Apocalipsis 5

Tuhbi chihbru cun nin naa Xiꞌhyi Dxiohs

1 Chiꞌchi naꞌh Jwahn bwaꞌhahn loh naa derehchu nin zohba loh yahgaxiiyi rooꞌ nin naa trono, nuu tuhbi dxihtsi nin biduꞌbi, caa lehtra loon cun nez dihtsin ya ñieꞌwun cun gahdzi sehyu, 2 chiꞌchi bwaꞌhahn loh tuhbi xaanjla Dxiohs nin nahpa zirooꞌ jweersi, chiꞌchi guñiꞌ jweersi aanjla chi rahbi ba:

―¿Chyu niꞌca ruhnn tucahri guxaala loh dxihtsi riiꞌ nee chiꞌllu za niꞌchi sehyu nin caa loh dxihtsi riiꞌ?

3 Per nin llaaꞌndxibaaꞌ nin loh guidxyiyuh ayi bidxeela nin ñuxaala loh dxihtsi chi o mas ñwaꞌha si ba loh dxihtsi chi, 4 chiꞌchi guzoꞌbaloh ruꞌn duuxaꞌhn laasii ayi bidxeela nin tuhbi nin ruhnn tucahri ñixaala loh dxihtsi chi tin ñuꞌlda ba loh dxihtsi chi, o mas ñwaꞌha za ba loh dxihtsi chi, 5 chiꞌchi guñiꞌ tuhbi bwiinn guuhla loon, nah ba:

―Ayi ru guꞌn luꞌh; laꞌh bweꞌdzi nin naa xahgadoꞌ guehtu Judah cun xahgadoꞌ guehtu Davihd, laꞌh Ñiꞌh bwiꞌhnn gahn loh guelguhchi niꞌchin nnah laꞌh Ñiꞌh ruhnn tucahri guxaala loh dxihtsi ca cun chiꞌllu Ñiꞌh gagaadzi sehyu nin caa dihtsi ca.

6 Ya chiꞌchi galaayi yahgaxiiyi rooꞌ nin naa tronu cun nez loh raꞌ gadaapa raꞌ maan raꞌ nin rii gadiidxi tronu chi cun galaayi bwiinn guuhla raꞌ, bwaꞌhahn zuu tuhbi nin naa Xiꞌhyi Dxiohs, nicala rluuꞌyi sehn raꞌ nin guhchi Ñiꞌh ziga lliꞌhyi nin rbahchi guhn raꞌ bwiinn loh Dxiohs; zohba gahdzi xcahchu Ñiꞌh neezaa nuu gahdzi baꞌloh Ñiꞌh nin naa gahdzi Spíritu xteenn Dxiohs nin ruxeꞌhla Ñiꞌh nez gaduhbitiiꞌ loh guidxyiyuh, 7 ya chiꞌchi gwabiiga Ñiꞌh tin gucaꞌha Ñiꞌh dxihtsi chi lahdu derehchu naa nin zohba loh yahgaxiiyi rooꞌ nin naa tronu nez dxibaaꞌ. 8 Ya chin guyaꞌloh gunaꞌzu Ñiꞌh chihbru chi, chiꞌchi gadaapa maan nin rii hasta zohba yahgaxiiyi rooꞌ dxibaaꞌ cun gagaldabi tapa raꞌ bwiinn guuhla bazuꞌnllihbi raꞌ ba nez delanta loh Xiꞌhyi Dxiohs, tin tuhbigah raꞌ bwiinn guuhla chi nuu tuhbigah harpa naa raꞌ ba nee cun dxiꞌba ohro raꞌ nin naa ziga bisihn guxaꞌhla, ya guxaꞌhla riiꞌ naa guelrbwihdxyi-guelrnaaba xteenn raꞌ garaa raꞌ xpwiinn Dxiohs laꞌh Ñiꞌh, 9 ya cayuꞌlda za raꞌ ba tuhbi dxyiꞌdxyi cuubi nin rahbi raꞌ ba squiiꞌ:

Lasahca duxa Yuꞌbiluꞌh pur nin gunaꞌzu luꞌhn, nee laasii Yuꞌbi za luꞌh naa luꞌh nin guhchi loh cruhzi,

ya cun llarihn luꞌh gudxihlli luꞌh xcweenta bwiinn raꞌ nin naa xpwiinn Dxiohs.

