1 Jwanꞌ nasa, re goꞌ wes na, ptan na, ta nkeꞌ lazoꞌn, re goꞌ taja ncholas na wiꞌn, goꞌ ta ngo nale lazoꞌn nde goꞌ nak jwanꞌ lin gan lo rsin na, tatka thiblaꞌ gal' pto goꞌ lo Xaꞌ Nyebeꞌ, nke' lazo'n go'.

2 Nyaꞌb na lo Evodia nde lo Síntique sa thita ak xgab rop xaꞌ lo ta ndli lazoꞌ xaꞌ Xaꞌ Nyebeꞌ. 3 Le' lu, ta thiblaꞌ ndoa kon na lo rsinꞌ Dios, noga nyaꞌb na loa laꞌstoa rop ptan' na' re', tak thita mketetej náꞌ diꞌs wen chanꞌ Jesucrist, noga kon Ment nde masraꞌ re xaꞌ ta mke sinꞌ kon na. Re le xaꞌ re' nzolay lo libr chanꞌ yalnaban.

4 Thiblaꞌ blo nale lazoꞌ goꞌ lo ta ndli lazoꞌ goꞌ Xaꞌ Nyebeꞌ. Bere nin lo go': ¡Blo nale lazoꞌ goꞌ! 5 Ndablo nye reta men ke nabeꞌz nak goꞌ. Leꞌ Xaꞌ Nyebeꞌ ndogaxla yeꞌd.

6 Naꞌngen cho kwan li goꞌ xgab, cheꞌla reta gob sen' ndyodiꞌsno goꞌ Dios, ptej go' lo Xa' re jwanꞌ ndyak goꞌ, mnaꞌb goꞌ lo Xa' re jwan' nakin' go' nde ptaꞌ goꞌ dyux lo Xaꞌ . 7 Nde yalnabe'z chanꞌ Dios, jwanꞌ naro toz ta naꞌlid men gan yen men, yalnabez ya ko ne lazoꞌ goꞌ nde xgab goꞌ, lo ta ndli lazoꞌ goꞌ Jesucrist.

8 Jwanꞌ nasa, wes na, ptan na, bli goꞌ xgab reta jwanꞌ nak lí, reta jwanꞌ wen, reta jwanꞌ galꞌ, reta jwanꞌ nambi, reta jwanꞌ nawe nak, reta jwanꞌ wen nzoꞌb xkiꞌs naꞌ; tez nzo jwanꞌ naxut nak, nde tez nzo jwanꞌ nabeꞌz ni men xis naꞌ, re jwanꞌ reꞌ bli goꞌ xgab.

9 Re jwanꞌ mteꞌd goꞌ lon, re jwanꞌ mblo'n lo goꞌ, re jwanꞌ mbin goꞌ mdej na nde re jwanꞌ mbwiꞌ goꞌ mblin: Reta jwanꞌ reꞌ bli goꞌy nde Dios ta ndaꞌ yalnabez tyono Xaꞌ goꞌ.

10 Nale toz nzo lazoꞌn ndan dyux lo Xaꞌ Nyebeꞌ lo ta mteꞌlaꞌs goꞌ na tedib gob. Na'ndobezta na ke mbloꞌyek goꞌ na, jwanꞌ ndliy teraꞌ sin wiz li go' gan laꞌsto goꞌ na. 11 Nandejta na jwanꞌ reꞌ lo goꞌ tak nakinꞌ na jwanꞌ, mteꞌdla na ngonale lazoꞌn one choja jwan' ndori'dnda'b na. 12 Mnen xa ban na senꞌ ngenkwan nak, nde mnen xa ban na senꞌ axta ndryoꞌxoba. Mteꞌdla na lo reta ned jwanꞌ, senꞌ jwin nzo jwanꞌ wan nde senꞌ naꞌngenta jwanꞌ wan, tagaꞌ lo senꞌ axta ndryoꞌxoba nde lo senꞌ naꞌngenkwan ngenon. 13 Re lo jwan' toyal ri'd na, tak Crist ndaꞌ yalne lon. 14 Per wenka mbli goꞌ, lo mblaꞌsto goꞌ na lo re yalti jwanꞌ mbriꞌd na.

15 Nde noga re goꞌ wes yodo' yez Filipos mne lo senꞌ mbroꞌn lo xyon Macedonia, senꞌ mdobten mdej na diꞌs wen chanꞌ Jesucrist, nekthib yodoꞌ namblaꞌstod xaꞌ na, namdaꞌd xaꞌ jwanꞌ nakinꞌ na, benꞌta goꞌ mdaꞌy. 16 Nde na'r gob axta yez Tesalónica mtelꞌ goꞌ jwanꞌ nakinꞌ na. 17 Naꞌnkwanta na ben'ta kayaꞌn jwanꞌ ndaꞌ goꞌ, che'la le'n nkwan sa xyen yalwen jwan' ngeno go' kon Dios. 18 Leꞌ naya jwan' tozla mkayan, nde axta mbroꞌxoba; kon jwanꞌ ta mtelꞌ goꞌ ndeno Epafrodito, jwanꞌ nata tala; naka jwanꞌ naxeꞌ ndye', jwanꞌ yon nkayaꞌ Dios, jwanꞌ ndryoꞌ lazoꞌ Dios. 19 Le' Dios na, taꞌ Xaꞌ reta jwanꞌ nakinꞌ goꞌ axa nak yarik nde yalnaro chanꞌ Xa' lo ta ndli lazoꞌ goꞌ Jesucrist. 20 ¡Li naron' Xud na' Dios thiptane dib adiꞌ! Ta aka.

21 Pta' goꞌ dyux na lo reta men nayon ta ndli lazonꞌ Jesucrist. Re wes na' nde re ptanꞌ naꞌ ta nzinon ncheꞌ ntel' xaꞌ dyux lo goꞌ. 22 Reta xa' nak yez nayon chan' Dios, nde re xa' jwan' nge sin' liz César ntel' xa' dyux lo go'.

23 Yalwen chan' Jesucrist Xaꞌ Nyebeꞌ lon' tyono reta goꞌ. Ta aka.

<- FILIPENSES 3