1 Chiꞌchi bwaꞌhahn loh stuhbi xaanjla Dxiohs nin nahpa guelrnabwaꞌ duxa zieꞌyehta aanjla chi nez llaaꞌndxibaaꞌ, duꞌbi aanjla chi xcahyi nee neezaa tuhbi guundzihin biinloh nez yihca aanjla chi, ya loh aanjla chi rcahbachaꞌhan ziga zi loh gubihdxyi, ya ñaaꞌ aanjla chi rñah ziga zi piyahri raꞌ nin naa bwehla. 2 Ya nuu tuhbi chihbruꞌhn naa aanjla chi zohballaala loh chihbru chi, ya bazuh ñaaꞌ aanjla chi nin naa lahdu derehchu loh ñihsadoꞌ ya ñaaꞌ rrabwehsa aanjla chi guzuh loh guidxyiyuh, 3 ya chiꞌchi guyuuꞌ tuhbi rsiaaꞌha gudihdxyidxiah aanjla chi ziga zi rsiaaꞌha xteenn tuhbi bweꞌdzi chin rbwihdxyidxiah ma, nee chiꞌchiza guñiꞌ gahdzi guziꞌw ziꞌchi cun gahnrooꞌ, 4 ya chin guluhlla guñiꞌ raꞌ guziꞌw raꞌ chi, chiꞌchi guclaaꞌdzihn ñucaꞌhn loh dxihtsi garaa nin guñiꞌ raꞌ guziꞌw raꞌ chi, per lwehgu gahca bihn dxiaagahn guñiꞌ tuhbi rsiaaꞌha nez llaaꞌndxibaaꞌ squiiꞌ loon:

―Guluꞌchaꞌyi ralaꞌn dxyiꞌdxyi raꞌ nin guñiꞌ gagaadzi raꞌ guziꞌw raꞌ riiꞌ stoꞌ luꞌh, ayi gucaꞌh luꞌhn loh dxihtsi.

5 Ya lwehgu laꞌh aanjla nin zuu ñaaꞌ ñiꞌh loh ñihsadoꞌ cun loh guidxyiyuh, guteesa naa derehchu aanjla chi nez llaaꞌndxibaaꞌ, 6 ya guñiꞌ chihpa aanjla chi nez loh Yuꞌbi Dxiohs nin ba nabahan par tuꞌpazi, nin bwiꞌhnnchaꞌyi guidxyiyuh dxibaaꞌ cun ñihsadoꞌ nee cun garaa raꞌ za nin rii nabahan loh raꞌn, squiiꞌ:

―Pwihsi ayi ru gacataꞌh raꞌ dxyih raꞌ riiꞌ. 7 Pwihsi chin gadzihn dxyih nin soꞌbaloh gusañiꞌ nin rahca gagaadzi aanjla cun trompeta, chiꞌchi ba soobaa raꞌ xchiꞌdxyi nagaꞌtsi Dxiohs nin baluuꞌyi Ñiꞌh laꞌh raꞌ guehtu daada raꞌ nin guñiꞌ xchiꞌdxyi Ñiꞌh ba guhca cadxyih rooꞌ.

8 Ya chiꞌchi laꞌh rsiaaꞌha nin bihn dxiaagahn, nee guñiꞌn loon nez dxibaaꞌ, chiꞌchi gubiaꞌgarii guñiꞌn loon squiiꞌ:

―Gwah tin gucaꞌha chihbruꞌhn nin nuu naa aanjla riꞌchi nin zuu ñaaꞌ ñiꞌh loh ñihsadoꞌ cun loh guidxyiyuh.

9 Chiꞌchi guyaaꞌhahn hasta zuu aanjla chi ya gunaꞌbaꞌhn guniꞌhi aanjla chi chihbruꞌhn chi naꞌh, ya squiiꞌ guñiꞌ aanjla chi loon:

―Laꞌn deeꞌ, gudahwun. Laꞌn rwaaꞌ luꞌh zahca nahxin ziga zi dzihn, per nez laꞌn lastoꞌ luꞌh ziahca naltaaꞌhan.

10 Chiꞌchi gucaꞌhahn chihbruꞌhn chi loh aanjla chi ya gudaawuhn chihbru chi; ya laꞌn rwaaꞌhahn biinaꞌhn nahxin, per ya loh nin gudaawuhn chihbru chi biahca naltaa chihbru chi stoꞌn, 11 ya chiꞌchi nah raꞌ ba loon squiiꞌ:

―Nnah nahpa guibiaꞌgarii luꞌh chegaluuꞌyi luꞌh dxyiꞌdxyi raꞌ nin rñiꞌ Dxiohs chuu ru gaca loh ziahan guihdxyi raꞌ bwiinn, cun lahdxyi raꞌ bwiinn, bwiinn nin rñiꞌ cuunchiꞌzi dxiꞌzah raꞌ, neezaa loh raꞌ rrehyi raꞌ.

<- Apocalipsis 9Apocalipsis 11 ->