1 Jesus mdaꞌ thi kwent nagan, sa loꞌ Jesus xamod ndablo tiblaꞌ todi'sno men Dios nde sa naꞌlyayod men. 2 Nchab Jesus:

—Thi yez ngo thi juez, jwanꞌ nanzepta lazoꞌn Dios neka ndyo xa' re men. 3 Leꞌga yez ya ngo thi ngol nguj sal' na', jwanꞌ ngyo kon tediba xaꞌ nde nchanaꞌb ngol lo Juez sa nyaꞌb juez kwent lo xaꞌ ta ndabeyono ngol la. 4 Nde bro tyemp mkete ngol lo juez per naꞌgoxyod juez jwanꞌ nyaꞌb ngol, ya lulka sa mbli juez xgab: Nanzepta lazoꞌn Dios nde neka ndyon men, 5 per ngol reꞌ thibla' ndotaꞌ ngol xyan yek na, mas laꞌston ngol, sa naꞌyetra ngol lon, tak yoloba yoche lazoꞌn.

6 Zyasa nchab Jesus:

—Bin goꞌ jwanꞌ nchab juez narax naka. 7 ¿Nde cho ndyak goꞌ na'lastod Dios re xaꞌ jwanꞌ mblí Dios, jwan' nyaꞌb lo Dios yalꞌ ndlya be? ¿Cho ndyak goꞌ na, sowꞌ toz kab Dios lo xaꞌ? 8 Na ni lo goꞌ, Dios naxax laꞌsto Xaꞌ go'. Per senꞌ ye'd Xinꞌ Mbiꞌ, ¿Cho benꞌ tasal xa' men jwanꞌ ndli lazoꞌn Dios lo izyo reꞌ?

9 Jesus mdaꞌ kwent chanꞌ pla xaꞌ, jwanꞌ ndli xgab nak xaꞌ men galꞌ, nde ngotal xaꞌ temas men:

10 —Ngo thi wiz, ngoxoꞌb chop xaꞌ biꞌ yodoꞌ, sa todi'sno xa' Dios: Thib xaꞌ nak xaꞌ fariseo, nde tedib xaꞌ nak, xaꞌ nyaꞌb tmi low. 11 Leꞌ xaꞌ fariseo ndo li, nde ndotodi'sno xa' Dios nchab xaꞌ: ꞌꞌDios, tan dyux loa tak nanakta na xaja temas men, re men wanꞌ, re men ndli jwanꞌ narax, re men ndyen ngol xaꞌgaꞌ men, nde neka nak na xaja xaꞌ ta nyaꞌb tmi low ndo ba. 12 Na ndli yalse chop gob lenꞌ sman nde ndan dyesmo lo reta jwanꞌ ndlin gan.ꞌꞌ 13 Leꞌ xaꞌ nyaꞌb tmi lowa, mdo tij xaꞌ, nde neka ndlit xaꞌ lo xaꞌ wiꞌ xaꞌ lo beꞌ, benꞌta nginyaꞌ xaꞌ lazoꞌ xaꞌ nde nchab xaꞌ: ꞌꞌ¡Dios, blat lazoꞌa na, tak na nak xaꞌ nzoꞌb xken naꞌ!ꞌꞌ 14 Na ni lo goꞌ, leꞌ xaꞌ nyaꞌb tmi low, senꞌ ndya xaꞌ liz xaꞌ, mtonꞌka Dios xken xaꞌ, per xaꞌ fariseo naꞌntonꞌta Dios xken xaꞌ. Tak xaꞌ nchak naro, xaꞌ ya ryoꞌyantho, per xaꞌ nanchaknaroda, xaꞌ ya ak naro.

15 Tagaꞌ mzin re men ndeno re or bix lo Jesus, sa xoꞌb yaꞌ Jesus yek or, per senꞌ mbwiꞌ re xin'te'd Jesus jwanꞌ reꞌ, mdobte mbrezno xaꞌ re men ndeno re or bixa. 16 Leꞌ Jesus mbrez re or bix nde nchab Jesus lo xinꞌ teꞌd Jesús:

—Btaꞌ goꞌ diꞌs yeꞌd re or bix lon, nde naꞌkad goꞌ diꞌs, tak tenꞌ nyebeꞌ Dios nak par reta men jwanꞌ nak lazoꞌn xaja re or bixa. 17 Nde galꞌ diꞌs nin lo goꞌ, xaꞌ jwanꞌ nankayaꞌd yalnyebeꞌ chanꞌ Dios, xaja or bix, naꞌyoted xaꞌ tenꞌ nyebeꞌ Dios.

18 Thi mbi' nak kabes mnabdiꞌs lo Jesus:

—Maestr wen, ¿Kwan ndablo lin sa kayan yalnaban adiꞌ?

