EFESIOS 4

Dios mbrez naꞌ thita ak naꞌ

1 Jwanꞌ nasa, na ta ngen lizyiꞌb tak ndlin sinꞌ lo Xaꞌ Nyebeꞌ, nyaꞌb na lo goꞌ sa naxuta kete goꞌ lo jwanꞌ mbrez Dios goꞌ, ta xaga ndablo kete goꞌ. 2 Thiblaꞌ nadoꞌ nde nabeꞌz gok goꞌ lo re men, bxek goꞌ nde bkeꞌ lazoꞌ goꞌ re men ndli lazonꞌ Dios. 3 Pchal goꞌ sa thita ak goꞌ por Mbi Nayon sa thiblaꞌ nabeꞌz kwe goꞌ. 4 Thita belꞌ nak naꞌ nde thita Mbi Nayon ndononꞌ, thita lo jwanꞌ ngembed naꞌ, jwanꞌ mkeyek Dios taꞌ Xaꞌ lonꞌ senꞌ mbrez Xaꞌ naꞌ; 5 thita Xaꞌ Nyebeꞌ lonꞌ, thita jwanꞌ ndli lazonꞌ, thita mtanꞌ Dios ryoꞌle men, 6 thita Dios nde Xud reta naꞌ, Xaꞌ jwanꞌ nyebeꞌ lo reta naꞌ, ndli rsinꞌ Xaꞌ naꞌ lo rsinꞌ Xaꞌ, nde nzo Xaꞌ lazoꞌ reta naꞌ.

7 Per lo kad thiba naꞌ ndaꞌ Crist axa ncholaꞌs Xaꞌ xaxaꞌga jwanꞌ toyal linꞌ sa linꞌ rsinꞌ Xaꞌ. 8 Jwanꞌ nasa lo xkiꞌs Dios nchab:

Ngwap Xaꞌ gap, mbeꞌ Xaꞌ re men nzo nowꞌyo

nde mdalaꞌs Xaꞌ re yalwen chanꞌ Xaꞌ lo re men.[a]

9 Mbay, ¿cho kwanꞌ ndeja ta nchaba "ngwap Xaꞌ gap"? Ndeja na nerla mdola Xaꞌ tenꞌ mas naꞌs lenꞌ izyo. 10 Xaꞌ ta mdola mbyeꞌd lo izyo reꞌ, leꞌga Xaꞌ ya ta ngwaꞌp tenꞌ mas gaꞌp lo beꞌ, sa Xaꞌ tyo dib nax. 11 Nde leꞌga Crist mdaꞌ lo men jwanꞌ toyal li men, cho xaꞌ nak apost, cho xaꞌ nak profet, cho xaꞌ ndye taꞌ xkiꞌs Dios, cho xaꞌ nkenap re men yez Dios, nde cho xaꞌ ntoteꞌd men lo xkiꞌs Dios. 12 Mbli Dios jwanꞌ reꞌ sa re men ya toteꞌd xaꞌ re men yez Dios, sa li xaꞌ sinꞌ jwanꞌ mdayaꞌ Dios li xaꞌ, sa re men yodoꞌ jwanꞌ nak ben Crist xyen xaꞌ, 13 axta kebeꞌ thita ak reta naꞌ lo jwanꞌ ndli lazonꞌ nde xa ncholonꞌ Xinꞌ Dios, nde gak naꞌ men galꞌ, xaꞌ ngol xgab naꞌ ta xa nak Crist, 14 sa naꞌaktaꞌ naꞌ xa nak re or bix jwanꞌ atil nzyeꞌ xgab naꞌ, re xaꞌ kwinꞌ ndloꞌ jwanꞌ naꞌlida nalitraꞌ xaꞌ gan kwinꞌno xaꞌ naꞌ sa li xaꞌ li lazonꞌ jwanꞌ nagalꞌta, nde nalid xaꞌ gan tokan xaꞌ naꞌ lo re jwanꞌ narax. 15 Cheꞌla tyokenꞌ xis jwanꞌ li nde keꞌ lazonꞌ tanꞌ, sa xyen naꞌ nde ak naꞌ xaja nak Xaꞌ nak yek lonꞌ, Xaꞌ ya nak Crist. 16 Ta xa re yib ndli nzota dib ben men sa thita nkey sinꞌ, ta nak men yodonꞌ Dios, Crist ntenta dib yodonꞌ Xaꞌ, benꞌ xa nak sinꞌ ndli thiba men, nde senꞌ kad thiba men naxut nke sinꞌ ndlaꞌsto tanꞌ, tamod mas ndoyak ne yodoꞌ nde ndoxena tak nkeꞌ lazoꞌ men ta men.

