y chio'?
¿Gaẕ gak wẕonnja' gan bi zoakzo' Le'?
8 Cha' kwena' sibe ẕan ya'abá, zoakzo' Le' ga na'.
Cha' yetja' ḻo da' gže' che yežlyó, zo' Le' ga na'.
9 Chela' sáke'la' tia' ḻo be', na' cha'a zi'to' gan ẕḻa' wbíž,
o tia' yecheḻa'ale nisdo' gan žen wbíž,
10 ḻezka' sóaḻeno' neda' ga na',
na' no'o ḻi ža gon chochen neda'.
11 Chela' gak gona' ga wkache' da' choḻ neda',
o gona' ga yeyák choḻ baní' da' nyechjlen neda',
12 da' choḻ na' bi gak wkachen' neda' ḻawo' Le',
na' yel yeyaken ka te ža ḻawo' Le'.
Lébeze ka zej nak da' choḻ, na' yeḻa' baní' ḻawo' Le'.
13 Le' beno' da' ka' zej yo'on ḻo beḻa' žen chia'.
Le' bzo'o neda' ḻo ḻe'e x̱na'a.
14 Wká'n ẕenkza' Le' dan' ẕente nak da' žono', na' žebanla' ka naken.
Dot ḻaža'a nnézkzela' naken ki.
15 Bḻe'ekzlo' neda' kate' wyá'a žit yoa'a,
katen' wzóa' ḻo ḻe'e x̱na'a,
katen' bgola' ḻo da' bagáche'ze ga na'.
16 Bḻe'elo' beḻa' žen chia' kate' wyá'n.
Yógo'te da' ki bzojon' ḻe'e yiche chio', na' wdé na' wyá'n,
na' yógo'ten gókgaken kan zej nyejwn.
17 X̱ana' Dios, ẕente zej nak da' žezá' ḻažo'o gono'.
Da' zante zej naken.
18 Cha' gak ḻaža'a wlaba' ka zej naken,
zej nyanen ka yož dan' žen' žoa'a yegw ẕen.
Kate' žebana', na' zóaḻenkza' Le'.
19 X̱ana' Dios, da' likze goto' benne' wen da' ẕinnj ka'.
Che ḻen le kwas gan zoa', ḻe'e, benne' wet benách ka'.
20 Ẕnnégake' chio' Le', Dios.
Benne' ka' bi ẕḻé'egekle' Le' chawe' ẕzétjgake' dáche'ze La la'y chio'.
21 X̱ana' Dios, bi ẕḻe'ela' chawe' benne' ka' ẕzóagake' Le' cheḻa'ale,
na' ẕžá'aḻi'a benne' ka' ẕží'igake' chio' Le'.
22 Dot ḻaža'a bi ẕḻe'ela' chawe' benne' ka'.
Žekla' ẕži'igak benne' ka' chekza' neda'.
23 Bwíakze neda', X̱ana' Dios, na' bwia da' yo'on yichj ḻáẕda'wa'.
Bwia neda' nich nnezlo' da' ẕza' ḻaža'a.
24 Bwia cha' zoaḻen to da' ẕinnj neda'.