13
Runëꞌ lsaquiꞌ Jesús ca nac qui bönniꞌ guz
1 Laꞌ dza niꞌz brujëꞌ Jesús lu yuꞌu, atiꞌ yajchöꞌë raꞌ nis zxön. 2 Le guladxín ga zoëꞌ Jesús bunách zian, grenëꞌ tu lëꞌi bárcodauꞌ, len gröꞌë niꞌ, atiꞌ bunách zian naꞌ gulacuáꞌ luyú bidx raꞌ nis zxön naꞌ. 3 Niꞌr bë́ꞌlenëꞌ lequëꞌ didzaꞌ Jesús, zian le busëdnëꞌ lequëꞌ, yuguꞌ le benëꞌ lsaquiꞌ, rnëꞌ:
―Gul‑yutscaꞌ, brujëꞌ bönniꞌ guz, zjësiëꞌ xseydauꞌ. 4 Tsal niꞌ zjësiëꞌ, glas raꞌ nöz laꞌgac xseydauꞌ naꞌ, atiꞌ guladxinbaꞌ bguindauꞌ, glëꞌjbaꞌ xseydauꞌ naꞌ. 5 Glas luyú ga röꞌ guiöj yelaꞌgac xseydauꞌ naꞌ, ga naꞌ curö́ꞌ szxöni yu, atiꞌ laꞌ gulalentë, le curö́ꞌ niꞌ szxöni yu. 6 Niꞌr catiꞌ budzáꞌa, laꞌ gulacuadtë len gulabídx lë naꞌ bësiëꞌ, le cunác ga lun luí. 7 Gulalén ga gululén lba yötsiꞌ yelaꞌgac xseydauꞌ naꞌ glas, atiꞌ gulazxö́n lba yötsiꞌ naꞌ len gularöli lë naꞌ bësiëꞌ, glun ditj lei. 8 Glas ga nac luyú dxiꞌa yelaꞌgac xseydauꞌ naꞌ, atiꞌ gulunö́dzj. Gulunö́dzj yetú gayuaꞌtër caꞌ laꞌgac lë naꞌ bësiëꞌ. Gulunö́dzj yetsonnlalj caꞌ yelaꞌgac naꞌ, atiꞌ gulunö́dzj yechí uruáꞌ caꞌ yelaꞌgac naꞌ. 9 Nu zoa nag len ryöni, ral‑laꞌ uzë́ nag.
Le tëꞌni lun le benëꞌ lsaquiꞌ Jesús
10 Niꞌr guladxinëꞌ ga zoëꞌ Jesús bönniꞌ usë́d queëꞌ len gulanabnëꞌ Lëꞌ, taꞌnë́ꞌ:
―¿Bizx quië ruíꞌlenuꞌ bunách didzaꞌ yuguꞌ le runuꞌ lsaquiꞌ?
11 Bubiꞌë didzaꞌ Jesús, rëꞌ lequëꞌ:
―Ruꞌë lbiꞌiliꞌ latj Dios tséjniꞌliꞌ le nagachiꞌ ca rna bëꞌë Lëꞌ yehuaꞌ yubá, san cutu tëꞌni laꞌyejniꞌi bunách ni. 12 Nu dë qui, Dios unödzjëꞌ qui yelatiꞌ, atiꞌ szxö́nitër gataꞌ qui, san nu cudë́ qui, laꞌz dui le dë qui gdua. 13 Qui lë ni naꞌ ruíꞌlenaꞌ lequëꞌ didzaꞌ yuguꞌ le runaꞌ lsaquiꞌ, le tuꞌyúëꞌ san cutu taꞌléꞌinëꞌ. Taꞌyönnëꞌ san cutu tuꞌzë́ nagquëꞌ len cutu taꞌyéjniꞌnëꞌ. 14 Cni rac quequëꞌ quië utság lë naꞌ gnëꞌ Isaías, bönniꞌ bëꞌë didzaꞌ uláz queëꞌ Dios, gnëꞌ:
Le nactë yö́niliꞌ san cutu tséjniꞌliꞌ.
Uyuliꞌ gnaꞌliꞌ san cutu gléꞌiliꞌ,
15 Le nazíd ládxiꞌdauꞌgac bunách ni,
Len cutu ryaz icj nagquëꞌ.
Nadzudiꞌ yöj lauquëꞌ,
Cui laꞌléꞌinëꞌ len yöj lauquëꞌ naꞌ.
