Xaꞌ nak Juan 18

Mbeꞌ xaꞌ Jesus

(Mt. 26:47-56; Mr. 14:43-50; Lc. 22:47-53)

1 Senꞌ ngolo mdodiꞌsno Jesus Dios, mbroꞌ Jesus kon re xinꞌ teꞌd Xaꞌ, nda xaꞌ tedib lad ro pte ndole Cedrón, tenꞌ nzo ya bin, tya mzin Jesus kon re xinꞌ teꞌd Jesus. 2 Nde noga' Judas, xaꞌ jwanꞌ ta'yaꞌ Jesus, nzolo xaꞌ tya, tak naꞌr gob mdyop Jesus kon re xinꞌ teꞌd Jesus tya. 3 Zyasa mdoꞌb Judas ned lo bro toz sondad, lo re xaꞌ nak sinꞌ ngenap yodoꞌ, re xaꞌ jwanꞌ mtelꞌ re ngwleyꞌ nyebeꞌ nde re xaꞌ fariseo. Mzinno Judas reta xaꞌ tya, neꞌ xaꞌ xni kandil nde jwan' ndob ki nde re ned yiꞌb nke' xa' byo. 4 Leꞌ Jesus, mnela Xaꞌ re jwanꞌ rid Xaꞌ, zya nerla Jesus mnabdiꞌs lo re xaꞌ ya, nchab Jesus lo xaꞌ:

—¿Cho nkwanꞌ goꞌ?

5 Leꞌ re xaꞌ mkab:

—Náꞌ nkwanꞌ Jesus Xaꞌ Nazaret.

Jesus nchab:

—Na nak Xa' ya.

Nde xij re xaꞌ ya nzo Judas, xaꞌ ta tayaꞌ Jesus. 6 Senꞌ nchab Jesus lo xaꞌ: “Na nak Xa' ya”, zya mbererexis re xaꞌ nde ngob xaꞌ izyo. 7 Zyasa bere mnabdiꞌs Jesus lo xaꞌ tedib gob:

—¿Cho nkwanꞌ goꞌ?

Leꞌ re xaꞌ mkab:

—Náꞌ nkwanꞌ Jesus, Xaꞌ Nazaret.

8 Jesus mkab lo xaꞌ:

—Nia na lo goꞌ, na nak Xa' ya; tez na nkwanꞌ goꞌ, ptaꞌ goꞌ diꞌs sa ya re xaꞌ reꞌ.

9 Nde tamod sa ngok diꞌs jwanꞌ ta nchab Jesus: “Re men jwanꞌ mdaꞌa lon, nek thib xaꞌ naꞌntabta na.” 10 Zyasa Simón Pedr, ngeteno xa' thi espad, mbloꞌte xaꞌy lenꞌ yid nde mpchoꞌ xaꞌ nza ban ti xaꞌ ndole Malko mos mbol ngwleyꞌ ro. 11 Zyasa nchab Jesus lo Pedr:

—Blozaꞌ espad la lenꞌ yid. ¿Cho naꞌndabloda rid na yalti ta mnabeꞌ Xud na?[a]

Ngwano xaꞌ Jesus lo mbol ngwleyꞌ ro

(Mt. 26:57-58; Mr. 14:53-54; Lc. 22:54)

12 Zyasa reta sondad nde re xaꞌ nyebeꞌ lo sondad nde re xaꞌ nak sinꞌ ngenap yodoꞌ judi, mxen xaꞌ Jesus nde mtobo xaꞌ Jesus. 13 Nde nerla mbeꞌ xaꞌ Jesus lo Anas, tak xaꞌ ya nak xudzap Caifas, xaꞌ jwanꞌ nak ngwleyꞌ ro linꞌ ya. 14 Leꞌga Caifas reꞌ ta nchab lo re xa' nyebe' lo men judí, mas wen thipta mbiꞌ gaj kwent chanꞌ dib yez.[b]

Pedr ndo lo le liz Anas

(Mt. 26:69-70; Mr. 14:66-68; Lc. 22:55-57)

