Mateo 14

Nguj Juan ngole men

(Mr. 6:14-29; Lc. 9:7-9)

1 Tiemp ya Herodes xaꞌ nyebeꞌ Galilea mbin xaꞌ, jwanꞌ nketeli Jesús, 2 nde nchab xaꞌ lo re men nge sinꞌ lo xaꞌ:

—Juan ngole men nak xaꞌ ba, mbroxban xij re xaꞌ nguj, jwanꞌ nasa ngeno xaꞌ yalne ta ndli xaꞌ reta yalnaro ba.

3 Tak Herodes mnabeꞌ mxen xaꞌ Juan nde mtobo xaꞌ Juan kon kaden nde mkeꞌ lizyiꞌb xaꞌ Juan, xken Herodías ngol Blib wes Herodes. 4 Tak Juan nchab lo Herodes:

—Nandabloda tyobnoa ngol wes la

5 Zyasa Herodes ndonke kuj Juan, per nzyeb Herodes dib yez; tak dib yez nxoꞌbyek xaꞌ Juan xaja thi profet. 6 Per senꞌ lo ngoxoꞌb linꞌ Herodes, zyasa mzaꞌ xinꞌ Herodías ngwa mkani lo reta xaꞌ nzi tya, nde mbroꞌ toz lazoꞌ Herodes xamod mkani mza, 7 tamod mdaꞌ Herodes xkiꞌs Herodes lo mzaꞌ, taꞌ Herodes one kwan nyab mzaꞌ. 8 Nde xnaꞌ mzaꞌ nchab lo mzaꞌ kwan nyaꞌb mzaꞌ, zyasa nchab mzaꞌ lo Herodes:

—Ncholas na taꞌa ngudyek Juan ngole men lenꞌ thi yen lon. 9 Jwanꞌ na mblo nabil lazoꞌ rey Herodes, per lo mdaꞌa xaꞌ xkiꞌs xaꞌ lo nzi wiꞌ re men ta nzino xaꞌ, mnibeꞌ xaꞌ sa taꞌ xaꞌ jwanꞌ mnab mzaꞌ, 10 nde mnabeꞌ Herodes mchoꞌ yek Juan tenꞌ nge Juan lizyiꞌb. 11 Nde ngwano xaꞌ yek Juan lo thi lenꞌ yen nde mda xaꞌy lo mzaꞌ nde mzaꞌ mdaꞌy lo xnaꞌ mzaꞌ. 12 Zyasa mzin re xin'te'd Juan, nde mbeꞌ xaꞌ thabol nde mkaꞌs xaꞌ nde ngwa tej xaꞌy lo Jesús.

Jesús ndaꞌ jwanꞌ mda gayꞌ mil men

(Mr. 6:30-44; Lc. 9:10-17; Jn. 6:1-14)

13 Senꞌ mbin Jesús jwanꞌ na, ngwap xaꞌ lo bark nda xaꞌ lad izyo nagan sa yanꞌ tib xaꞌ, nde senꞌ lo mne re mena, mde ni re men mbroꞌ men re yez, nda xaꞌ tenꞌ sin Jesús. 14 Nde senꞌ mbla Jesús lo bark, mbwiꞌ Xaꞌ men toz tir nzi tya, nde mblat lazoꞌ Jesús reta men, nde mtodanꞌ Jesus re xaꞌ nayiz. 15 Senꞌ ndosea izyo, mbike re xinꞌ ted Jesús lo Xaꞌ, nde nchab xaꞌ:

—Mzye toz la izyo, nde nagan ncheꞌ ya. Gus lo re men sa ya re men re rach sa ya tiꞌ xaꞌ jwanꞌ wa xaꞌ. 16 Leꞌ Jesús nchab:

—Nanakinꞌta xaꞌ ya xaꞌ, goꞌ pta' jwanꞌ wa xaꞌ.

17 Re xin'te'd Jesús mkab:

—Ngen kwan nak, benꞌta gayꞌ pan nde chop mbel ngeno náꞌ.

