DIŽA' CHAWE' DA' BZOJ MATÍO

X̱a x̱na' gole wdé ka' che Jesús

(Lk. 3:23‑38)

1 Ẕzoja' ḻe'e yiche ni lagak x̱a x̱na' gole wdé ka' che Jesús, Benne' Criston', Bennen' nake' ẕa'só Dabí, na' ḻezka' ẕa'só Bran, benne' ka' wnnníta'gake' ža ni'te.

2 Bran na' goke' x̱a Isak.

Isak na' goke' x̱a Jakob.

Jakob na' goke' x̱agak Judá ḻen benne' biche'e ka'.

3 Judá na' goke' x̱agak Fares ḻen Sara. Tamar goke' x̱na'gak chope' ki.

Fares na' goke' x̱a Esrom.

Esrom na' goke' x̱a Aram.

4 Aram na' goke' x̱a Aminadab.

Aminadab na' goke' x̱a Nasón.

Nasón na' goke' x̱a Salmón.

5 Salmón na' goke' x̱a Bos, na' Rahab goke' x̱ne'e.

Bos na' goke' x̱a Obed, na' Rut goke' x̱ne'e.

Obed na' goke' x̱a Isaí.

6 Isaí na' goke' x̱a Dabí.

Dabín' wnná bi'e benách Israel ka', na' bchag ná'ḻene' no'len' zga'ale goke' ẕo'le Urías. Dabín' ḻen no'len' gókgake' x̱a x̱na' Salomón.

7 Salomón na' goke' x̱a Roboam.

Roboam na' goke' x̱a Abías.

Abías na' goke' x̱a Asa.

8 Asa na' goke' x̱a Josafat.

Josafat na' goke' x̱a Joram.

Joram na' goke' x̱a Usías.

9 Usías na' goke' x̱a Jotam.

Jotam na' goke' x̱a Akás.

Akás na' goke' x̱a Esekías.

10 Esekías na' goke' x̱a Manasés.

Manasés na' goke' x̱a Amón.

Amón na' goke' x̱a Josías.

11 Josías na' goke' x̱agak Jekonías ḻen benne' biche'e ka'.

Benne' ki wnníta'gake' ža na' katen' benne' Babilonia ka' bché'gake' benne' Israel ka' zej nžeje' gan nbab Babilonia na'.

12 Jekonías na' goke' x̱a Salatiel.

Salatiel na' goke' x̱a Sorobabel.

13 Sorobabel na' goke' x̱a Abiud.

Abiud na' goke' x̱a Eliakim.

Eliakim na' goke' x̱a Asor.

14 Asor na' goke' x̱a Sadok.

Sadok na' goke' x̱a Akim.

Akim na' goke' x̱a Eliud.

15 Eliud na' goke' x̱a Eleasar.

Eleasar na' goke' x̱a Matán.

Matán na' goke' x̱a Jakob.

16 Jakob na' goke' x̱a Jwsé.

Jwsén' goke' benne' byo che Lia. Lian' goke' x̱na' Jesús, Benne' Criston', Bennen' žx̱en ḻáže'gak benne' judío ka' ḻe'e nich nna bi'e ḻégake'.

17 Ki goken, gokgak x̱da' kwe' ẕi'n sógake' kate' wzó ḻaw wzóa Bran, na' zejte wzóa Dabí. Ḻezka' gokgak yex̱dá' kwe' ẕi'n sógake' kate' wzó ḻaw wzóa Dabín', na' zejte bche'gak benne' Babilonia ka' benne' Israel ka' zej nžeje'. Ḻezka' gokgak yex̱dá' kwe' ẕi'n sógake' kate' wzó ḻaw bché'gake' ḻégake', na' zejte ža bḻa' Benne' Criston'.

Da' goken katen' bḻa' Jesús, Benne' Cristo

(Lk. 2:1‑7)

18 Ki goken kate' bḻa' Jesús, Benne' Criston'. Katen' ba bchebe ḻaže' Lia, x̱na' Jesús, Benne' Criston', wchág ná'ḻenbe' Jwsé, na' kate' bi na' wchág ná'ḻene'-be', wyó'o to bi'do' ḻe'be'. Ki goken ni'a che yeḻa' wak che Dios Be' La'y. 19 Nak Jwsén', benne' byo che Lian', benne' chawe', san bi gónele' yesbage'e-be' ẕia ḻawgak benách ka'. Gónele' wsane'-be' ži žize. 20 Kate' ne ẕza' ḻaže' Jwsén' kan gone', bḻa' ḻaw to wbás che ya'abá ḻo bichgale gan de Jwsén', na' gože' ḻe':

—Jwsé, ẕa'só Dabí. Bi žebo' si'o Lian', nich gakbe' ẕo'lo', dan' bi' byodon' za' galjbe', yo'obe' ḻe'be' ni'a che yeḻa' wak che Dios Be' La'y. 21 Galj to bi' byodo' chebe', na' go'o labe' Jesús, dan' yeslabe' benách chebe' ka' ḻo doḻa' da' zej nbage'e.

22 Ki goken, bžin dan' wnná X̱anžo Dios ḻo na' benne' bchaḻje' ḻo wlaze' Ḻe', katen' wnné':

23 Le wia nga, to x̱kwide' no'le, wa'be' bi'do' ḻe'be', na' galj to bi' byodo',

na' wé'gake' labe' Emanuel.

Emanuel naken to diža' hebreo dan' ẕnnan: “Zoaḻen Dios žo'o.”

24 Kate' bebán Jwsé ḻo bichgalen', bene' kan gož wbás che ya'abán' ḻe', na' wẕi'e Lian', na' gokbe' ẕo'le'. 25 Bi wzóaḻene'-be' na' zejte golj bi' byodo' chebe', bi' nežw chebe', na' bzóagake' labe' Jesús.

MATÍO 2 ->