15 Leꞌ Simon Pedr kon tedib xinꞌ teꞌd Jesus mdonke xaꞌ xis Jesus. Leꞌ tedib xinꞌ teꞌd Jesus reꞌ, nzolola nglweyꞌ ro xaꞌ, nde ngote xaꞌ kon Jesus lo le liz nglweyꞌ ro; 16 leꞌ Pedr mbyanꞌ le xis yala. Zyasa, leꞌ xinꞌ teꞌd Jesus, xaꞌ ta nzolola ngwleyꞌ ro, mni xaꞌ lo ngol ta nkenap ro yala, sa mxeyal ngote Pedr lenꞌ. 17 Senꞌ ngote Pedr lenꞌ, zya mnabdiꞌs ngol ngenap royo lo Pedr, nchab ngol:

—¿Cho noa nak ti xinꞌ teꞌd mbiꞌ ba?

Leꞌ Pedr mkab:

—Ngen, nanakte na.

18 Leꞌ re mos chanꞌ nglweyꞌ nde re xaꞌ nak sinꞌ ngenap yodoꞌ, mtolꞌ xaꞌ ki sa biz xaꞌ, tak nchal xaꞌ, nde noga Pedr ndoli xij re xaꞌ ta nzi biza.

Anas nyabdiꞌs lo Jesus

(Mt. 26:59-66; Mr. 14:55-64; Lc. 22:66-71)

19 Leꞌ nglweyꞌ ro mnabdiꞌs lo Jesus kwent chanꞌ re xinꞌ teꞌd Jesus nde xomod nak jwanꞌ ndloꞌ Jesus. 20 Zyasa mkab Jesus lo xaꞌ:

—Na gal' ndodi's na lo reta men nde thiblaꞌ mtoteꞌd na xaꞌ lenꞌ yo tenꞌ ndyop re men judí, nde tenꞌ ndob yodoꞌ, plo nkata re xaꞌ judí, nde nek thib jwanꞌ naꞌmdodiꞌsnagaꞌsta na lo re men. 21 ¿Cho kwan liy lon nyabdiꞌs la? Mnabdiꞌs lo re men jwanꞌ mbina, nyenꞌ kwan mdodiꞌs na lo xaꞌ, re xaꞌ ya mne re jwanꞌ mdodiꞌs na, xaꞌ teja lo goꞌ.

22 Senꞌ nchab Jesus jwanꞌna, leꞌ ti xaꞌ nak sinꞌ ngenap yodoꞌ, mkeꞌ xaꞌy kwat Jesus, nchab xaꞌ:

—¿Cho tamod nkab la lo ngwleyꞌ ro?

23 Jesus nchab:

—Tez narax mnin lo xaꞌ, ptej nyenꞌ kwan narax nchab na, nde tez wen mnin, ¿Kwan liy mkeꞌ lay chon?

24 Nde tata ndobo Jesus, mtelꞌ Anas Jesus lo Caifas, ngwleyꞌ ro.

Nkalaꞌs Pedr nzolo Pedr Jesus

(Mt. 26:71-75; Mr. 14:69-72; Lc. 22:58-62)

25 Leꞌ Pedr ndoli, ndobiz lo ki, nde mnabdiꞌs xaꞌ lo Pedr, nchab xaꞌ:

—¿Cho naꞌluda nak thib xinꞌ teꞌd Xaꞌ ba?

Zya mkalaꞌs Pedr nde nchab Pedr:

—Ngen, nanakte na.

26 Leꞌ thi xaꞌ nak mos ngwleyꞌ ro, ta xaꞌ jwanꞌ ta mpchoꞌ Pedr nzanꞌ ya, nchab xaꞌ lo Pedr:

—¿Cho naꞌluda mbwiꞌn ndono Xaꞌ tenꞌ nzo ya bin?

