—¡Ga'n ẕeno' le', benne' ẕnna bi'e benne' judío ka'!

Naž wdápa'gake' žoa'a ḻawe'.

4 Naž Pilaton' bežoje' da' yoble, na' gože' benne' judío wnná bia' ka', na' wnné':

—Le wia nga, yebeja' bennen' ḻawle ḻe'e nich nnézlele bi bžeḻ-la' nitó da' ẕia da' nbage'e.

5 Naž bžoj Jesusen', na' žia yichje' da' naken ni'a na' yag yechen', na' nakwe' laže' tonn x̱na na'. Pilaton' gože' ḻégake':

—Nga zoa bennen'.

6 Kate' bx̱oz wnná bia' ka', na' benne' ni'a ná'gake' ka' bḻé'egekle' Jesusen', zižje wžéžeya'agake' da' yoble, na' wnnágake':

—¡Bde'e ḻe'e yag kroze! ¡Bde'e ḻe'e yag kroze!

Pilaton' gože' ḻégake':

—Ḻe'ekze le chi'e, na' le chejdé'e ḻe'e yag kroze. Neda' bi be da' ẕia bžeḻ-la' da' nbaga' benne' ni.

7 Naž benne' judío ka' belyi'e ḻe':

—De cheto' to da' wnnakze Dios da' žsedlen neto', da' ẕnnan žaḻa' gat benne' ni dan' wnné' nake' Ẕi'n Dios.

8 Kate' benle Pilaton' da' ni, bžébeže'. 9 Da' yoble beyoé'e ḻo yolawen', na' gože' Jesusen':

—¿Gaẕkze benne' Le'?

Bi be bechebe Jesusen'.

10 Naž Pilaton' gože' Ḻe':

—¿Bi žechebo', na' bi wḻoe'elo' neda' da' žono'? ¿Bi nnezlo' nzi' ḻo na'a wdá'a Le' ḻe'e yag kroze, na' nzi' ḻo na'a wsana' Le'?

11 Bechebe Jesusen', na' gože' ḻe':

—Bi be nzi' ḻo no'o gono' chia' chela' bi bde Dios ḻo no'o yeḻa' wnná bia' na'. Che ḻen, bennen' bdie' neda' ḻo no'o nbága'že' ẕia ka le'.

12 Ḻa' na'ze gónele Pilaton' wsane' Jesusen', san wžéžeya'agak benne' judío wnná bia' ka', na' wnnágake':

—Cha' wsano' benne' ni, bi nžago' chawe' benne' Sésar, bennen' ẕnna bi'e dot yežlyó nga. No benne' žon kwine' benne' wnná bia', ẕži'e che benne' Sésar na'.

13 Kate' benle Pilaton' da' ni, gože' ni'a ne'e ka' chejx̱í'gake' Jesusen', na' wži'e latje chie' gan ẕchi'a ḻaže'e, latjen' nzin' Ḻi'a Ga Ẕoagak Yej Blag Ka', na' ka nak diža' hebreo nzin' Gabata. 14 Ža na' naken ža za' žin Lni Pasko', na' nak wawbíž. Naž Pilaton' gože' benne' judío wnná bia' ka', na' wnné':

—Nga zoa bennen' ẕnna bi'e ḻe'e.

15 Wžéžeya'agake' zižje, na' wnnágake':

—¡Bete'! ¡Bete'! ¡Bde'e ḻe'e yag kroze!

Pilaton' gože' ḻégake':

—¿Ẕnnáblele neda' wdá'a bennen' ẕnna bi'e ḻe'e ḻe'e yag kroze?

Beži'igak bx̱oz wnná bia' ka', na' wnnágake':

—Bi zoa yetó benne' ẕnna bi'e neto'. Toze benne' Sésar ẕnna bi'e neto'.

16 Che ḻen Pilaton' bdie' Jesusen' ḻo ná'gake', nich chejdá'gake' Ḻe' ḻe'e yag kroze. Naž béx̱wgake' Jesusen', na' bché'gake' Ḻe' na'le.

