1 Lo senꞌ mxalꞌ Mbakxilꞌ yenꞌ sey gaz, zyasa tsij mdo lo beꞌ thi med horka. 2 Nde mbwiꞌn re gaz anj ta ndoli lo Dios, re lo anj ya mdayaꞌ xaꞌ thiba trompet. 3 Xisa mbyed tedib ánj nden thi yiꞌb or ten' nchol xtarak, nde mdoli anj ten' ndob altar. Lo anj ya mdayaꞌ xaꞌ bro toz xtarak sa ko anja lo altar ten' ndob yasila sa thita yap besa kon re xkiꞌs reta men nayon ngete lo Dios. 4 Nde lo yaꞌ anj mbroꞌ sen chanꞌ xtarak ngwapa tenꞌ ndob Dios, kon re xki's reta men nayon ngete lo Dios. 5 Nde mxen anj yi'b or jwanꞌ nchol xtarak nde mtoseꞌ anja kon kwiy' jwanꞌ nzo lo altar nde mblobi anja xis izyo, zyaza mdez mdiꞌ, mkebi nde mbla beltiꞌ nde mbwin thi xo toz.

6 Zyasa re gaz anj jwanꞌ nden thiba trompet mdosaꞌ sa kwez xaꞌ trompet xa'.

7 Lo senꞌ mkwez anj ner trompet anj, zyasa mbla yi ke nde bel noza kon ren xis izyo. Nde mtolꞌ la ti part lo son part re ya nde mtol' la reta yix ye.

8 Lo sen' mkwez anj brop trompet xaꞌ, zyasa lenꞌ nittoꞌ ngob thi jwanꞌ nya xaja nya thi yiꞌ ro jwanꞌ ndoyola nde lo tson xta' nitto', thib xtaꞌy ngolal ren. 9 Nde yapaꞌ reta jwanꞌ naban nzo lenꞌ nittoꞌ nguj, nde taga yapa' reta bark jwanꞌ nzoꞌb lo nittoꞌ mbil.

10 Lo sen' mkwez anj byon trompet xaꞌ, thi mbel toz jwanꞌ ndob lo beꞌ ngob, mbel ya ndob bel xaja thi ki yeꞌra. Nde ngoba lo thi part lo tson part reta yoꞌ nde re tenꞌ ndobziꞌb nit. 11 Leꞌ mbel ro ya ndole Nala thoz, nde lo tson xtaꞌ nit, thib xta'y mblya, nde men toz nguj lo nguꞌ xaꞌ nit ya tak mbya thoza.

12 Lo senꞌ mkwez anj thap trompet xaꞌ, mbwiy' thib le lo tson le wiz, thib le lo tson le mbeꞌ nde thib tant lo son tant mbel jwanꞌ nziꞌb lo beꞌ. Sa ak nakowa naꞌtoxnidey thib xtaꞌ lo tson xtaꞌ ndlyabe nde tagaꞌ yalꞌ.

13 Xisa mbwiꞌn nde mbina ndo xobi thi anj rol beꞌ nde ne mbrez anj:

—Nalat thoz tir tyak re men lo izyo, lo tyez trompet jwan' kwez thi tson anj.

<- APOCALIPSIS 7APOCALIPSIS 9 ->