27 Zya bere nkalaꞌs Pedr tedib gob, nde zyaga mbrez ngidteꞌ.

Mbeꞌ xaꞌ Jesus lo Pilat

(Mt. 27:1-2,11-14; Mr. 15:1-5; Lc. 23:1-5)

28 Tilꞌ toz mbroꞌteno re xaꞌ Jesus liz Caifás nde mbe' xaꞌ Jesus yolow ten' nzo Pilat. Yaja naꞌngoteda re xaꞌ judí lenꞌ yolow, tak ley chanꞌ re xaꞌ judí nak, naꞌnyeda yote xaꞌ lenꞌ yo chan' xaꞌ naꞌnakta judí, sa tamod toyal wa rzyeꞌ xaꞌ lo ni chanꞌ Pask. 29 Jwanꞌ nasa mbroꞌte Pilat le, nde nchab Pilat lo re men:

—¿Cho yalke nkeꞌ goꞌ yek mbiꞌ reꞌ?

30 Zya mkab re xaꞌ lo Pilat, nchab xaꞌ:

—Tez mbiꞌ reꞌ ngak ti mbiꞌ wen, payeꞌdno náꞌ Xaꞌ loa.

31 Zyasa nchab Pilat lo re xaꞌ:

—Beꞌ goꞌ Xaꞌ, nde mnaꞌb goꞌ kwent lo Xaꞌ a xa nak ley goꞌ.

Leꞌ re xaꞌ judí nchab lo Pilat:

—Per ná', re men judí, naꞌnyeda kuj náꞌ men.

32 Tamod sa ngok diꞌs jwanꞌ nchab Jesus, lo mdej Xa' lo re men nyenꞌ xamod gaj Xa'.[c] 33 Zyasa bere ngote Pilat lenꞌ yolow nde mbrez Pilat Jesus, nchab Pilat:

—¿Cho lu nak Rey lo re men judí?

34 Jesus mkab lo Pilat:

—¿Cho xkiꞌs la nak diꞌs reꞌ, o xaꞌla men mdej kwent chanꞌ na loa?

35 Leꞌ Pilat mkab lo Jesus:

—¿Cho ngak na men judí? Re men las la nde re ngwleyꞌ jwanꞌ nyebeꞌ, re xaꞌ ya mdayaꞌa lon. ¿Cho yalke mblia?

36 Jesus mkab:

—Yalnyebeꞌ chanꞌ na na'nakte jwan' lo izyo re'; tez ngaka jwan' lo izyo re', reta men jwanꞌ mketenke xis na ndla xaꞌ na nde naꞌngagat na lo yaꞌ re men judí. Per yalnyebeꞌ chenꞌ na naꞌnakte jwan' lo izyo re'.

37 Zyasa nchab Pilat lo Jesus:

—¿Cho rey nak la?

Jesus mkab:

—Lu ney, rey nak na. Jwanꞌ naga ngol na, nde jwanꞌ naga ndal na lo izyo re', sa tej na jwanꞌ li. Nde reta men jwanꞌ nxobyek jwanꞌ lipa, nchon xaꞌ diꞌs ron.

38 Pilat nchab lo Jesus:

—¿Cho kwan nak jwanꞌ li sa?

Nde senꞌ ngolo ta nchab Pilat, zya ngwa Pilat tenꞌ nzi reta xaꞌ judí nde nchab Pilat lo xaꞌ:

—Naꞌngasalta na nek thib yalke jwanꞌ nchap mbiꞌ reꞌ. 39 Leꞌ mod nzino goꞌ nak toyal lan thi xaꞌ nge lizyiꞌb nal lenꞌ pask reꞌ. ¿Cho ncholaꞌs goꞌ lan Xaꞌ nak Rey lo men judí?

40 Zyasa reta xaꞌ ne mbrez tedib gob, nchab xaꞌ:

—¡Naꞌla'd la xaꞌ ba! ¡Blaꞌ Barrabas!

Nde Barrabas nak ti xaꞌ wanꞌ.

<- Xaꞌ nak Juan 17 Xaꞌ nak Juan 19 ->