—Bi wzojo': “Benne' ẕnna bi'e benne' judío ka'.” Bzoj ki: “Ḻe' wnné' nna bi'e benne' judío ka'.”

22 Beží'i Pilaton', na' gože' ḻégake':

—Da' ba bzoja', to chi'ize bzojan'.

23 Kate' benne' ka' žjake' ḻo wdiḻe, beyóž bdá'gake' Jesusen' ḻe'e yag krozen', na' béx̱wgake' laže' da' gokwe'. Wléjgaken' tápele, na' goken to kwe' weje da' gota' che chégake'. Ḻezka' béx̱wgake' lažen' da' bx̱oa yen Jesusen', na' lažen' bi ndian, san naken to wḻize. 24 Naž benne' ka' žjake' ḻo wdiḻe, belyi'e ljéžgake' toe' yetóe', na' wnnágake':

—Bi chogžon, san gakže chawe' kwejžo da' gak bian', nich nnezlžo nolžo gaken chežo.

Ka' goken, bžin dan' nyejw ḻe'e yiche la'y, da' ẕnnan:

—Nó'ledo', bwia ẕi'no' zoe' kwito' le'.

27 Naž gože' benne' wsedle chie' na':

—Bwia, x̱no'o zoe' kwito' le'.

Ḻa' ža na'ze benne' wsedlen' bchi'e ḻe' nich chejsóe' liže'.

28 Wdé na', dan' nnézkzele Jesusen' yógo'te ba goken, na' nich žin da' nyejw ḻe'e yiche la'y, wnné':

—Ẕbiḻa' nis.

29 De to že'e ga na', da' yožen nop zichj. Naž to benne' žeje' ḻo wdiḻe besbise' to da' bḻol ḻen nop zichjen', na' bzoen' ḻaw to ya x̱til, na' bde'en žoa'a Jesusen' nich x̱open'. 30 Beyóž we'j Jesusen' nop zichjen', na' wnné':

—Ba nakten.

Naž bzechwe' yichje'. Bežojte be' nakkze', na' gote'.

31 Naž, dan' nak ža za' žin Lni Pasko', na' dan' bi žaḻa' ga'ngak benne' gat ka' ḻe'e yag kroze ka' kate' nak ža la'y chégake', na' naken to ža la'y ẕente, che ḻen benne' judío ka' góta'yoegekle' Pilaton' yi'e benne' ka' žjake' ḻo wdiḻe, chejtíchjwgake' x̱kachjgak benne' ka' dá'gake' ḻe'e yag kroze ka', na' wetíngake' ḻégake' ḻe'e yag kroze ka'. 32 Che ḻen benne' ka' žjake' ḻo wdiḻe wbíga'gake' ga na', na' bdíchjwgake' x̱kachje benne' nežw, na' ḻezka' béngake' che yetó bennen' dá'ḻene' Jesusen' ḻe'e yag kroze. 33 Kate' bžíngake' gan da' Jesusen', bḻé'egekle' ba gote', na' bi bdíchjwgake' x̱kachje'.

34 Naž to benne' žeje' ḻo wdiḻe godwe' yag ntoche' chie' ḻe'el sina' Jesusen', na' ḻa' bžojte žen, na' nis. 35 Neda', Ẕwa, bḻe'ela' da' ni, na' ẕzoa lian', na' da' ẕnnia' naken dot da' li. Nnézkzela' ẕchaḻja' da' naken dot da' li, nich ḻezka' ḻe'e chejḻe'le che Jesusen'. 36 Ki goken, bžin da' nyejw ḻe'e yiche la'y, da' ẕnnan: “Bi gachjw nitó žit yoe'e.” 37 Yetó da' nyejw ḻe'e yiche ẕnnan ki: “Wíagake' bennen' godwe' Ḻe' yag ntoche'.”