1 Na ornu wangagye̱e̱ de̱ nu ricy la añ ne̱ nu gzaca̱ der, orzeꞌ mnii to̱o̱ de̱ nu gyiyeeñ ga̱ de̱ ub zi̱ gyedz Atenas. 2 Orzeꞌ bzuu neza̱ biicy na Timoteo nu cyid yu lo der. Yu zeꞌ tub yu nu ricy riiñ ni Ñgyoozh ornu rshaal yu de riidz nap ni Crisht. Bzuu nez de̱ yu zeꞌ nu cyid güiiy der, gun locyuub yu de ru nu fert zir gyicy cup ru consuel lo Crisht, nunu cuic yu baloor ni der nu nac mi. 3 Gun orzeꞌ cueꞌ checa ni tub la der nu ricy cup ru consuel lo Crisht nu nac nu rzac zi der zeꞌ. Tees laab de ru rad lagy der nu rlagy ñi nu gzac den de coz zeꞌ. 4 Gun lat nu gabee rcyiiñ de̱ lat der, tiem bi mne̱e̱ de̱ lo der nu gzac zir, nunu de ru gud lagy der nu gal nu mne̱e̱, ni guuc ñi. 5 Ndeꞌ nu ornu ya̱ wangagye̱e̱ ga̱ꞌ, orzeꞌ bzuu neza̱ Timoteo nu biid yu lo der, gun orzeꞌ cugyiꞌy lo der ben a nap ricy cup der consuel lo Crisht. Gun ya̱ gudziba̱ nis yub nuras mod nu shiñ gyicy nuy de ru. Gun benu ni, orzeꞌ leew la bicy de̱ riiñ ni Ñgyoozh lat der.

6 Na Timoteo bi briy nu bruuy lo der. Bri nuy de raso̱o̱ nap nu ricy cup der consuel lo Crisht, nunu rca der losaꞌr. Mniiy nu dub laa tiem nap ca ic der nu nac de̱ ya̱. Nunu mniiy nu gal nu de̱ ya̱ rlagy de̱ nu gzaca̱ de ru, niꞌ ziꞌl de ru rlagy der nu gzac der de̱ ya̱. 7 Ndeꞌ nu der bicy na, de ru briic der baloor ne̱ de̱ lat nu deet bzac de̱, nunu bzac zi̱ de̱. Briic der baloor ne̱ de̱ nu nac nu dzi fert ricy cup der consuel lo Crisht. 8 Nunu nu nac nu fert ricy cup der consuel lo Shuaan den Jesuuz, ndeꞌ nu yet lagy de̱ yu̱ꞌ gyishlombecy ii.

9 Na tonaꞌ la dric de̱ gras ni Ñgyoozh nu nac de ru, nunu dric de̱ gras nim, gun ricy mi nu tonaꞌ la yet lagy de̱ nu nac der. 10 Dzi rel la rdiñ de̱ lom nu zaan mi nu yap güi̱i̱ de̱ der lo nu loo la. Orzeꞌ gric de̱ la ziꞌl coz nu gabee ricy falt ni der par nu gyafert zir gyicy cup der consuel lo Crisht.

11 Rlagy de̱ nu Ñgyoozh Uz den, gal nu Shuaan den Jesuuz locyuub mi de̱ ya̱ nu gad tub mod nu yap güi̱i̱ der. 12 Nunu rlagy de̱ nu gyicy Shuaan den Jesuuz nu dzi zir ca der losaꞌr gal nu dela deꞌ zir de mbecy. Rlagy de̱ nu ca der losaꞌr gal nu de̱ ya̱ rca̱ de̱ de ru. 13 Rlagy de̱ nu gyicy fert mi der nañ lardoor, nunu rlagy de̱ nu gac der mbecy cacy, gal nu mbecy nu sac falt ni par lo Ñgyoozh, Uz den, ornu cyid Shuaan den Jesucrisht tuubaꞌ tir nu dela mbecy nu nac nim. ¡Laab ni gac ñii!