19 Jesus nchab:

—¿Kwan liy ngoꞌlea na xaꞌ wen? Ngen cho wen nak, benꞌta thita xaꞌ wen nzo, xaꞌ ya nak Dios. 20 Mnea la re jwanꞌ nyebeꞌ xkiꞌs Dios: ꞌꞌNaꞌtyenta la ngol jwanꞌ nanakta ngol la, naꞌkujta la men, naꞌliwanꞌta la, naꞌnit la diꞌs kwinꞌ xis nek thib men, xoꞌbyek xud la nde xnaꞌa.ꞌꞌ

21 Le mbi' ya nchab lo Jesus:

—Reta jwanꞌ reꞌ nxobyek na xata lud na.

22 Senꞌ mbin Jesus jwanꞌ reꞌ, nchab Jesus lo xaꞌ:

—Thipta jwanꞌ nchak jwad lia, ptho reta jwanꞌ ngenoa nde ptaꞌ tmi lo re xaꞌ prob. Tamod sa kenoa yalrik lo beꞌ sera' deꞌ sa tyonkea xis na.

23 Per senꞌ mbin xaꞌ jwanꞌ reꞌ, ngo nabil lazoꞌ xaꞌ, tak xaꞌ rik toz xaꞌ. 24 Senꞌ mbwiꞌ Jesus ngo nabil lazoꞌ xaꞌ, nchab Jesus:

—¡Ne toz yote thi xaꞌ rik tenꞌ nyebeꞌ Dios! 25 Tak mas naleꞌ rid thi kamey lenꞌ yeꞌr yagux, ke rid thi xaꞌ rik tenꞌ nyebeꞌ Dios.

26 Zyasa re xaꞌ mbin jwanꞌ reꞌ nchab xaꞌ, ¿Cho li gan lyaꞌ sa?

27 Zyasa nchab Jesus:

—Re jwanꞌ ta naꞌakta li men, Dios tak li.

28 Pedr nchab lo Jesus:

—Náꞌ mblaꞌ náꞌ reta jwanꞌ ngeno náꞌ sa tyonke náꞌ xis la.

29 Zyasa nchab Jesus lo xaꞌ:

—Lipa nin lo goꞌ, xaꞌ jwanꞌ mblaꞌ liz naꞌ, mblaꞌ salꞌ naꞌ, mblaꞌ wes naꞌ, mblaꞌ xud naꞌ, mblaꞌ xinꞌ naꞌ, por yalnyebeꞌ chanꞌ Dios, 30 xaꞌ ya kayaꞌ mas yalwen naya, nde mas yoloba kayaꞌ xaꞌ yalnaban adiꞌ.

31 Zyasa xaꞌta mbrez Jesus re tib sen xin'te'd Jesus, nde nchab Jesus lo xaꞌ:

—Naya ndanꞌ yez Jerusalen, tenꞌ ak reta jwanꞌ mkeꞌ re profet yate Xinꞌ Mbiꞌ. 32 Tya tayaꞌ xaꞌ xaꞌ lo yaꞌ re xaꞌ nanakta xaꞌ Israel. Xaꞌ ya xino xaꞌ xaꞌ, loꞌs xaꞌ xaꞌ nde suk xaꞌ lo xaꞌ. 33 Kin xaꞌ xaꞌ nde kuj xaꞌ xaꞌ; per yaxob mbyon wiz ryoꞌxban xaꞌ.

34 Per nek lud naꞌngyenta xaꞌ jwanꞌ nchab Jesus lo xaꞌ, anaꞌnye xaꞌ jwanꞌ nchab Jesus lo xaꞌ, tak jwanꞌ nagan yen mena.

35 Senꞌ nde sin gax Jesus yez Jerico, tya ndob thi xaꞌ syeg ro ned, ndob na'b gon. 36 Senꞌ mbin xaꞌ ndarid men toz tir tya, mnabdiꞌs xaꞌ, ¿Cho kwan ndoyak? 37 Zyasa nchab men lo xaꞌ, Jesus Nazaret ndarid ncheꞌya. 38 Zyasa mbrez yaj xaꞌ syega, nchab xaꞌ:

—¡Jesus, xaꞌ nde lo bin David, blat lazoꞌa na!

39 Nde re xaꞌ nda siblo lo Jesus, mtokox xaꞌ xaꞌ syega, sa na'kwesta xaꞌ, per cheꞌla masra' ne mbrez xaꞌ:

—¡Xaꞌ nde lo bin David, blat lazoꞌa na!

40 Zyasa ngoto Jesus, nde mnebeꞌ Jesus yeꞌdno men xaꞌ lo Jesus, senꞌ mzin xaꞌ lo Jesus, mnabdiꞌs Jesus lo xaꞌ:

41 —¿Cho kwan ncholaꞌs la lin loa?

Zyasa mkab xaꞌ syega nchab xaꞌ:

—Xaꞌ Nyebeꞌ, na ncholas yoni lon. 42 Jesus nchab lo xaꞌ:

—¡Leꞌ loa yoni! Tak lo mbli lazoꞌa na, mdyanꞌ la.

43 Zyaga ngoni lo xaꞌ syega, mdonke xaꞌ xis Jesus nde mbli naro xaꞌ le Dios. Nde reta men jwanꞌ mbwiꞌ jwanꞌ ngok, no xaꞌ mbli naro xaꞌ le Dios.

<- LUK 17LUK 19 ->