1 ¿Cho kwan gab naꞌ? ¿Cho ndablo tadka lin' jwan' narax sa xyen yalwen chanꞌ Dios? 2 ¡Ngen naꞌnakte! Tak re naꞌ jwanꞌ ngujla lo yalke ¿Xomod yoban naꞌ lo yalke tedib gob? 3 ¿Cho naꞌnyed goꞌ, reta naꞌ jwanꞌ ta mbroꞌle lo le Jesucrist, lo senꞌ mbroꞌlenꞌ zya nguj naꞌ jwan' xa nguj Xaꞌ? 4 Tak senꞌ mbro'lenꞌ zya thita mbwaꞌs naꞌ kon Crist nde nguj naꞌ sa ryoꞌxban naꞌ nde kenonꞌ yalnaban kub, ta xaja mbroꞌxban Crist kon yalnaro nde yalne chanꞌ Xud naꞌ Dios.[a]

5 Tak tez thita nak naꞌ kon Crist, nguj naꞌ xa nguj Xaꞌ, tagaꞌ ryoꞌxban naꞌ xa mbroxban Xaꞌ. 6 Mnenꞌ leꞌ reta jwan' narax nak na' pola thita mkey lo kruz kon Crist, sa lux reta jwanꞌ narax ta nak na' nde thiptane na'litra' naꞌ sin' lo jwanꞌ narax. 7 Tak men jwanꞌ ngujla kon Crist, nanyebetra' jwan' narax lo men. 8 Nde tez nguj naꞌ kon Crist, ndlipa lazon' thita ban naꞌ kon Xaꞌ, 9 tak mnenꞌ, lo mbroꞌxban Crist xij re men nguj, naꞌngajtraꞌ Xaꞌ, tak yalguj naꞌnyabeꞌtraꞌ lo Xaꞌ. 10 Tak lo nguj Crist, thipta gob nguj Xaꞌ por xken reta men nde naya lo naban Xaꞌ, naban Xaꞌ par Dios. 11 Nde tagaꞌ goꞌ, ptob xgab goꞌ ngujla goꞌ par lo reta jwanꞌ narax nde naban goꞌ par Dios la ta thita nak go' kon Jesucrist, Xaꞌ Nyebeꞌ lonꞌ.

12 Jwanꞌ nasa, naꞌtad goꞌ diꞌs nyebeꞌ re jwanꞌ narax lo belꞌ goꞌ jwanꞌ ta ndluxa, nekla xobyek go' re jwan' narax ndryo' lazo' bel' go'. 13 Nekla tayaꞌ goꞌ belꞌ goꞌ lo jwanꞌ narax sa liy sinꞌ lo re jwanꞌ xkap. Cheꞌla ptayaꞌ lazoꞌ goꞌ lo Dios xajka thi men jwanꞌ ngujla nde bere mbroꞌxban. Ptayaꞌ lazoꞌ goꞌ lo Dios sa li goꞌ sinꞌ lo jwanꞌ wen. 14 Tak re jwanꞌ narax naꞌnyebeꞌtra'y lo goꞌ, tak naꞌnzotra' goꞌ lo ley, che'la leꞌ goꞌ nzo lo yalwen chanꞌ Dios.

15 ¿Cho kwan linꞌ sa? ¿Cho tatka linꞌ jwan' narax ta naꞌnzot naꞌ lo ley, che'la nzon' lo yalwen chanꞌ Dios? ¡Naꞌnaktey tamod! 16 ¿Cho naꞌmned goꞌ, tez lya goꞌ lo yaꞌ ti men sa ke goꞌ sinꞌ lo xaꞌ nde xobyek goꞌ xaꞌ, zyasa nak go' mos lo xa' ta nxo'byek go' ya? tagaꞌ jwanꞌ reꞌ, tez xo'byek go' jwan' narax xaja xa' nyebe' lo go', jwan' na ndeno yalguj o xobyek goꞌ Dios sa yan' go' men gal' lo Dios. 17 Per dyuxkix Dios, tak tenyega ngok goꞌ men mbli sinꞌ lo jwanꞌ narax nde naya dib nzo lazoꞌ goꞌ nxobyek goꞌ jwanꞌ mbloꞌ náꞌ lo goꞌ. 18 Nde thiptane mblyaꞌ goꞌ lo yalke sa naya nak goꞌ men ndli sinꞌ lo jwanꞌ galꞌ. 19 (Nambi goꞌxkan na jwanꞌ reꞌ lo goꞌ, tak tata nala xgab go' yen go'y.) Ta xa nera ben'ta re jwanꞌ bew, yalxinlaꞌs mbix go', nde naya taxa ndablo bix goꞌ par ban go' mod gal' nde thiptane yan goꞌ men nayon lo Dios.

20 Tak zya sen' ngok go' men ndli sinꞌ lo jwanꞌ narax, nandeched go' ban go' xa ndryo' lazo' Dios. 21 Per ¿Cho kwan mbli goꞌ gan lo re jwanꞌ narax ta mbli goꞌ sa? Nde naya ndyolaꞌs goꞌ. Tak jwanꞌna benꞌta yalguj ndenoy. 22 Tak naya ta mblyaꞌa goꞌ lo re yalke nde nak goꞌ men ndli sinꞌ lo Dios, jwanꞌna ngoxoꞌba goꞌ nak goꞌ men nayon lo Dios nde keno goꞌ yalnaban adiꞌ. 23 Tak jwanꞌ ndli men gan lo yalke nak yalguj nde leꞌ jwanꞌ ndalaꞌs Dios nak yalnaban adiꞌ kon Jesucrist, Xaꞌ Nyebeꞌ lonꞌ.

<- ROMANOS 5ROMANOS 7 ->