El Apocalipsis 5

Libre nii nguiitsy kadzy sey

1 Ñali xaa nii sob leñ yulyey no tu libre. Xitsy low kë, ni konaa nii nguiitsyo kadzy sey. 2 Ni konaa tu angly nii xkëë tsyetsy xñee:

—¿Cho lë nii kxaly libre re ni cho lë nii kchos sey nii nguitsyo?

Xaa xñabey nak angly ko.

3 Per ni kpaa, ni lo kislyu, ni leñ kislyu ptsyoldy xaa nii nxaly libre ko, per ni tu xaa nii nyuy syew ptsyoldy. 4 Aan per nii nli busy biñaa, porñee ptsyoldy cho nxaly libre ko, per ni tu xaa nii nyuyo ptsyoldy. 5 Tsigo lëë tu xaa kol në lon:

—Kooñtroo, por lëë xaa nii xñee meñ xmëëdzy meñ Judá beeñ gan lo kyalkuty. Lo xtiiy rey David sëëd xaa aan lëë xaa chigal kxaly libre re ni kchos xaa ksa kadzy sey nii nguitsyo.

6 Lëën buy chu yulyey ni laañee nche ksa tap ma nii tyub lady sob mëlo ni laañee nche xaa kol aan lëën kon nii lëë tu mëkwxiily soli, nikxe nii nyoo nii beety meñ ma. Kadzy xkach ma ni kadzy mëlo ma sob. Lëë xkach ma ni lëë mëlo ma nak ksa kadzy xkyalbini Dios nii pkaasy tyub lo kislyu. 7 Lëë mëkwxiily go kwnaasy libre nii no ñali xaa nii sob leñ yulyey. 8 Tsiñee lox kwseñ ma libre ko, lëë ksa tap ma nii tyub lady sob mëlo ni lëë ksa kalyptap xaa kol psoxib lo ma. Kchë xaa noy arp ni psiñ kox yaal nii nyaa con or. Lëë kox yaal go nak xlay meñ nii ngab lo Dios. 9 Kchësy xaa kol go chool tu ti kub nii së sinrii:

Lii xyal señ libre ni liisy xyal kchos sey nii nguitsyoo,

por beety meñoo,

ni lii kwxii meñ tyub lo kislyu con cheñ nii pxeel

parñee jkab meñ lo Dios.

10 Lii pso meñ go parñee kak meñ go pxosy lo Tat Tios

ni lii psaan nii kñabey meñ go lo kislyu.

11 Loxsye ngo lëën biñ tsiy tub yox angly nii nche kyako yulyey, ni kyako ma nii sob mëlo tyub lady ni kyako kchë xaa kol. Pchilody ngab angly ko porñee tir ndaly xaa, 12 aan nguieex xñee kchë angly ko:

Lëë mëkwxiily nii beety meñ

xyal jkaaxcuent kyalwnabey ni kchësy cos non.

Lëë ma xyal jkaaxcuent kchë kyalchak ni kyalndaan,

lëë ma xyal jkaa skizh ni kyalnsaak.

13 Ni biñaa nii wi kchësy cos nii psaa Dios leñ kpaa ni kchësy cos nii psaa xaa lo kislyu, ni kchësy cos nii no leñ kislyu, ni kchësy cos nii no lo nistoo xñee:

Lo xaa nii sob leñ yulyey ni lo mëkwxiily tugak kol tsoo ktee no skizh ni kyalnsaak, iip kyaldy jkaa xaa kyalwnabey ni kyalndaan.

14 Aan lëë ksa tap ma nii sob mëlo tyub lady xkyëb xñee:

—¡Nliw, singo kako!

Lëë ksa kalyptap kaa xaa kol psoxib lo xaa nii iip kyaldy xkyalwnabey.

<- El Apocalipsis 4 El Apocalipsis 6 ->