Cutu luzë́ nagquëꞌ
Len cutu luzejniꞌi ládxiꞌquëꞌ,
Len cutu luhuöaquëꞌ quiaꞌ nedaꞌ
Quië gac unaꞌ lequëꞌ.
16 Naꞌa, bicaꞌ ba lbiꞌiliꞌ, le rleꞌi yöj lauliꞌ len ryöni nagliꞌ. 17 Le nactë rëpaꞌ lbiꞌiliꞌ, glëꞌnnëꞌ laꞌléꞌinëꞌ le rléꞌiliꞌ lbiꞌiliꞌ zian bönniꞌ gluꞌë didzaꞌ uláz queëꞌ Dios len yuguꞌ bönniꞌ tsahuiꞌ san cutu gulaléꞌinëꞌ lei. Glëꞌnnëꞌ laꞌyönnëꞌ le ryö́niliꞌ lbiꞌiliꞌ san cutu gulayönnëꞌ lei.
Rusálj laꞌnëꞌ Jesús le benëꞌ lsaquiꞌ
18 Gnëꞌ caꞌ Jesús:
―Gul‑zë́ nagliꞌ ca nac le benaꞌ lsaquiꞌ qui bönniꞌ guz. 19 Nútiꞌtëz nu ryöni didzaꞌ ca rna bëꞌë Dios yehuaꞌ yubá len cutu rejniꞌi lei, rac qui didzaꞌ ryöni nu naꞌ ca guc qui xseydauꞌ naꞌ glas raꞌ nöz. Laꞌ zaꞌtë tuꞌ xöhuiꞌ len rugúa didzaꞌ naꞌ gyuꞌu icj ládxiꞌdauꞌhuëꞌ bönniꞌ naꞌ. 20 Xseydauꞌ naꞌ glas luyú ga röꞌ guiöj ruluíꞌ ca rac queëꞌ bönniꞌ ryönnëꞌ didzaꞌ naꞌ len laꞌ ruzëtë naguëꞌ lu yöl‑laꞌ rudziji queëꞌ, 21 san ca naꞌ cutu rdiaꞌ xseydauꞌ naꞌ le cudë́ ga gun luí, lëzcaꞌ cni rac queëꞌ bönniꞌ ni. Catiꞌ gdxin tu le usacaꞌ ziꞌ lëꞌ, atiꞌ laꞌbía ládxiꞌgac lëꞌ bunách le nazíꞌ lu nëꞌë didzaꞌ naꞌ, laꞌ gactë chop ladxëꞌë. 22 Xseydauꞌ naꞌ glas ga naꞌ gululén lba yötsiꞌ ruluíꞌ ca rac queëꞌ bönniꞌ naꞌ ryönnëꞌ didzaꞌ naꞌ, san ruiꞌ ladxëꞌë yuguꞌ le dë yödzlyú ni, atiꞌ nazíꞌ yëꞌë bönniꞌ naꞌ, le ruiꞌ ladxëꞌë yuguꞌ yöl‑laꞌ tsahuiꞌ qui. Yuguꞌ lë ni taꞌröli didzaꞌ naꞌ len tun ga cutu gun dxin lu icj ládxiꞌdauꞌhuëꞌ. 23 Xseydauꞌ naꞌ glas luyú dxiꞌa ruluíꞌ ca rac queëꞌ bönniꞌ ryönnëꞌ didzaꞌ naꞌ len réjniꞌnëꞌ lei, atiꞌ run dxin didzaꞌ naꞌ lu icj ládxiꞌdauꞌhuëꞌ. Nacgac laꞌgac bunách ca xseydauꞌ naꞌ gulunö́dzj yetú gayuaꞌtër caꞌ. Nacgac yelaꞌgac bunách ca xseydauꞌ naꞌ gulunö́dzj yetsonnlalj caꞌ, atiꞌ nacgac yelaꞌgac bunách ca xseydauꞌ naꞌ gulunö́dzj yechí uruáꞌ caꞌ.
