1 Guladxinëꞌ Jesús len bönniꞌ daꞌquëꞌ Lëꞌ gal‑laꞌ ga dë Jerusalén, ga naꞌ nacuáꞌ yödz Betfagé len yödz Betania, len ga naꞌ dë caꞌ Guiꞌa Ga Röꞌgac Yag Olivo. Niꞌr Jesús bsölëꞌë chopëꞌ bönniꞌ usë́d queëꞌ, 2 rëꞌ lequëꞌ:

―Gul‑tséaj lu yödzdauꞌ dë lauruꞌ niꞌ, len catiꞌ tsazliꞌ niꞌ, tsajxácaꞌliꞌ‑baꞌ niꞌ tubaꞌ búrrodauꞌ nágaꞌbaꞌ, nutu nu rbiani lëbaꞌ. Gul‑sédx‑baꞌ len gul‑chë́ꞌ‑baꞌ quiaꞌ ni. 3 Chquiꞌ nu bi guië lbiꞌiliꞌ le runliꞌ lë ni, gul‑guië́ nu naꞌ: “Xanruꞌ rquinnëꞌ‑baꞌ, atiꞌ laꞌ usö́laꞌtëꞌ‑baꞌ quiuꞌ.”

4 Niꞌr yjaquëꞌ yajxácaꞌquëꞌ‑baꞌ búrrodauꞌ naꞌ, nágaꞌbaꞌ ga nu ryaz löꞌa ga nac raꞌ nöz, atiꞌ gulasedxëꞌ‑baꞌ. 5 Nup nacuáꞌ niꞌ të lequëꞌ:

―¿Bizxa ni runliꞌ? ¿Bizx quië rsedxliꞌ‑baꞌ búrrodauꞌ naꞌ?

6 Gulubiꞌë didzaꞌ bönniꞌ usë́d queëꞌ Jesús, glëꞌ lequëꞌ ca naꞌ chgudxczëꞌ lequëꞌ Jesús, atiꞌ gluiꞌ lequëꞌ latj bunách niꞌ. 7 Niꞌr gulachë́ꞌë‑baꞌ búrrodauꞌ naꞌ ga naꞌ zoëꞌ Jesús. Gulaxóëꞌ cúdzuꞌbaꞌ lariꞌ quequëꞌ atiꞌ Jesús gdxiëꞌ‑baꞌ. 8 Zian bönniꞌ nacuꞌë niꞌ gulachiljëꞌ lariꞌ quequëꞌ gap nac laꞌ nöz. Yelaꞌgac bunách niꞌ gulaguítsj zin le guluzxóa laꞌ nöz.

9 Gulazú lau tuiꞌ zidzj didzaꞌ nup nanörgac lahuëꞌ Jesús len nup naꞌ zaꞌc cúdzuꞌlëꞌ, taꞌnë́ꞌ:

―Yöl‑laꞌ ba. Dios gun laꞌyëꞌ Bönniꞌ zëꞌë ni, nasölëꞌë Lëꞌ Xanruꞌ Dios. 10 Dios gun laꞌyëꞌ Bönniꞌ ni ziꞌa gna bëꞌë, ca naꞌ gna bëꞌë xuz xtauꞌruꞌ David. Yöl‑laꞌ ba Dios.

11 Cni guc, bdxinëꞌ Jesús Jerusalén, atiꞌ gyaziëꞌ löꞌa gdauꞌ. Catiꞌ budx buyúëꞌ yúguꞌtë le nacuáꞌ gdu zbiꞌil niꞌ, burujëꞌ zacaꞌ yödz Betania le chrdzöꞌ, dzagquëꞌ Lëꞌ bönniꞌ usë́d queëꞌ.

12 Catiꞌ zaꞌ reníꞌ yetú dza, atiꞌ tuꞌrujëꞌ yödz Betania Jesús len bönniꞌ daꞌquëꞌ Lëꞌ, rdunëꞌ Jesús. 13 Ziꞌtuꞌ bléꞌinëꞌ tu yag higo dxia xlaguiꞌ. Gbiguëꞌë ga naꞌ zoa yag naꞌ chquiꞌ utsajxaquëꞌë latiꞌ le rbia. Catiꞌ bdxinëꞌ niꞌ cutu bi yajxaquëꞌë le rbia. Xlaguiꞌz dxia le cutu rdxini dza cuia. 14 Niꞌr bulidzëꞌ yag naꞌ Jesús, rnëꞌ:

―Cutur nu gagu le rbia quiuꞌ.

Gulayönnëꞌ didzaꞌ ni bönniꞌ usë́d queëꞌ.

15 Catiꞌ guladxinëꞌ Jerusalén Jesús len bönniꞌ daꞌquëꞌ Lëꞌ, gyaziëꞌ Jesús löꞌa gdauꞌ len gzu lahuëꞌ rubijëꞌ niꞌl nup tutiꞌ len nup taꞌu löꞌa gdauꞌ. Brixëꞌ yuguꞌ blag quegac nup tuꞌtsáꞌ dumí gzaꞌa, lencaꞌ yuguꞌ ga taꞌbö́ꞌ nup tutiꞌ budödauꞌ. 16 Cutu caꞌ bëꞌë latj nu bi guaꞌ, uzóa nöz ga nac löꞌa gdauꞌ. 17 Busëdnëꞌ nup nacuáꞌ niꞌ, rnëꞌ:

―Nayúj lu guich laꞌy, rna: “Lidxaꞌ siꞌ lei, yuꞌu ga lulídz Dios bunách gdutë yödzlyú.” Lbiꞌiliꞌ chnunliꞌ lei ca nac bloj quegac gban.

