1 Naꞌh Pahblu, nuuꞌhuhn laꞌn lahtsi dxiꞌba laasii pur xcweenta xchiꞌdxyi Jesucristu nin ruluꞌyiꞌhn. Naꞌh neezaa bwihtsi lasaaꞌ nuꞌh Timoteu ziga zoozah nuꞌh loh xchiꞌdxyi Jesucristu, racaꞌh nu dxihtsi riiꞌ loh luꞌh Filemohn, nin naa tuhbi bwihtsi lasaaꞌ nu loh xtsiꞌn Dxiohs. 2 Racaꞌh za nu dxihtsi riiꞌ loh Apia, nin naa bizaaꞌn nu loh guelriachii stoꞌ loh Jesucristu, cun laꞌh Arquipu nin naa tuhbi lasaaꞌ nu loh dziꞌn riiꞌ, nee cun loh za raꞌ bwiinn guidoꞌ raꞌ nin radiaaꞌha rwaaꞌ yihdzi luꞌh. 3 Dxiohs Xtaada nuꞌh nee laꞌh Daada Jesucristu gacanee laꞌhtu, nee guniꞌhi Ñiꞌh guelnasaa lastoꞌ tu.
Guelnazaꞌca stoꞌ nee cun guelriachii stoꞌ xteenn Filemohn
4 Guillii-guillii rudiꞌhihn guelzuxchiilli loh Dxiohs chin riagannastoꞌn yiꞌh loh nin cabwihdxyi-canaꞌbaꞌhn loh Dxiohs, 5 laasii bihnaꞌhn xa naa guelnadziiꞌhi xteenn luꞌh cun guelriachii stoꞌ xteenn luꞌh laꞌh Daada Jesucristu nee cun garaa raꞌ za nin naa xpwiinn Dxiohs. 6 Rnaꞌbaꞌhn loh Dxiohs tin chioo ru ziga nin riachii stoꞌ luꞌh gaduhbi nin cagaluuꞌyi luꞌh xchiꞌdxyi Dxiohs loh raꞌ snuhn bwiinn, tin ziꞌchi gadzihn gacabwaꞌ raꞌ ba loh raꞌ cohsa zaꞌca raꞌ nin nadxiaapa raꞌ nuꞌh pur xcweenta Jesucristu. 7 Pwihsi riahxi duuxaꞌhn cun riaꞌhan nasaa stoꞌn pur xcweenta luꞌh, laasii pur yiꞌh, bwiitsi lasaaꞌhahn, basagaꞌldiuh luꞌh cun bwiꞌhnn za luꞌh guridxyii lastoꞌ raꞌ lasaaꞌ raꞌ nuꞌh pur ziga rucaꞌh stoꞌ luꞌh laꞌh raꞌ ba.
Pahblu rnaaba loh Filemohn ayi guidxyiꞌchinee ba laꞌh Onésimu
8 Nicala naꞌpahn guelrnabwaꞌ xteenn Jesucristu zahca guiñiꞌn loh luꞌh guunn luꞌh xi chiꞌh zi nin nahpa guunn luꞌh, 9 yannah rnaꞌbaꞌhn loh luꞌh guunn luꞌh tuhbi dziꞌn zaꞌca, laasii naꞌh Pahblu naan nin nadziiꞌhi luꞌh ya bwiinn guuhlaꞌhn nee ñieꞌwꞌhn pur xcweenta Daada Jesucristu; 10 canaꞌbaꞌhn guunn luꞌh tuhbi bweniꞌhn para xcweenta Onésimu, nin naa ziga zi lliiꞌnahn, laasii gwachii stoꞌ bi xchiꞌdxyi Dxiohs nin baluꞌyiꞌhn laꞌh bi nnah nin ñieꞌwꞌhn laꞌn lahtsi dxiꞌba.
