APOCALIPSIS 22

1 Xisa mbloꞌ anj lon thi yoꞌ nambi tir jwanꞌ nzo nit ndaꞌ yalnaban. Yoꞌ ya nambi tira xaja nya bidra nde ndryoꞌy tenꞌ ndyob Dios nyebeꞌ Dios kon Mbakxilꞌ yenꞌ. 2 Rolja ned ro ta nzo lenꞌ yez ya ndrid yo' ya nde rop lad ro yoꞌ ndob ya jwanꞌ ndaꞌ yalnaban, ya ya ndaꞌy ngud thibsen gob lenꞌ lin. Kad mbeꞌ ndaꞌy ngud, nde laneꞌy li sinꞌna par yalnadanꞌ chanꞌ reta ned men dib lo izyo. 3 Na'yotra' de tya, lenꞌ yez ya tyob yasil tenꞌ nyebeꞌ Dios nde yasil tenꞌ nyebeꞌ Mbakxilꞌ yenꞌ nde reta men ndli sinꞌ lo Dios, tyoxub lo Dios nde lo Mbakxilꞌ yenꞌ. 4 Zyasa re xa' ya wiꞌpa xa' Dios nde cholo xa' ke le Dios. 5 Nde tya naꞌyotra yalꞌ nde nanakinꞌtraꞌ re xaꞌ xni kandil nekla xni wiz, tak Dios Xaꞌ nyebeꞌ toxni lo xaꞌ nde nyebeꞌ re xaꞌ dib adiꞌ.

Ndoyenla beꞌ yeꞌd Jesucrist

6 Nde ne anj lon:

—Reta diꞌs reꞌ, galꞌ naka nde lipay. Nde Xud na' Dios, jwanꞌ mblo lazoꞌ reta profet sa mni xaꞌ, Dios ya mtelꞌ Xa' anj Xaꞌ sa lo' anja lo reta xa' ndli sinꞌ lo Dios re jwanꞌ ndoyen ak.

7 — ¡Wi' goꞌ, ndoyen tirla yal na! ¡Nabeꞌz toz nda re men jwan' nxoꞌbyek reta jwanꞌ nara' ak ta nge lo yes reꞌ!

8 Na Juan, mbina nde mbwiꞌn reta jwanꞌ reꞌ. Ngolo mbina nde mbwiꞌn re jwanꞌ na, mdoxub na lo anj jwanꞌ ta mbloꞌy lon sa li naron le anj.

9 Per anj ne lon:

—Naꞌtyoxubta la lon, ben'ta lo Dios ptoxub, tak noga' na nak moz lo Dios ta xa nak lu kon reta wes la jwanꞌ nak profet nde reta men jwanꞌ nxoꞌbyek reta jwanꞌ nchab lo yeꞌs reꞌ.

10 Nde negaꞌ anj lon:

—Naꞌkasta la Xkiꞌs Dios ta nge lo yeꞌs reꞌ, tak ndoyenla beꞌ aka. 11 Blaꞌ diꞌs sa re men xkap benꞌ li xaꞌ jwanꞌ xkap, nde re xaꞌ bew benꞌ li xaꞌ re jwanꞌ bew, nde re men wen benꞌ li men jwanꞌ wen nde re xaꞌ nayon ndo lo Dios, benꞌ tyo nayon xaꞌ lo Dios.

12 Jesus nchab:

—¡Wiꞌ goꞌ, ndoyenla yal na! Nde ndalnon jwanꞌ nzal' kad thiba xa', a benꞌ xa jwanꞌ mbli xaꞌ. 13 Na nak xan' nde na nak lulka lo re jwan', ta xa nak letr A nde letr Z.

14 Nabeꞌz toz nda re men jwanꞌ ntombi lazon' xaja men ntach xab naꞌ, xa' ya toyal yote xaꞌ ro yala lenꞌ yez nde toyal wa xaꞌ ngud ndo lo ya jwanꞌ ndaꞌ yalnaban. 15 Per reta men xkap jwanꞌ nak xaja nak mbaka, re xaꞌ ndli yalmxí, re xaꞌ jwanꞌ nchaxno xaꞌxaꞌ men, re xaꞌ guj men, re xaꞌ ndyoxub lo re mnab nde reta xaꞌ ndyen ndli yalkwinꞌ, reta xaꞌ ya yanꞌ le.

16 Na, Jesús mtelꞌ na anj na sa tej xaꞌ re jwanꞌ reꞌ lo re men lo re yodonꞌ na. Na na nak xan' ten' nde rey David, nde na ndal lo bin rey David. Na nak xaja mbel ro jwanꞌ nche'dke re tilꞌ nakalra' ba.

17 Leꞌ Mbi Nayon kon salꞌ Mbakxilꞌ yenꞌ ne:

—Deꞌ.

Nde cho xaꞌ nchon ta mbez xaꞌ ya, noga' xa' gab:

—Deꞌ.

Tez cho nchek lazonꞌ, yeꞌd xaꞌ nde tez cho ndyen gu nit, tata a gu xaꞌ nit jwanꞌ ndaꞌ yalnaban.

18 Na ni lo reta go' ta nchon xkiꞌs Dios jwanꞌ nara' ak nge lo yeꞌs reꞌ: Tez cho ti xaꞌ ko yek re jwanꞌ re', Dios telꞌ reta yalti ta nge lo yeꞌs reꞌ xis xaꞌ. 19 Nde tez cho ti xaꞌ kib diꞌs lo xkiꞌs Dios ta nara' aka ta nge lo yeꞌs reꞌ, Dios kib jwanꞌ nak chanꞌ xaꞌ lo libr chanꞌ yalnaban nde naꞌtaꞌd Dios diꞌs yote xaꞌ lenꞌ yez nayon, ta xa nchab lo yeꞌs reꞌ.

20 Xaꞌ jwanꞌ ndej re jwanꞌ reꞌ ne:

—Liy, na mbyenla yal na.

¡Aa', ta naka. ¡Deꞌ Jesús Xaꞌ Nyebeꞌ!

21 Yalwen chanꞌ Jesucrist Xaꞌ nyebeꞌ lonꞌ tyono reta goꞌ. Ta naka.

<- APOCALIPSIS 21