18 Catiꞌ gulayönnëꞌ didzaꞌ ni yuguꞌ bxuz uná bëꞌ len bönniꞌ gdauꞌ tuꞌsëdi, gulazú lauquëꞌ taꞌzú taꞌböꞌë ludöddëꞌ Jesús, san le tádxinëꞌ bunách, cutu bi glunëꞌ queëꞌ, le tuꞌbani yúguꞌtë bunách ca nac le rusëdnëꞌ Jesús. 19 Catiꞌ chrdzöꞌ burujëꞌ Jesús lu yödz naꞌ.

20 Catiꞌ zaꞌ reníꞌ yetú dza, guladödëꞌ Jesús len bönniꞌ daꞌquëꞌ Lëꞌ ga zoa yag higo naꞌ bulídz ziꞌë Jesús, len gulaléꞌinëꞌ lei, chnabídx gdu luí. 21 Niꞌr yajneynëꞌ Pedro bi guc atiꞌ gudxëꞌ Jesús:

―Bönniꞌ Usëdi, byutscaꞌ. Yag higo ni bulídz ziꞌu nij, chnabídx.

22 Bubiꞌë didzaꞌ Jesús, rëꞌ lequëꞌ:

―Gul‑tsejlëꞌ Dios. 23 Le nactë rëpaꞌ lbiꞌiliꞌ, chquiꞌ nu bönniꞌ guiëꞌ guíꞌadauꞌ ni: “Bcuit ni, yajsóa lu nis zxön”, len cugác chop ladxëꞌë bönniꞌ naꞌ san gdu ladxëꞌë tsejlëꞌë gunëꞌ Dios ca naꞌ rnëꞌ, caꞌ gac. 24 Qui lë ni naꞌ rëpaꞌ lbiꞌiliꞌ: Yúguꞌtë le gnabliꞌ catiꞌ ulidzliꞌ‑nëꞌ Dios, gul‑tsejlëꞌ chbennëꞌ queëliꞌ Dios lë naꞌ rnabliꞌ, atiꞌ gunnëꞌ queëliꞌ. 25 Catiꞌ niꞌ rulidzliꞌ‑nëꞌ Dios, chquiꞌ zoa nu rleyliꞌ nu bi ben queëliꞌ, gul‑nít lau nu naꞌ quië unít lahuëꞌ caꞌ lbiꞌiliꞌ ca nac dul‑laꞌ nabágaꞌliꞌ, Xuzliꞌ naꞌ zoëꞌ yehuaꞌ yubá. 26 Chquiꞌ cu unít lauliꞌ bunách, cutu unít lahuëꞌ lbiꞌiliꞌ dul‑laꞌ nabágaꞌliꞌ Xuzliꞌ zoëꞌ yehuaꞌ yubá.

27 Niꞌr yhuöjquëꞌ Jerusalén Jesús len bönniꞌ daꞌquëꞌ Lëꞌ. Catiꞌ niꞌ rdëꞌ Jesús ga nac nchil gdauꞌ, guladxinëꞌ ga zoëꞌ yuguꞌ bxuz uná bëꞌ len bönniꞌ gdauꞌ tuꞌsëdi len bönniꞌ gul tuꞌzejniꞌi. 28 Gulanabnëꞌ Jesús, taꞌnë́ꞌ:

―¿Bizxa yöl‑laꞌ uná bëꞌ dë lu naꞌu runuꞌ yuguꞌ lë ni? ¿Nuzxa caz budö́d lu naꞌu yöl‑laꞌ uná bëꞌ gunuꞌ cni?

29 Bubiꞌë didzaꞌ Jesús, rëꞌ lequëꞌ:

―Nedaꞌ caꞌ gnabdaꞌ lbiꞌiliꞌ tu didzaꞌ. Chquiꞌ ubiꞌiliꞌ quiaꞌ didzaꞌ, niꞌr gyëpaꞌ lbiꞌiliꞌ bi yöl‑laꞌ uná bëꞌ rundaꞌ yuguꞌ lë ni. 30 ¿Nuzxa budö́d lu nëꞌë Juan uquilëꞌ bunách nis? ¿Naruꞌ Dios o bunách? Gul‑natscaꞌ.

31 Gulazú lauquëꞌ tun xtídzaꞌquëꞌ laꞌ légaczëꞌ, taꞌnë́ꞌ:

―Chquiꞌ gnaruꞌ Dios bsölëꞌë lëꞌ, guiëꞌ rëꞌu: “¿Bizx quië cutu gyéjlëꞌliꞌ lëꞌ?” 32 ¿Naruꞌ guië́tsaruꞌ‑nëꞌ: “Gulasölëꞌë lëꞌ bönniꞌ”?

Cni taꞌzáꞌ ládxiꞌquëꞌ le tádxinëꞌ bunách zian nacuáꞌ niꞌ le taqui yúguꞌtë bunách naꞌ bëꞌë didzaꞌ uláz queëꞌ Dios Juan naꞌ. 33 Qui lë ni naꞌ glëꞌ Jesús:

―Cutu nö́zituꞌ.

Niꞌr Jesús gudxëꞌ lequëꞌ:

―Nedaꞌ caꞌ cutu quíxjöiꞌdaꞌ lbiꞌiliꞌ bi yöl‑laꞌ uná bëꞌ dë lu naꞌa rundaꞌ yuguꞌ lë ni.

<- San Marcos 10San Marcos 12 ->