Bwiinn garaa lahta raꞌ nin rñiꞌ guriin-guriin dxyiꞌzah, bwiinn nin naa raꞌ guriin-guriin guihdxyi cun nin rii raꞌ guriin-guriin lahdxyi bwiinn,

10 nee badiꞌhi luꞌh gaca raꞌ ba rrehyi cun bixohza nez loh Dxiohs,

ya guinabwaꞌ raꞌ ba nez loh raꞌ bwiinn guidxyiyuh.

11 Ya chiꞌchi bwaꞌhahn, nee bihnaꞌhn rsiaaꞌha ziga cañiꞌ ziahan rooꞌ raꞌ aanjla gadiidxi hasta zohba yahgaxiiyi rooꞌ dxibaaꞌ hasta bwih nin rnabwaꞌ nez dxibaaꞌ, neezaa rsiaaꞌha gadaapa raꞌ maan raꞌ nin rii hasta zohba yahgaxiiyi rooꞌ llaaꞌndxibaaꞌ chi, neezaa rsiaaꞌha raꞌ bwiinn guuhla, per nin ayi za nuu guilaaba raꞌ xaanjla Dxiohs nin riiꞌ riꞌchi laasii ziahan duxa naa raꞌ ba, pur miyohn naa raꞌ ba, 12 ya jweersi rooꞌ cañiꞌ raꞌ ba squiiꞌ:

Lasahca duxa Xiꞌhyi Dxiohs nin guhchi loh cruhzi, niꞌchi caꞌha Ñiꞌh guelrnabwaꞌ duxa cun guelrahpa duxa,

cun guelnaann duxa, guel milahgru;

neezaa gachidiꞌhnn lasahca nuꞌh lah Ñiꞌh, gazuꞌnllihbi nuꞌh nez loh Ñiꞌh gaann nuꞌh Ñiꞌh,

gadiꞌhi za nuꞌh guelzuxchiilli loh Ñiꞌh.

13 Chiꞌchi bihn dxiaagahn rsiaaꞌha garaa raꞌ nin gulahchixchih Dxiohs nez dxibaaꞌ cun loh guidxyiyuh nee cun laꞌn gueeta loh guidxyiyuh nee cun loh ñihsadoꞌ, bihn dxiaagahn cañiꞌ raꞌ niꞌchi squiiꞌ:

Nin zohba loh yahgaxiiyi nin naa trohnu dxibaaꞌ,

neezaa loh nin naa Xiꞌhyi Dxiohs, laꞌh chiꞌh zi Ñiꞌh lasahca duxa Ñiꞌh,

gachidiꞌhnn lasahca nuꞌh laꞌh Ñiꞌh, gazuꞌnllihbi nuꞌh nez loh Ñiꞌh laꞌh za Ñiꞌh gaann nuꞌh,

nee gahbi za nuꞌh barnabwaꞌ Ñiꞌh par tuꞌpazi.

14 Ya gadaapa raꞌ maan raꞌ nin rii hasta zohba yahgaxiiyi xteenn Dxiohs nez dxibaaꞌ rahbi raꞌ squiiꞌ:

Ziꞌchi gaca, pwihsi.

Ya gagalda bitapa raꞌ bwiinn guuhla bazuꞌnllihbi raꞌ nez loh nin ba nabahan par tuꞌpazi, tin gaann raꞌ ba laꞌh Ñiꞌh.

<- Apocalipsis 4 Apocalipsis 6 ->