Guíxiꞌdauꞌ xöhuiꞌ naláꞌ ca nac yöl zxoaꞌ xtil
24 Yetú le benëꞌ lsaquiꞌ Jesús, rëꞌ lequëꞌ:
―Ca gac ga gdxin le rna bëꞌë Dios yehuaꞌ yubá nac ca guc qui xseydauꞌ dxiꞌa guzëꞌ tu bönniꞌ ga nac laꞌ yël queëꞌ. 25 Tsal naꞌ tasiëꞌ bönniꞌ nacuꞌë lidxëꞌ, bdxin niꞌ tu nu curleꞌi lëꞌ dxiꞌa, atiꞌ yjöz laꞌ yël queëꞌ xsey guíxiꞌdauꞌ xöhuiꞌ naláꞌ ca nac yöl zxoaꞌ xtil, atiꞌ böjëꞌ xlatjëꞌ. 26 Catiꞌ blen zxoaꞌ xtil naꞌ len gröꞌ deu qui, ga naꞌ dxia xuiꞌi, niꞌr glac bëꞌ guíxiꞌdauꞌ xöhuiꞌ naꞌ. 27 Niꞌr guladxinëꞌ bönniꞌ huen dxin ga zoëꞌ bönniꞌ xan laꞌ yël naꞌ, len tëꞌ lëꞌ: “Xan, chquiꞌ guzuꞌ xseydauꞌ dxiꞌa laꞌ yël quiuꞌ, ¿nacx guc gulalén guíxiꞌdauꞌ xöhuiꞌ naꞌ?” 28 Gudxëꞌ lequëꞌ xan laꞌ yël naꞌ, rnëꞌ: “Benëꞌ cni bönniꞌ curléꞌinëꞌ nedaꞌ dxiꞌa.” Niꞌr gulanabnëꞌ lëꞌ huen dxin naꞌ, taꞌnë́ꞌ: “¿I rëꞌnnuꞌ tseajtuꞌ tsjöljtuꞌ guíxiꞌdauꞌ xöhuiꞌ naꞌ?” 29 Xanquëꞌ rëꞌ lequëꞌ: “Cutu. Nazx caꞌ catiꞌ gládzuꞌliꞌ guíxiꞌdauꞌ xöhuiꞌ naꞌ, gládzuꞌlentëliꞌ caꞌ yöl zxoaꞌ xtil. 30 Dxiꞌar gac güiꞌliꞌ latj laꞌzxöngar tsazxö́n catiꞌ gdxinr dza tsajtubruꞌ lei, atiꞌ niꞌr gyëpaꞌ nup lutúb lei: Gul‑túb ziꞌal guíxiꞌdauꞌ xöhuiꞌ naꞌ len gul‑gugaꞌ tsajxúndj hueaj quië uzéguiꞌruꞌ lei, atiꞌ niꞌr utubliꞌ zxoaꞌ xtil lu yuꞌu quiaꞌ.”
Runëꞌ lsaquiꞌ Jesús ca nac qui xsey mostaza
31 Yetú le benëꞌ lsaquiꞌ Jesús, rëꞌ lequëꞌ:
―Ca gac ga gdxin le rna bëꞌë Dios yehuaꞌ yubá, gac ca rac qui tu xsey mostaza, le guzëꞌ tu bönniꞌ ga nac laꞌ yël queëꞌ. 32 Le nactë nactër cuidiꞌ xsey mostaza naꞌ ca yúguꞌtë xseydauꞌ yezicaꞌ, san catiꞌ chnadúz, rzxöntër ca yúguꞌtë guixiꞌ cuan len rac zxön ca nac tu yag, atiꞌ taꞌdxinbaꞌ bguindauꞌ tun lidxcbaꞌ lu zxuzaꞌ nëꞌi.
Runëꞌ lsaquiꞌ Jesús qui xnëꞌi yöt xtil
33 Yetú le benëꞌ lsaquiꞌ Jesús, rëꞌ lequëꞌ:
―Ca gac ga gdxin le rna bëꞌë Dios yehuaꞌ yubá gac ca le run xnëꞌi yöt xtil, le buchíxinu ngul len tsonn lbix yöjz zxoaꞌ xtil, atiꞌ gyazx gdutë cua naꞌ.
Le rëꞌni gun le runëꞌ lsaquiꞌ Jesús
34 Yúguꞌtë lë ni benëꞌ lsaquiꞌ Jesús, bë́ꞌlenëꞌ bunách nacuáꞌ niꞌ didzaꞌ, len cutu bi didzaꞌ bë́ꞌlenëꞌ lequëꞌ le cubenëꞌ lsaquiꞌ. 35 Cni benëꞌ quië butság lë naꞌ buzujëꞌ lu guich bönniꞌ bëꞌë didzaꞌ uláz queëꞌ Dios, gnëꞌ:
Guꞌa didzaꞌ yuguꞌ le gunaꞌ lsaquiꞌ.
Gniaꞌ yuguꞌ le nagachiꞌ catiꞌ niꞌ gzu lau ziꞌa gutaꞌ yödzlyú.