18 Nde Jesús nchab:

—Deꞌ no goꞌy ncheꞌya 19 Zyasa mnibeꞌ Jesus lo re men tyob xaꞌ lo wan bix. Nde Jesús mxen xaꞌ re gayꞌ pan kon rop mbel, nde mbwiꞌ Xaꞌ lo beꞌ, nde mdaꞌ Xaꞌ dyux lo Dios nde mbli rol Xaꞌ pan mdaꞌ Xaꞌy lo re xin'te'd Xaꞌ nde re xin'te'd Xaꞌ mdida lo re men. 20 Reta men mda xaꞌ axta kebeꞌ mze lenꞌ xaꞌ, nde tata mthop re xin'te'd Jesús tib sen chokwid jwanꞌ mbroꞌxob. 21 Lo reta xaꞌ jwanꞌ mda nak mer ti gayꞌ mil xaꞌ biꞌ, nde namblabta xaꞌ re ngol nde reta or bix.

Jesús ndye lo nittoꞌ

(Mr. 6:45-52; Jn. 6:15-21)

22 Xisa Jesús mbli ngwap re xinꞌ ted Jesús lo bark sa yate xaꞌ tedib lad ro nittoꞌ, laja ngoned Jesús re men. 23 Senꞌ mne ndodiꞌsno Jesús re men toza ngwa Jesús yek yiꞌ sa tya todiꞌsno thib Xaꞌ Dios, nde senꞌ mbla yalꞌ thib Xaꞌ ndo tya. 24 Nde leꞌ bark ndola rol nittoꞌ, nde re bde ngin na bark tak leꞌ mbi cheꞌ nde ned nda bark. 25 Nde nakalraꞌ Jesús nda ni lo nittoꞌ lad lo bark tenꞌ nda re xin'te'd Xaꞌ. 26 Lo senꞌ mbwiꞌ re xinꞌ ted Jesús, leꞌ Jesús ndyeni lo nittoꞌ, mzyeb toz xaꞌ nde mbrezyaj xaꞌ:

— ¡Thi jwanꞌ bet ndeba! 27 Per Jesús mni lo xaꞌ nde nchab Jesús:

—¡Naꞌzyebta goꞌ, nay, blo ne lazoꞌ goꞌ!

28 Zyasa mkab Pedr:

—Señor, tez luy, bli teꞌn lo nit sa sin na loa ba

29 Leꞌ Jesús nchab:

—Deꞌ.

Nde Pedr mbroꞌ lenꞌ bark tolo mde lo nit nda lo Jesús. 30 Per senꞌ mbwiꞌ Pedr ne toz nde mbi mzyeb Pedr, nde tolo ndola Pedr lenꞌ nit, zyasa mbrezyaj Pedr:

—¡Señor Btolaꞌn! 31 Nde Jesús zyaga mxen yaꞌ Pedr nde nchab:

—¡Lud ndli lazoꞌa Dios! ¿Kwan liy ngok rop xgab la?

32 Nde senꞌ ngwap xaꞌ lo bark, ngotab mbi. 33 Zyasa re xaꞌ nzo lenꞌ bark mdoxub xaꞌ lo Jesús nde nchab xaꞌ:

—Li tirpa lu nak Xinꞌ Dios.

Jesús ntodanꞌ re men nayiz lenꞌ yez Genesaret

(Mr. 6:53-56)

34 Senꞌ mne mbrid xaꞌ lo nit, mzin xaꞌ lo xyon xaꞌ Genesaret. 35 Nde senꞌ mbyolo re men izyo ya Jesús, mchaꞌs xaꞌ diꞌs lo re men lo dib izyo ya nde re men ngwano xaꞌ reta men nayiz lo Jesús. 36 Nde mnab toz xaꞌ lo Jesús taꞌ Jesús diꞌs gal re xaꞌ yisa masa ro xab Jesus, nde reta xaꞌ jwanꞌ mbwal ro xab Jesús mdyanꞌ xaꞌ.

<- Mateo 13 Mateo 15 ->