Thi mod kub ban men

17 Jwanꞌ reꞌ nin nde nyaꞌb na lo goꞌ por yalnyebeꞌ chanꞌ Jesucrist: Naꞌketetraꞌ goꞌ xa ngete re men naꞌnzolod Dios, re xaꞌ ya ngete axaja nak xgab nzo yek xaꞌ jwanꞌ ngencho sinꞌ li, 18 ngok ne yek xaꞌ tak ngete tij xaꞌ lo yalnaban jwanꞌ ndaꞌ Dios, naꞌakta yen xaꞌ jwanꞌ li, tak ne lazoꞌ xaꞌ. 19 Naꞌngentraꞌ yantho lo xaꞌ, thiptane mdayaꞌ xaꞌ lazoꞌ xaꞌ lo re ned yalxkap, nde nanchoched lazoꞌ xaꞌ thibla ndli xaꞌy. 20 Mbay, leꞌ goꞌ namteꞌdta goꞌ re jwanꞌ na lo Crist, 21 tez liga mbin goꞌ diꞌs wen chanꞌ Jesucrist nde mbloꞌ Xaꞌ lo goꞌ xata nak jwanꞌ lí nak Jesus. 22 Leꞌ re mod gox ta mban goꞌ pola, blaꞌ goꞌ reta jwanꞌ na, tak mkwinꞌnoy goꞌ nde mtokan na lazoꞌ goꞌ. 23 Btokub goꞌ xgab goꞌ lo re jwanꞌ nak goꞌ. 24 Ndablo ban goꞌ mod kub jwanꞌ mdaꞌ Dios, ta xa nak Xaꞌ, loꞌ galꞌ nde nayon ban goꞌ, xa ndej diꞌs li chanꞌ Dios.

25 Jwanꞌ nasa, nakwinꞌtraꞌ goꞌ, ptaꞌ goꞌ kwent li lo ta men goꞌ, tak thita nak reta naꞌ.

26 Tez nchak nayiꞌ goꞌ, naꞌtaꞌd goꞌ diꞌs li jwanꞌ narax gan lo goꞌ, btoyal goꞌ kwent senꞌ teraꞌ bix wiz, 27 nekla taꞌ goꞌ diꞌs lo maxuꞌ.

28 Xaꞌ jwanꞌ ndli wanꞌ, naꞌliwanꞌtraꞌ xaꞌ, cheꞌla ndablo ke xaꞌ sinꞌ, kon yaꞌ xaꞌ li xaꞌ jwanꞌ wen, sa keno xaꞌ jwanꞌ taꞌ xaꞌ lo re men nakinꞌna.

29 Nek thib diꞌs xkap naryoꞌda ro goꞌ, cheꞌla mni goꞌ diꞌs wen nde diꞌs jwanꞌ li xyen goꞌ, sa tamod re xaꞌ jwanꞌ gon xkiꞌs goꞌ wen liy lo xaꞌ. 30 Naꞌkonabilta goꞌ lazoꞌ Mbi Nayon chanꞌ Dios, Xaꞌ nak thi beꞌ mtob Dios lad goꞌ sa senꞌ sin wiz thibtane tolaꞌ Xaꞌ goꞌ toyal libeꞌ Xaꞌ goꞌ.

31 Blaꞌ goꞌ yalnaxi, naꞌkod goꞌ xyan lazoꞌ goꞌ, naꞌaknayiꞌd goꞌ, naꞌkweznod goꞌ re men, naꞌtodiꞌsnaraxta goꞌ xis ta men goꞌ nde naꞌlid goꞌ jwanꞌ narax. 32 Cheꞌla wen gok goꞌ, nde blat lazoꞌ goꞌ ta men goꞌ, ta xa mtonꞌ Dios xken goꞌ por Crist, tagaꞌ btoriꞌd yek goꞌ re jwanꞌ narax ndli ta goꞌ lo goꞌ.

<- EFESIOS 3 EFESIOS 5 ->