1 Anzir de ru na der gal nu na mbecy gut nu nac de cyi gal nu de coz a̱ꞌ nap nu ricy der. 2 Zaab ricy la der de cyi zeꞌ lat nu bicy der gal nu ricy cyu ziꞌl mbecy nu yuꞌ gyishlombecy ii, nunu lat nu bicy der coz nu rlagy nuras, yu nu riib ic de yu a̱ꞌ nap nu rded lo bi, yu nu rbic baloor ni de mbecy nu wacsuub gyidag ni Ñgyoozh. 3 Gazaꞌ de ub na guꞌ den mod ni de yu zeꞌ tub tiem par ich. Bicy den coz nu rlagy ub ziꞌl na. “O” mnii den ni de coz cyi nu druu nañ lardoon, nu de coz a̱ꞌ nap nu druu nañ shcab ni den. Ndeꞌ nu yad ñi nu cuic Ñgyoozh cashtig ily ni den gal nu cuic mi ni deꞌ zir de mbecy. 4 Tees Ñgyoozh nac mi tub biñ nu tonaꞌ la rashni lagy nunu tonaꞌ la rcaa lagy mi de ub na. 5 Gulas de ub na na den gal nu na mbecy gut nu nac de cyi nu bicy na. Tees tiem zeꞌ gal nu bicy Ñgyoozh nu byabañ Crisht, niꞌ ziꞌl bicy mi nu byabañ de ub na. Nu nac faboor nu ricy nu Ñgyoozh de ub na, ndeꞌ nu gruu mbañ den. 6 Orzeꞌ Ñgyoozh gyicy mi nu gyabañ den tublaazh la nu Crisht, gun orzeꞌ gzub dun mi gyibaa. Ni gyicy num der nu nac Jesucrisht. 7 Ni bicy mi gun orzeꞌ par lo gad lagy den nu tonaꞌ la coz ily de faboor nim. Rad lagy na ndeꞌ nu nac nu pcam de ub na nu nac Jesucrisht. 8 Gun Ñgyoozh bicy mi tub faboor num den nu bloo mbañ mi den nu nac nu ricy cup den consuel lo Crisht. Walab nu ni bicy mi nu nac de coz nu de ub na bicy na, sinu ndeꞌ tub coz nu leew la bicy nu Ñgyoozh de ub na. 9 Walab nu nac de coz nap nu ricy den, ndeꞌ nu gruu mbañ naa. Ndeꞌ nu walagy ñi nu gyicy zily mbecy ub yu. 10 Gun de ub na nac naa mbecy nu psaꞌ lagy Ñgyoozh. Bicy cub mi den nu nac Jesucrisht, gun orzeꞌ gyicy den de coz nap nu bzu yem gulas nu gyicy den.

11 Ndeꞌ nu bicy der nu gyezaꞌ lagy ru nu gulas a̱ꞌ nac der mbecy ni Ñgyoozh. Guc der mbecy nu walab mbecy Israeel nu nac gyitoo bel ni der. De mbecy nu ca beey sircunsision cuerp ni mnii dey nu de ru nac der mbecy nu sac beey sircunsision cuerp ni. Tees coz nu rzat dey, ndeꞌ coz nu ricy dey nu cuerp ni ub ziꞌl yu. 12 Orzeꞌ bicy der nu gyezaꞌ lagy ru nu tiem zeꞌ a̱ꞌ nac der mbecy ni Crisht. A̱ꞌ nac der mbecy guledz Israeel. Nunu trat nu bicy Ñgyoozh nu de mbecy Israeel, ndeꞌ walab par de ru. Lat nu guꞌ der gyishlombecy ii, ni wangad lagy der cyu nac mi, nunu ni wancyish lo der nu cui mbañ ru. 13 Orzeꞌ ndeꞌ nu anzir nañ gal nu na nu zet zu der lo Ñgyoozh. Tees na nu nac Jesucrisht, nu nac nu pshu reñ mi, ndeꞌ nu byagaab der lo Ñgyoozh. 14 Gun Crisht bicy mi nu byanap yuꞌ den nu losaꞌn. Bicy mi nu de mbecy Israeel, gal nu de mbecy nu walab mbecy Israeel byac se tub nac ziꞌl den. Ptily mi bzaa nu bzu gazel den. 15 Orzeꞌ Crisht bicy mi nu byaꞌ lo de coz nu rnii leey ni de mbecy Israeel. Gun lo cyup nac mbecy bicy mi nu byac se tub nac ziꞌl mbecy cub nu nac ub mi. Ni mod bicy mi par nu chuꞌ gyel ri zu lat de mbecy. 16 Nu nac nu gut Crisht lo cruuz, ndeꞌ nu bzaꞌ lom de gyel chaꞌ ic nu yuꞌ lat rup nac la mbecy. Nunu nu nac nu gut mi lo cruuz, ndeꞌ nu lo cyup nac mbecy byac se tub nac ziꞌl yu, nunu bicy mi nu byanap yuꞌ dey nu Ñgyoozh.

17 Orzeꞌ Crisht biid num de riidz ni gyel ri zu lo dela mbecy: tant lo de ru nu na der gal nu na mbecy nu zet zu lo Ñgyoozh, gal nu lo de mbecy Israeel nu na gal nu na mbecy nu yuꞌ gaab lom. 18 Gun Espiriit Yon nim rbic mi nez nu gya rup nac la den par lo Ñgyoozh nu nac Crisht. 19 Ndeꞌ nu de ru a̱ꞌ nacaꞌ der mbecy yad, ni a̱ꞌ nacaꞌ der mbecy nu walab mbecy guledz, sinu nac der mbecy gyibaa nu deꞌ zir de mbecy ni Ñgyoozh. Bi nac der famil nim. 20 De ru na der gal nu na tub yuꞌ nu zub too tub simient. Zeꞌ simient zeꞌ, ndeꞌ de aposht gal nu de yu nu mnii por cuen ni Ñgyoozh. Nunu Jesucrisht nam gal nu na gyitaꞌ ni simient nu ricy zir ñi presis zeꞌ. 21 Mi zeꞌ biñ nu nac cyuub dutuub la cuerp ni yuꞌ zeꞌ. Bicy mi nu dela lugaar ni yuꞌ zeꞌ nash ñii losaꞌñ. Orzeꞌ zaab rzup lañ gashtal gyac lañ tub yuꞌ yon nim. 22 Bicy mi nu gazaꞌ de ru nash losaꞌ der par nu gyac der tub yuꞌ nu rcyiiñ Ñgyoozh nu nac Espiriit Yon nim.

<- Efesios 1Efesios 3 ->