1 Ngen cho sinꞌ liy xyalꞌnon leꞌga na, per jwanꞌ ndablo tej na nak, Xa' Nyebe' ni lon xaja men nzalꞌ lazonꞌ ba nde ndloꞌto Xaꞌ re jwanꞌ lon. 2 Nzolon ti mbiꞌ jwanꞌ ndli lazonꞌ Crist, ndatela siꞌda linꞌ senꞌ mbeꞌ Xaꞌ Nyebe' mbiꞌ ya tenꞌ nak byon beꞌ. Naꞌnyet na cho dib belꞌ xaꞌ ngwa o benꞌ xbin xaꞌ ngwa, beꞌnta Dios mney. 3 Nde nzolon mbiꞌ ya per naꞌnyet na cho dib belꞌ xaꞌ ngwa lo beꞌ o benꞌ xbin xaꞌ ngwa, beꞌnta Dios mney, 4 nde mbeꞌ Dios xaꞌ lo beꞌ tenꞌ nawe toz nya,[a] tenꞌ mbin xaꞌ re diꞌs nagaꞌs chanꞌ Dios, diꞌs jwanꞌ naꞌzyalta mod ta' men kwent. 5 Toyal xyalꞌnon ti mbiꞌ ta naka, per na'ndoxal'not na le'ga na, nday na ben' jwan' ta nalat nzo lazo'n ndoxalꞌnon. 6 Tak te'nyega, tez ncholas na xyalꞌnon re jwanꞌ ndlin, naꞌnakta jwanꞌna sa nak na men ngenta xgab yek na, tak li re jwanꞌ tej na. Per tata la ney, sa nek thib men na'lid xa' xgab narax wi' xa' na, o jwan' nchon xa' xis na.

7 Nde sa le' re yalnaro jwan' mbloꞌto Dios lon, na'lide ak naron, jwan' nasa, naꞌxyalꞌ tozta na jwan' nak na, tak mdob ti kos lad na, mbyeꞌda xaja ti jwanꞌ ta mtelꞌ maxuꞌ ba, mdis bada lon, sa na'ridnadabta xyal' na. 8 Tson gob mnaꞌb na lo Xaꞌ Nyebeꞌ sa kib Xaꞌ jwanꞌ ndyak na; 9 Leꞌ Xaꞌ Nyebeꞌ ne lon: “Blo nale lazoꞌa lo yalwen chanꞌ na ta mdan loa; tak yalne chanꞌ na ndryoꞌxoba lo senꞌ nala nzo lazoꞌ men.” Jwanꞌ nasa, dib nzo lazoꞌn xyal'non jwan' ta nalat nzo lazo'n, sa tamod loꞌ yalne chanꞌ Crist lenꞌ lazoꞌn. 10 Jwan' nasa, ndyen toz na lo ta nala nzo lazo'n, lo ta ni xin men xis na, lo re yalti, lo senꞌ nchubla men na nde lo reta yalti ta ndri'd na lo ndej na xki's Crist. Tak lo ta nala nzo lazo'n zya mas ne nzo lazoꞌn[b].

11 Xajka nak ti men ne yek naꞌ nak na lo nxyalꞌnon leꞌga na, per goꞌ nchap yalke sa ta mblin. Tak goꞌ jwanꞌ ndablo ni wen xis na, tenyega naꞌntakta na lo goꞌ per mas ntak na lo re xaꞌ ta ndyonke goꞌ xis naꞌ, re xaꞌ ta nchak naro mbez nak apóst. 12 Re sinꞌ jwanꞌ taja mxek na mblin xij goꞌ, ngobe'y kon re jwan' mblo' ngok, re jwan' nzoyen men nde re yalnaro, re jwanꞌna ndloꞌ liga apóst nak na. 13 Tak ¿Xa nya jwanꞌ na'mblid go' jwanꞌ xa mbli tedib ned yodoꞌ, che'la leꞌga na namtodoꞌt na lo goꞌ? Briꞌd yek goꞌ jwanꞌ narax ta mblinon goꞌ.

14 Leꞌ naya jwanꞌ reꞌ nak byon gob yatwiꞌn goꞌ nde ndosaꞌa na, per naꞌncholasta na todoꞌn lo goꞌ. Tak naꞌnkwanta na jwanꞌ ngeno goꞌ, cheꞌla leꞌn nkwan yub goꞌ; tak ti xa' nak xud mdyenꞌ, ndablo xaꞌ kwan' jwanꞌ nakinꞌ xinꞌ xaꞌ, nde naꞌnakte xinꞌ xaꞌ kwanꞌ jwanꞌ nakinꞌ xud or. 15 Nde dib nzo lazoꞌn lu'x na re jwanꞌ ngenon nde axta yub na luꞌx na por yalwen lo goꞌ, te'nyega lo sen' jwanꞌ toz nkeꞌ lazoꞌn goꞌ, mas lud nkeꞌ lazoꞌ goꞌ na.

16 Per nzo pla xaꞌ, tenye mne xaꞌ ke naꞌmtodoꞌt na lo goꞌ, mbez xaꞌ ke nata toz yek na sa mblin gan mkwinꞌnon goꞌ. 17 ¿Cho nzo xanya ti xa' ta mtel na lo go' mblirsin na sa mkwinꞌnon goꞌ? 18 Mnaꞌb na lo Tit sa ngwatwiꞌ xaꞌ goꞌ nde mtel na tedib wes ngwa nke xis xaꞌ. ¿Cho mkwinꞌno Tit goꞌ? ¿Cho naꞌnakta thita nak rop náꞌ nde thita xgab ngeno náꞌ?

19 ¿Cho ndyak goꞌ benꞌ ndla lazoꞌ náꞌ lo goꞌ? Ngen, cheꞌla Dios ndowiꞌ nde lo le Jesucrist ndyodiꞌs náꞌy lo goꞌ. Nkeꞌ toz lazoꞌ ná' goꞌ nde ngeli náꞌ reta jwanꞌ reꞌ sa xyen goꞌ lo xkiꞌs Dios. 20 Ndlin xgab yoloba lo yatwiꞌn goꞌ naꞌyosiꞌbta na goꞌ xa ncholas na nde naꞌyosiꞌbta goꞌ na xa ncholaꞌs goꞌ; nday na nzo yalbyo xij goꞌ, nayiꞌ goꞌ nye goꞌ chanꞌ ta goꞌ, nzo xyan lazoꞌ goꞌ, nchak rol goꞌ, ni xin goꞌ xis ta goꞌ, ndyodiꞌs yix goꞌ, nchak naro goꞌ nde ndoja nak goꞌ. 21 Senꞌ lo yatwiꞌn goꞌ tedib gob, Dios tob lenꞌ lazoꞌn tyolas na wiꞌn goꞌ nde axta gon na por re goꞌ ta ndala ndli go' re jwanꞌ narax, naꞌndlaꞌd goꞌ ndli goꞌ re jwanꞌ nchola's bel' go', jwanꞌ ta nchaꞌxno goꞌ men naꞌnakta salꞌ goꞌ, nde thibla' ndli go' re jwanꞌ xkap.

<- 2 CORINTIOS 112 CORINTIOS 13 ->