Rguixjöꞌë Jesús le benëꞌ lsaquiꞌ qui guíxiꞌdauꞌ xöhuiꞌ naláꞌ ca nac yöl zxoaꞌ xtil
36 Niꞌr buzeynëꞌ bunách nacuáꞌ niꞌ didzaꞌ Jesús, busölëꞌë lequëꞌ, atiꞌ gyaziëꞌ yuꞌu. Niꞌr guladxinëꞌ ga zoëꞌ bönniꞌ usë́d queëꞌ len tëꞌ Lëꞌ:
―Gdixjöiꞌ netuꞌ le rëꞌni gna lë naꞌ benuꞌ lsaquiꞌ qui guíxiꞌdauꞌ xöhuiꞌ naláꞌ ca nac yöl zxoaꞌ xtil.
37 Bubiꞌë didzaꞌ Jesús, rëꞌ lequëꞌ:
―Bönniꞌ razëꞌ xseydauꞌ dxiꞌa nacaꞌ nedaꞌ, Bönniꞌ Nuhuöaquëꞌ Gdu Bunách. 38 Laꞌ yël naꞌ nac yödzlyú ni, atiꞌ xseydauꞌ dxiꞌa naꞌ ruluíꞌ ca nacgac nup nababgac ga rna bëꞌë Dios. Guíxiꞌdauꞌ xöhuiꞌ naꞌ naláꞌ ca nac yöl zxoaꞌ xtil ruluíꞌ ca nacgac nup nacgac qui tuꞌ xöhuiꞌ. 39 Nu naꞌ curleꞌi dxiꞌa xan laꞌ yël naꞌ len yjöz guíxiꞌdauꞌ xöhuiꞌ naꞌ, tuꞌ xöhuiꞌcz nac. Dza lutubëꞌ naꞌ ruluíꞌ ca gac dza udx qui yödzlyú ni, atiꞌ nup naꞌ tuꞌtúb nacgac gbaz laꞌy queëꞌ Dios. 40 Ca naꞌ guc, gulutubëꞌ guíxiꞌdauꞌ xöhuiꞌ naꞌ, len guluzéguiꞌë lei lu guiꞌ, lëzcaꞌ cni gac catiꞌ udx qui yödzlyú ni. 41 Nedaꞌ, Bönniꞌ Nuhuöaquëꞌ Gdu Bunách, gsö́laꞌgacaꞌ‑nëꞌ gbaz laꞌy quiaꞌ, atiꞌ lubijëꞌ ga rna bëꞌë Dios yúguꞌtë nup tun ga tun dul‑laꞌ lzaꞌgac lencaꞌ nup tuaꞌ döꞌ. 42 Yuguꞌ gbaz laꞌy naꞌ laꞌguꞌë lu guiꞌ gabíl yuguꞌ bönniꞌ tuaꞌdöꞌ naꞌ. Niꞌ laꞌbödxëꞌ len lutíl‑l láyaꞌquëꞌ. 43 Niꞌr laꞌyë́p yös yeníꞌ bunách tsahuiꞌ, lacquëꞌ ca gbidz ga niꞌ rna bëꞌë Dios yehuaꞌ yubá. Nu zoa nag len ryöni ral‑laꞌ uzë́ nag.
Runëꞌ lsaquiꞌ Jesús qui tu yöl‑laꞌ tsahuiꞌ nagachiꞌ
44 Lëzcaꞌ cni benëꞌ lsaquiꞌ Jesús, rnëꞌ:
―Le rna bëꞌë Dios yehuaꞌ yubá nac ca tu yöl‑laꞌ tsahuiꞌ nagachiꞌ tu laꞌ yël. Catiꞌ budzölnëꞌ lei tu bönniꞌ, bucachëꞌë lei leyúbl ga naꞌ bgachiꞌ, atiꞌ lu yöl‑laꞌ rudziji queëꞌ gyijëꞌ, yjë́tiꞌë yúguꞌtë le dë queëꞌ atiꞌ guꞌuëꞌ laꞌ yël naꞌ quië gataꞌ queëꞌ yöl‑laꞌ tsahuiꞌ naꞌ.
