1 Xinꞌ bix na, re jwanꞌ reꞌ ngekeꞌn lo goꞌ sa nalid goꞌ yalke. Per tez nzo goꞌ ndli yalke, ngenonꞌ ti Xaꞌ ak ronꞌ jwanꞌ ndlaꞌstonꞌ lo Xud naꞌ Dios, Xaꞌ ya nak Jesucrist, Xaꞌ galꞌ. 2 Nde Jesucrist nak Xaꞌ mdayaꞌ lazonꞌ lo Dios, sa mbyax reta xken naꞌ nde naꞌnakte benꞌta xken naꞌ, noga xken reta men nzi dib lo izyoy.

3 Nde jwanꞌ reꞌ mnenꞌ ke nzolonꞌ Xaꞌ, tez xobyek naꞌ re yalnyebeꞌ chanꞌ Xaꞌ. 4 Leꞌ men jwanꞌ mbez: “Nzolon Dios”, nde nanxobyekta xaꞌ re yalnyebeꞌ chanꞌ Dios, xaꞌ ya nak xaꞌ kwinꞌ, nde naꞌndonod xaꞌ jwanꞌ li lenꞌ lazoꞌ xaꞌ. 5 Leꞌ men jwanꞌ nxobyek xkiꞌs Dios, lazoꞌ men ya ndloꞌpa mxyut yalkeꞌ lazoꞌ chanꞌ Dios nde cheꞌ sa mnenꞌ ndonopa naꞌ Dios. 6 Xaꞌ jwanꞌ mbez tiblaꞌ ndono xaꞌ Dios, ndablo kete xaꞌ xa mkete Jesús.

7 Wes na, ptan na, naꞌngeket na yalnyebeꞌ kub lo goꞌ, leꞌn ngekeꞌ yalnyebeꞌ gox nzola neraꞌ, jwanꞌ ngenola goꞌ senꞌ mdobte mbli lazoꞌ goꞌ Crist. Leꞌ yalnyebeꞌ reꞌ nzolay pola, naka diꞌs jwanꞌ mbin goꞌ senꞌ lo mdobte mbli lazoꞌ goꞌ Xaꞌ. 8 Nde taga, ngekeꞌn yalnyebeꞌ reꞌ xaja jwanꞌ kuba lo goꞌ, jwanꞌ reꞌ ndloꞌy mod galꞌ mkete Jesucrist nde tagaꞌ galꞌ ngete goꞌ, tak leꞌ yalꞌkow ndorid ndaba nde leꞌ xni jwanꞌ nak lipa ndotoxniley.

9 Tez cho xaꞌ mbez ndo xaꞌ lo xni nde ngiꞌno xaꞌ ta men xaꞌ, xaꞌ ya benꞌ ndo lo yalꞌkow. 10 Leꞌ xaꞌ nkeꞌ lazonꞌ ta men naꞌ, xaꞌ ya tiblaꞌ ndo lo xni nde naꞌngenta jwanꞌ cheb xaꞌ. 11 Leꞌ xaꞌ jwanꞌ ngiꞌno ta men xaꞌ, ndo xaꞌ nde ngete xaꞌ lo yalꞌkow nde naꞌnyed xaꞌ plo nda xaꞌ, tak leꞌ yalꞌkow mtokowa lo xaꞌ.

12 Ngekeꞌn jwanꞌ reꞌ lo goꞌ, xinꞌ bix na, tak Dios mtonꞌla reta xken goꞌ por kwent chanꞌ Jesucrist. 13 Ngekeꞌn jwanꞌ reꞌ lo re goꞌ men gox, tak mbyolo goꞌ Xaꞌ jwanꞌ nzola axta senꞌ mdobte mdoxkwaꞌ izyo. Ngekeꞌn jwanꞌ reꞌ lo re goꞌ, or yenꞌ, tak goꞌ mbli gan lo maxuꞌ.

Ngekeꞌn jwanꞌ reꞌ lo re goꞌ mey bix, tak mbyolo goꞌ Xud naꞌ Dios. 14 Mkeꞌn jwanꞌ reꞌ lo re goꞌ men gox, tak mbyolo goꞌ Xaꞌ jwanꞌ nzola axta senꞌ mdobte mdoxkwaꞌ izyo. Mkeꞌn jwanꞌ reꞌ lo re goꞌ, or yenꞌ, tak ne ndo goꞌ nde leꞌ xkiꞌs Dios tiblaꞌ ndonoy goꞌ nde mbli goꞌ gan lo maxuꞌ.

