Yeꞌs brop mkeꞌ apost Pab lo re wes nzi Tesalonica

1 Pab, Silban nde Timoteo, ngekeꞌ náꞌ yeꞌs reꞌ lo goꞌ wes náꞌ nde ptanꞌ náꞌ jwanꞌ nzi yodoꞌ yez Tesalónica, goꞌ jwanꞌ nak men yez Dios Xaꞌ nak Xud naꞌ nde men Jesucrist Xaꞌ Nyebeꞌ. 2 Xud naꞌ Dios nde Jesucrist Xaꞌ Nyebeꞌ taꞌ Xaꞌ lo goꞌ yalwen nde yalnabeꞌz.

3 Ndablo thiblaꞌ taꞌ náꞌ dyux lo Dios por reta goꞌ, wes náꞌ nde ptanꞌ náꞌ, xa ndabloy, tak masraꞌ ndoxen xa ndli lazoꞌ goꞌ Dios, nde ndoxen xa nkeꞌ lazoꞌ goꞌ reta ta goꞌ. 4 Jwanꞌ nasa nale nzo lazoꞌ náꞌ ndaꞌ naꞌ kwent chanꞌ goꞌ lo temas yodonꞌ Dios, xa nxek goꞌ nde ndli lazoꞌ goꞌ Dios xij ta nchubla men goꞌ nde xij reta yalti jwanꞌ ndoriꞌd goꞌ. 5 Reta jwanꞌ reꞌ ndloꞌ, xa galꞌ nyaꞌb Dios kwent, sa tamod wiꞌ Dios goꞌ men nzalꞌ yote tenꞌ nyebeꞌ Dios, nde por jwanꞌ nasa naya ndoridndaꞌb goꞌ yalti.

6 Tak galꞌ naka lo Dios, riꞌd re xa' ya pen tak ntoti xaꞌ goꞌ, 7 nde Dios taꞌ yalnabeꞌs lo re goꞌ jwanꞌ ndoridndab yalti nde tagaꞌ taꞌ Xaꞌy lo náꞌ. Jwanꞌ reꞌ yote senꞌ ryoꞌto Jesús Xaꞌ Nyebeꞌ lo beꞌ xij bel nde kon re anj chanꞌ Xaꞌ jwanꞌ ngeno yalne, 8 sa taꞌ pen Xaꞌ re men naꞌnzolod Dios, neka nxobyek diꞌs wen chanꞌ Jesucrist Xaꞌ Nyebeꞌ lonꞌ. 9 Re men reꞌ ya xaꞌ pen adiꞌ, nde naꞌyoted xaꞌ tenꞌ ndob Xaꞌ Nyebeꞌ, nde plo ndob yalnaro nde yalne chanꞌ Xaꞌ, 10 wiz ya senꞌ yeꞌd Xaꞌ Nyebeꞌ, sa li naro re men yez nayon chanꞌ Xaꞌ Xaꞌ nde yoyen reta men jwanꞌ mbli lazonꞌ Xaꞌ (tak mbli lazoꞌ goꞌ kwent mdaꞌ náꞌ lo goꞌ).

11 Jwanꞌ nasa thiblaꞌ nyaꞌb náꞌ lo Dios naꞌ por goꞌ sa laꞌsto Xaꞌ goꞌ nde yoban goꞌ xa nzalꞌ ban men mbrez Dios, nde por yalne chanꞌ Xaꞌ li Xaꞌ gak reta jwanꞌ wen nzo lazoꞌ goꞌ nde re sinꞌ jwanꞌ ndli goꞌ tak ndli lazoꞌ goꞌ Dios. 12 Tamod sa li naro go' le Jesucrist Xaꞌ Nyebeꞌ lonꞌ nde Xaꞌ li naro goꞌ, por yalwen chanꞌ Dios naꞌ nde chanꞌ Jesucrist Xaꞌ Nyebeꞌ.

2 Tesalonicenses 2 ->