Runëꞌ lsaquiꞌ Jesús qui tu bga záquiꞌtsqui
45 Gnëꞌ caꞌ Jesús:
―Ca ral‑laꞌ së ládxiꞌliꞌ le rna bëꞌë Dios yehuaꞌ yubá nac ca benëꞌ tu bönniꞌ raꞌuëꞌ len ruútiꞌë, rguiljëꞌ yuguꞌ bga dxiꞌa. 46 Catiꞌ bdzölnëꞌ tu bga záquiꞌtsqui, gyijëꞌ, yjë́tiꞌë yúguꞌtë le dë queëꞌ, atiꞌ guꞌuëꞌ bga naꞌ.
Runëꞌ lsaquiꞌ Jesús qui tu yöxj böl
47 Lëzcaꞌ cni gnëꞌ Jesús:
―Ca gac ga gdxin le rna bëꞌë Dios yehuaꞌ yubá, gac ca run tu yöxj böl le taꞌchiljëꞌ bönniꞌ lu nis zxön, le rajxíꞌ zian böl gzaꞌa. 48 Catiꞌ chbdzaꞌ yöxj naꞌ, gulubijëꞌ lei luyú bidx raꞌ nis zxön naꞌ, atiꞌ niꞌ gulaböꞌë len gulaguꞌë‑baꞌ lu bdöꞌa yuguꞌ böl dxiꞌa, san yuguꞌ böl caꞌz, gularuꞌnëꞌ‑baꞌ. 49 Lëzcaꞌ cni gac catiꞌ udx qui yödzlyú ni. Laꞌrujëꞌ gbaz laꞌy queëꞌ Dios atiꞌ lubijëꞌ quizi bunách tsahuiꞌ, lucuitiëꞌ lequëꞌ ladj bunách tuaꞌdöꞌ.
50 ’Niꞌr laꞌguꞌë lu guiꞌ gabíl bunách tuaꞌdöꞌ naꞌ. Niꞌ laꞌbödxëꞌ len lutíl‑l láyaꞌquëꞌ.
Yöl‑laꞌ tsahuiꞌ le nac gul len le nac cub
51 Niꞌr Jesús gnabnëꞌ yuguꞌ bönniꞌ usë́d queëꞌ, rnëꞌ:
―¿I réjniꞌliꞌ yúguꞌtë lë ni?
Gulubiꞌë didzaꞌ, tëꞌ Lëꞌ:
―Ja, Xan.
52 Jesús gudxëꞌ lequëꞌ:
―Catiꞌ chnazíꞌ lu nëꞌë bönniꞌ gdauꞌ usëdi le rna bëꞌë Dios yehuaꞌ yubá, naquëꞌ ca bönniꞌ xan yuꞌu, rbijëꞌ ladj yöl‑laꞌ tsahuiꞌ queëꞌ le nac cub len le nac gul, le nacgac dxiꞌa, ruziꞌë xbey.
Le benëꞌ Jesús yödz Nazaret
53 Catiꞌ budx benëꞌ yuguꞌ lsaquiꞌ ni Jesús, buzë́ꞌë niꞌ. 54 Catiꞌ budxinëꞌ ladzëꞌ, busëdnëꞌ bunách nacuáꞌ lu yuꞌu ga tuꞌdubëꞌ tuꞌsëdëꞌ queëꞌ Dios bönniꞌ judío, atiꞌ gulubannëꞌ, taꞌnë́ꞌ:
―¿Gazxcz bzëdnëꞌ yöl‑laꞌ rejniꞌi ni bönniꞌ ni? ¿Nacxcz nac, runëꞌ yuguꞌ yöl‑laꞌ huac ni? 55 Naquëꞌ bönniꞌ ni zxiꞌnëꞌ bönniꞌ bëdx yag, atiꞌ lënu María xnëꞌë. Naquëꞌ bö́chiꞌquëꞌ Jacobo len José len Simón len Judas. 56 Lëzcaꞌ nacuáꞌlennu rëꞌu ni ngul zanëꞌ. ¿Gazxcz bzëdnëꞌ yúguꞌtë lë ni?
57 Qui lë ni naꞌ glac chop ládxiꞌquëꞌ, gulucaꞌnëꞌ Lëꞌ. Niꞌr Jesús gudxëꞌ lequëꞌ:
―Tun ba laꞌn bönniꞌ ruꞌë didzaꞌ uláz queëꞌ Dios yúguꞌtë bunách, san cutu tun lëꞌ ba laꞌn bunách uládz queëꞌ len bunách nacuáꞌ lidxëꞌ.
58 Qui lë ni naꞌ cutu benëꞌ Jesús niꞌ zian yöl‑laꞌ huac, le cutu taꞌyejlëꞌë Lëꞌ.
<- San Mateo 12San Mateo 14 ->