Filemón

1 Na Pab, ngeꞌn lizyiꞌb tak ndej na xkiꞌs Jesucrist. Na nde wes Timoteo ngekeꞌn yeꞌs reꞌ loa, wes Filemón ta thita sinꞌ ngenꞌ. 2 Ni náꞌ dyux lo ptanꞌ naꞌ Apia, lo wes Arquipo ta thita nchal naꞌ ngenꞌ sinꞌ nde noga lo reta wes jwanꞌ ndyop liz la. 3 Yalwen nde yalnabeꞌz chanꞌ Xud naꞌ Dios nde chanꞌ Jesucrist Xaꞌ Nyebeꞌ ndono re goꞌ.

4 Reta senꞌ ndyodiꞌsnon Dios tiblaꞌ ntelaꞌs na ndej na lu nde ndan dyux lo Xaꞌ. 5 Tak nchon na jwanꞌ toz ndli lazoꞌa Jesucrist nde nkeꞌ lazoꞌa Xaꞌ nde taga ndlia lo reta men nak xinꞌ Dios. 6 Nyaꞌb na lo Dios sa tatka tyo nea lo jwanꞌ ndlia nde lo jwanꞌ ndlipa lazoꞌa sa yoloa reta jwanꞌ wen li men senꞌ lo nzolo men Jesucrist. 7 Nale toz nzo lazoꞌn nde ngo nea lazoꞌ náꞌ kon yalwen chanꞌ la tak lu wes na, ngo nalea lazoꞌ re men, xaꞌ jwanꞌ nak yez Nayon chanꞌ Dios.

8 Jwanꞌ nasa, tenye kon yalnyebeꞌ chanꞌ Crist toyal tir nyebeꞌn loa nyenꞌ kwan ndablo lia, 9 per mas jwin nyaꞌb na loa kon yalwen chanꞌ Jesucrist. Na Pab, ngoxla na nde naya ngeꞌn lizyiꞌb kwent ndan xkiꞌs Jesucrist, 10 naya nyaꞌb na loa laꞌstoa xaꞌ jwanꞌ nak xaja xinꞌ na, ndole Onésimo, tak na mdej xkiꞌs Dios lo xaꞌ sa ngol nakub xaꞌ laj ngeꞌn lizyiꞌb reꞌ.

11 Pola loa, ngok xaꞌ ti men ngen cho rsinꞌ nde naya lo rop naꞌ sinꞌ toz ndli xaꞌ. 12 Naya ngetelꞌ na xaꞌ loa, jwanꞌ nasa pkayaꞌ xaꞌ xaja kayaꞌa na. 13 Ncholas na tyentob na xaꞌ ncheꞌ, sa leꞌ xaꞌ li sinꞌ lon ta nangenta lu, laja ngeꞌn lizyiꞌb kwent ndej na diꞌs wen chanꞌ Dios. 14 Per naꞌlit nay tez nakapta lu diꞌs, tak nancholasta na lia xgab na ngenabeꞌy loa. Ndablo li ley dib nzo lazoꞌa. 15 Tak nzo pa jwanꞌ reꞌ mbli sa mxonꞌ Onésimo lud loa, sa naya tiptane kayaꞌa xaꞌ, 16 nde naꞌakta xaꞌ benꞌta men li sinꞌ loa, leꞌ xaꞌ ak mas ke ti men li sinꞌ, xaja ti wespa la jwanꞌ nkeꞌ toz lazoꞌa. Na, nkeꞌ toz lazoꞌn xaꞌ, leꞌ lu ndablo masraꞌ keꞌ lazoꞌa xaꞌ, xajka wes la lo izyo reꞌ, nde wes la lo xkiꞌs Dios.

17 Nde naya, tez ngwiꞌa na xajka thi wes la, pkayaꞌ Onésimo xaja kayaꞌa na. 18 Tez nzo kwan mblino xaꞌ lu, tez ndaꞌb xaꞌ loa, na kixa. 19 Na, Pab, yub na ngekeꞌn diꞌs reꞌ loa, na kixa. Tezka telaꞌs la, noa ndaꞌb lon, tak na mdej xkiꞌs Dios loa. 20 Ta naka wes, nyaꞌb na loa bli jwanꞌ reꞌ kon yalwen chanꞌ Xaꞌ Nyebeꞌ, blaꞌston sa yo nale lazoꞌn lo xned Xaꞌ Nyebeꞌ.

21 Nkeꞌn yeꞌs re loa, tak mnen nchon la diꞌs nde mnen tlia masraꞌ jwanꞌ wen, jwanꞌ nanit na loa. 22 Nde noga, nyaꞌb na loa blaj thi tenꞌ yanꞌ na, tak mnen Dios nchon xkiꞌs goꞌ nde ya twiꞌn goꞌ.

23 Epafras ntelꞌ dyux lo re goꞌ, xaꞌ jwanꞌ thipta nge rop náꞌ lizyiꞌb tak ndej náꞌ xkiꞌs Jesucrist. 24 Nde noga Marcos, Aristarco, Demas nde Luk ntelꞌ xaꞌ dyux lo re goꞌ, tak re xaꞌ reꞌ ndlaꞌston lo sinꞌ.

25 Leꞌ yalwen chanꞌ Jesucrist ndo kon re goꞌ. Ta aka.