1 Nde dragon ya ngwa mdoli ro nitto', zyasa mbwiꞌn mbroꞌ thi maꞌ nathoz nya lenꞌ nittoꞌ, maꞌ ya ndob gaz yek maꞌ nde ndob siꞌ wad yek maꞌ. Kad wad ndob thi koron yek naꞌ nde kad yek maꞌ nge le ma', jwanꞌ nixin xis Dios. 2 Leꞌ maꞌ jwanꞌ ta nathoz nya mbwiꞌn ya, nya xa nya mbe's pint, ni maꞌ nya xa nya ni os nde ro maꞌ nya xa nya ro mbe's. Nde dragón mdaꞌ yalne chanꞌ dragón lo maꞌ, mdaꞌ dragón tenꞌ ndyob nyebeꞌ dragón lo maꞌ nde mdaꞌ dragón bro toz yalnyebeꞌ lo maꞌ. 3 Nde thi yek maꞌ nawiyꞌ tlawen nya maꞌ, per tenꞌ nawiꞌ ya mbyaka nde reta men lo izyo nzoyen xaꞌ nde mdoke xaꞌ xis maꞌ. 4 Mdoxub xaꞌ lo dragón tak mdaꞌ dragon yalnyebeꞌ chanꞌ dragón lo maꞌ nathoz nya nde tagaꞌ mdoxub xaꞌ lo maꞌ nde nchab xaꞌ:

— ¿Cho nak xaja nak maꞌ nathoza, nde cho li gan lo maꞌ?

5 Noga' mdaꞌ xa' diꞌs ni ma' di's bxal' nde di's xin xis Dios, nde keno maꞌ yalnyebeꞌ lenꞌ choꞌ pchop mbeꞌ. 6 Nde mdobte ni maꞌ, di's xin xis Dios nde xis le Dios, xis yodonꞌ Dios nde xis reta xaꞌ nzo lo beꞌ. 7 Nde taga' mda' xa' di's yo maꞌ kon reta men nayon ngete lo Dios nde li maꞌ gan lo xaꞌ nde mkayaꞌ maꞌ yalnyebeꞌ sa nyebeꞌ maꞌ lo re ned bin men, lo xa'xa' reta ned men, lo re ned men ni xa'xa' diꞌs nde lo re ned yez, 8 nde re men jwanꞌ axta senꞌ mdoxkwaꞌ izyo naꞌngenta le xaꞌ lo libr nzo yalnaban chan' Mbakxilꞌ yenꞌ ta nguj por reta men, reta xa' ya mdoxub lo maꞌ nathoz nya ya.

9 Men jwan' ndob nzan' bin goꞌ jwan' re'. 10 Xaꞌ jwan' nak be'la ya lizyi'b, lizyi'b ka ya xa', xaꞌ nak be'la gaj kon espad kon espad ka gaj xa'. Tamod sa lo' ke re men nayon ngete lo Dios nakin' xek xa' nde tibla' li lazo' xa' Dios.

11 Xisa mbwiꞌn tedib maꞌ nathoz nya, mbroꞌ izyo. Maꞌ ya ndob chop wad yek naꞌ, xa nya wad mbakxilꞌ yenꞌna nde nì maꞌ xa nì dragon. 12 Nde ngeno maꞌ dib yalnyebeꞌ ta ngeno maꞌ nera, ma' tlawen nde mbyaka, nde maꞌ re' ndli sa reta men jwanꞌ nzo xis izyo ndyoxub xaꞌ lo maꞌ nera. 13 Noga ndli maꞌ naꞌr toz re jwanꞌ nzoyen men, axta ndli maꞌ ndryoꞌ bel lo beꞌ nchab xis izyo nzi wiꞌ re men. 14 Kon re yalnaro jwanꞌ ta ndli maꞌ lo maꞌ nera, mkwinꞌno maꞌ reta men xis izyo nde mnabeꞌ maꞌ sa mdoxkwaꞌ xaꞌ thi mnab chanꞌ maꞌ ner jwanꞌ ta mbwiꞌ yek naꞌ kon espad nde mbana. 15 Nde maꞌ mbropa ngeno ma' yalnyebeꞌ, sa mbli maꞌ ngo yalnaban mnab chanꞌ maꞌ nera, nde mbli maꞌ ndodiꞌs mnab nde mnabeꞌ mnab gaj reta men jwanꞌ naꞌtyoxubta lo mnab. 16 Nde noga mbli maꞌ sa reta men tyob thi beꞌ yaꞌ ban xaꞌ o cholo xaꞌ, re men ro nde men bix, men rik nde men prob, xa' nak moz nde xa' na'nakta moz. 17 Nde nek thib men naꞌakta tiꞌ nde neka tho, tez na'genta be' lad xaꞌ, o tez ngenta le maꞌ o numbr chanꞌ maꞌ yaꞌ xaꞌ o cholo xaꞌ. 18 Jwanꞌ reꞌ nakinꞌ yalnchak, xa' nchen, lab xa' numbr maꞌ, tak numbr chan' mena. Numbr ya nak xop ayoꞌ nzo son gal nzo xop.

<- APOCALIPSIS 12APOCALIPSIS 14 ->