15 Naꞌkeꞌd lazoꞌ goꞌ yalnarax lo izyo reꞌ, neka re jwanꞌ narax ndli re men. Tez nzo xaꞌ nkeꞌ lazonꞌ re jwanꞌ na, lenꞌ lazoꞌ xaꞌ ya naꞌngenta yalkeꞌ lazoꞌ chanꞌ Xud naꞌ Dios. 16 Tak reta jwanꞌ reꞌ nzo lo izyo, re jwanꞌ ndyen belꞌ men, re jwanꞌ ndyen ngud lo men nde re xaꞌ nchak naro lo re jwanꞌ toz ngeno xaꞌ, reta jwanꞌ reꞌ naꞌndede lo Xud naꞌ Dios, leꞌy ndryoꞌ lo izyo reꞌ. 17 Nde re jwanꞌ narax lo izyo reꞌ ndluxa kon re xgab naꞌy, per men ndli jwanꞌ ncholas Dios, men ya mban thiptane.

18 Xinꞌ bix na, ndosinla wiza nde xa nchonla goꞌ, leꞌ xaꞌ kwinꞌ mbez nak Crist ndela xaꞌ, taga naya jwanꞌ toz ndoroꞌtola re xaꞌ kwinꞌ mbez nak Crist, jwanꞌ nasa mnenꞌ ndosinla wiza. 19 Re xaꞌ reꞌ, mbroꞌ xaꞌ xij naꞌ, per naꞌnakta xaꞌ men naꞌ, tak tez ngak xaꞌ men naꞌ, nxek xaꞌ ngyanꞌ xaꞌ kon naꞌ, per mbroꞌte xaꞌ xij naꞌ sa ndloꞌ ke naꞌnakta re xaꞌ nak men naꞌ.

20 Leꞌ goꞌ ngeno Mbi Nayon jwanꞌ mdaꞌ Crist, nde nzolola goꞌ reta jwanꞌ chanꞌ Dios. 21 Ngekeꞌn jwanꞌ reꞌ lo goꞌ, tak nzolo goꞌ kwan nak jwanꞌ li, naꞌnakte tak naꞌnzolod goꞌy nde goꞌ mne ke lo jwanꞌ li naꞌndeda nek tib jwanꞌ kwinꞌ.

22 ¿Cho nak xaꞌ kwinꞌ? Xaꞌ ta nkalaꞌs ke Jesús nak Xaꞌ jwanꞌ mtelꞌ Dios, xaꞌ reꞌ nak xaꞌ ntokan men, xaꞌ jwanꞌ nkalaꞌs Xud naꞌ Dios nde Xinꞌ Xaꞌ Jesús. 23 Reta xaꞌ jwanꞌ nkalaꞌs ke Jesús nak Xin Dios, xaꞌ ya nandonoda Dios, nde leꞌ xaꞌ jwanꞌ ndej ke Jesús nak Xinꞌ Dios, xaꞌ ya ndono Dios.

24 Jw vxwanꞌ ta mbin goꞌ lo senꞌ mdobte goꞌ, jwanꞌ na tiblaꞌ yo lazoꞌ goꞌ, nde tez jwanꞌ mbin goꞌ zya tiblaꞌ nzoy lazoꞌ goꞌ, zyasa tiblaꞌ ndono goꞌ Dios nde ndono goꞌ Xinꞌ Xaꞌ Jesucrist. 25 Nde jwanꞌ mkeꞌyek Xaꞌ taꞌ Xaꞌ lonꞌ, jwanꞌ na nak yalnaban adiꞌ.

26 Mkeꞌn jwanꞌ re lo goꞌ, sa ndawiꞌ toz goꞌ lo re xaꞌ jwanꞌ ncholaꞌs kwinꞌno goꞌ. 27 Leꞌ Mbi Nayon jwanꞌ mdaꞌ Crist mkayaꞌ goꞌ, tiblaꞌ nzoy lenꞌ lazoꞌ goꞌ. Nde naꞌnakinꞌta goꞌ nek tib men loꞌy lo goꞌ, tak leꞌga Mbi Nayon ndloꞌ reta jwanꞌ lo goꞌ nde naka jwanꞌ li, nakte jwanꞌ kwinꞌ, nde xata mbloꞌ Mbi Nayona lo goꞌ, tata tiblaꞌ ptono goꞌ Xaꞌ.

28 Nde naya, xinꞌ bix na, tibla ptono goꞌ Jesucrist, sa senꞌ lo ryoꞌto Xaꞌ, naꞌzyepta naꞌ nde senꞌ yed Xaꞌ naꞌtyolaꞌsta naꞌ ryoꞌtonꞌ lo Xaꞌ. 29 Tez mne goꞌ Jesucrist nak Xaꞌ galꞌ, ndabloga nye goꞌ, re men ndli jwanꞌ galꞌ, men ya nak xinꞌ Dios.

<- 1 Juan 11 Juan 3 ->