11 Galohyi, guhca bi tuhbi mooza nin ayi balluꞌyi para yiꞌh, per nnah zalluꞌyi bi laasii loh garoopa nuꞌh gaca bi mooza. 12 Pwihsi ruxeꞌhlaꞌhn bi nacuubi stuhbi ya chin gadzihn bi riꞌca, gaannloh luꞌh bi ziga zi laꞌh bi naa bi naꞌh. 13 Naꞌh xclaaꞌdzihn ñiaꞌhanee bi naꞌh riiꞌ xcweenta luꞌh, tin ñuhnn bi dziꞌn loon nnah nin ñieꞌwꞌhn laꞌn lahtsi dxiꞌba pur xcweenta xchiꞌdxyi Dxiohs, 14 per ayi xclaaꞌdzihn guꞌnnahn nin naa xigaaba sihn sino que nee cun xigaaba luꞌh, tin ziga nin guunn luꞌh tuhbi bweniꞌhn naꞌh ayi gacan cun lajweersi sino que cun pur xigaaba xteenn luꞌh. 15 Pwehda gusahcariin luꞌh pur laꞌh Onésimu loh paaldaa dxyih nin ayi bwaꞌha luꞌh loh bi, per yannah rcaꞌha luꞌh bi tin chuu bi loh luꞌh stuhbi para tuꞌpazi, 16 ya ayiru zigadxiꞌh mooza sino que nin lasahca ru loh tuhbi mooza, o sea ziga zi tuhbi bwihtsi bihda luꞌh; naꞌh rucaꞌh duxa stoꞌn laꞌh bi, per yiꞌh mahzi ru bacaꞌh stoꞌ luꞌh laꞌh bi nee ayi ziga zi tuhbi bwiinn si dxiꞌh sino que ziga bwihtsi paꞌh luꞌh nez loh xneziuh Jesucristu.
17 Pwihsi naꞌh, sidela riuꞌnbwaꞌ luꞌh naꞌh ziga tuhbi lasaaꞌ luꞌh loh xneziuh Jesucristu, bwaꞌha loh bi ziga zi naꞌh gahca. 18 Sidela xiilla batiꞌdxisuu bi loh luꞌh, o sidela nuzaꞌbi bi loh luꞌh xiilla, loon guñiꞌ ya naꞌh gadxiilliñin. 19 Naꞌh Pahblu cagacaꞌhn dxihtsi riiꞌ cun naaꞌhahn cun xlehtraꞌhn; naꞌh zidxiilliñin (tin ayiza guiñiꞌn loh luꞌh nuzaꞌbi luꞌh hasta yiꞌh gahca loon). 20 Pwihsi bwihtsi, bwiꞌhnn tuhbi bweniꞌhn riiꞌ naꞌh ziga tuhbi nin nadziiꞌhi gahca laꞌh Dxiohs; baguꞌnasaa stoꞌn ziga naa nuꞌh bwihtsi raꞌ nuꞌh loh Daada Jesucristu.
21 Rucaꞌhn dxihtsi riiꞌ loh luꞌh laasii rahcabwaꞌn zuzoꞌbadxiahga luꞌh xchiꞌdxyiꞌhn, nee zuhnn luꞌh hasta ziahan ru nin canaꞌbaꞌhn loh luꞌh. 22 Pwihsi ziꞌchi gahca za, bwiꞌhnn siguhra hasta dxiaꞌhanahn laasii cabweꞌzaꞌhn guluuꞌyi Dxiohs ziga nin canaaba tu loh Ñiꞌh, tin guunn Dxiohs para dxieꞌldaguiaꞌhahn cuun tu.
GuelrgahpaDxiohs xteenn Pahblu cun tuhbi guelruhnntaaꞌyi xteenn ba
23 Epafras, nin nuu ñieꞌwneꞌhn, ruxeꞌhla tuhbi guelrgahpaDxiohs loh tu. Nuu ñieꞌw nu pur xcweenta xchiꞌdxyi Jesucristu. 24 Marcu, Aristarcu, Demas, cun Lucas nin cayahcanee naꞌh loh dziꞌn riiꞌ; ruxeꞌhla raꞌ bi tuhbi guelrgahpaDxiohs para laꞌhtu.
