ROMANOS 4

Jwanꞌ ndloꞌ Abraham

1 ¿Cho kwan gab naꞌ? ¿Cho kwan mbli Abraham gan lo yalnaban chanꞌ xaꞌ, xaꞌ gox lonꞌ ngo pola? 2 Tak tez mbyanꞌ Abraham xaꞌ galꞌ por re jwanꞌ mbli xaꞌ, ngeno Abraham kwan xyalꞌno xaꞌ, per na'akta xya'lno xa'y lo Dios. 3 Tak ¿Cho kwan nchab lo xkiꞌs Dios? “Abraham mblipa lazoꞌ xaꞌ Dios jwanꞌ nasa mblilal Dios xaꞌ ti xaꞌ galꞌ.”[a] 4 Mbay, ti men jwanꞌ mke sinꞌ, tmi jwanꞌ nchax ka xaꞌ, nakte jwanꞌ ngetela's men lo xaꞌ, che'la mbli xaꞌ gana. 5 Mbay, tez nzo xa' ndli lazon' Dios, Xa' jwan' ngo'to nambi men nzob xken', Dios ndyen kwent jwan' na xaga thi men gal' nak. 6 Noga David mdej xaꞌ yalwen toz jwanꞌ ndaꞌ Dios senꞌ ndlilal Dios men ti men galꞌ, te'nyega ngenkwan ndli men sa nzal' mena, 7 nchab xa':

Nabeꞌz toz nda re men jwanꞌ mtonꞌ Dios re xken naꞌ, nde mtorid yek Dios re jwanꞌ narax mbli xaꞌ.

8 Nabeꞌz toz nda re men jwanꞌ mto'n Dios reta xken naꞌ.[b]

9 ¿Mbay yalnabez re' cho benꞌta re xaꞌ nge be' lad na'[c] kayaꞌy o no re xaꞌ naꞌngenta be' lad na'y? [d] Tak nchab naꞌ, Abraham mbli lazo' xa' Dios jwanꞌ nasa mblilal Dios xaꞌ ti xaꞌ galꞌ. 10 Mbay ¿Pol mbli Dios sa mbyanꞌ Abraham xaꞌ galꞌ? ¿Cho senꞌ mdobla be' lad xa'y o lo senꞌ tera tyob be' lad xaꞌy? Leꞌy ngok lo senꞌ tera tyob be' xaꞌ. 11 Nde xisla zyaraꞌ mdob be' lad Abraham ten' nak lad men biba,[e] sa jwanꞌna nak ti beꞌ ndloꞌ mkayaꞌ Dios Abraham xaja ti xaꞌ galꞌ lo mblipa lazoꞌ Abraham Dios. Jwanꞌ nasa Abraham ngok xud re xaꞌ jwanꞌ benꞌta ndlipa lazoꞌ xaꞌ Dios tenye nandobta be' lad xa' nde Dios nkayaꞌ re men ya xaja men galꞌ. 12 Nde noga nak Abraham xud re xaꞌ jwan mdobla be' lad naꞌ tenꞌ nak lad men biꞌba nde re xaꞌ ya noga mbli lazoꞌ xaꞌ Dios ta xa mbli lazoꞌ xud naꞌ Abraham Dios lo tera' tyob be' lad Abraham.

Dios taꞌ jwanꞌ mkeꞌyek Dios lo ndlipa lazoꞌ men Xaꞌ

13 Le' Dios, mke' yek Xaꞌ lo Abraham nde lo re men jwanꞌ nde lo bin Abraham sa tayaꞌ Dios dib nax izyo[f] kaya' xa', nde naꞌnakte tak mxoꞌbyek Abraham ley, cheꞌla lo mblipa lazoꞌ Abraham Dios sa mkayaꞌ Dios Abraham xaga men galꞌ. 14 Tak tez benꞌta re men jwanꞌ nxoꞌbyek ley men yata kayaꞌ jwanꞌ taꞌ Dios, zyasa leꞌ jwanꞌ ndlipa lazoꞌ men Dios ngen cho sinꞌ liy nde mbroꞌtal jwanꞌ mkeꞌyek Dios.[g] 15 Tak ley ndenoy yalnayiꞌ, nde tenꞌ naꞌngenta ley tagaꞌ ngenta yalke.

16 Jwanꞌ nasa, leꞌ jwanꞌ mkeꞌyek Dios mdaꞌ Dios lo Abraham, tatka ntaka lo reta men jwanꞌ nde lo bin Abraham, ngoka ti jwanꞌ mdalaꞌs Dios lo xaꞌ lo ndlipa lazoꞌ xaꞌ Dios. Nde naꞌnakte benꞌta lo re men nxobyek ley, noga naka lo reta men jwanꞌ ndli lazonꞌ Dios, ta xa Abraham mbli lazo' xa' Dios, jwanꞌ nasa Abraham nak xud reta naꞌ,[h] 17 (jwanꞌ xa nchabka lo Xkiꞌs Dios: “Mblilal na lu xud reta men[i].” Dios jwanꞌ mblipa lazoꞌ Abraham Xa' jwan' ndaꞌ yalnaban lo reta men nguj, nde ndli Xa' ncho re jwanꞌ naꞌngenta, xajka jwan' nzola ba.

18 Nde mbli lazo' Abraham, tenye naꞌnyada ak jwanꞌ nchab Dios, yalal xa' xud brotoz tir men, ta xa nchab Dios lo xa': “Bro toz tir men ya'r lo bin la. 19 Abraham, naꞌndlayoda lazoꞌ xaꞌ lo jwanꞌ ndli lazoꞌ xaꞌ tenye mer nzola xaꞌ tib ayoꞌ linꞌ,[j] Abraham kon Sar ndenꞌla xaꞌ gaj xaꞌ nde tenye ngox toz la xaꞌ nde Sar xa' nij xa' par keno xaꞌ xinꞌ xaꞌ. 20 Per naꞌndlayoda xgab Abraham nekla ngak rop xgab xaꞌ lo jwanꞌ mkeꞌyek Dios lo xaꞌ, cheꞌla ngone lazoꞌ xaꞌ lo jwanꞌ ndlipa lazoꞌ xaꞌ. Nde mbli naro xaꞌ le Dios, 21 thiptane mtob xaꞌ xgab xaꞌ leꞌ Dios ngeno yalne sa li Dios re jwanꞌ mkeꞌyek Dios lo xaꞌ. 22 Jwanꞌ nasa mblilal Dios xaꞌ xa' galꞌ lo mbli lazoꞌ xa' Dios.

23 Nde senꞌ nchab xkiꞌs Dios, mblilal Dios Abraham xaꞌ galꞌ, naꞌnakte benꞌta Abraham, 24 noga naꞌ ngeteja. jwan' re' nak lo re na' jwan' ta ndli lazo'n Xa', Xa' mblo'xban Jesus xij re men nguj, 25 Xaꞌ jwanꞌ mdayaꞌ yalnaban chanꞌ Xaꞌ sa nguj Xaꞌ por xken reta naꞌ nde mbroꞌxban Xaꞌ sa mbyanꞌ naꞌ men galꞌ lo Dios.

<- ROMANOS 3 ROMANOS 5 ->