1 Biñiꞌniꞌhn raꞌ, gulgazoꞌbadxiahga xchiꞌdxyi xcuzahn tu pur xcweenta xchiꞌdxyi Jesucristu laasii squiiꞌ rgaꞌha guunn tu, 2 laasii squiiꞌ naa mweer dxyiꞌdxyi lehyi nin guzaꞌloh guniꞌhi guelnazaꞌca laꞌhtu: “Gulguiꞌhnn lasahca laꞌh xpah tu cun xmah tu, 3 tin ziꞌchi guibahan nasaa tu nee gaapaa za tu zirooꞌ guelnabahan loh guidxyiyuh riiꞌ.”
4 Ya laꞌhtu nin naa raꞌ daada raꞌ, ayi chiꞌhyi tu nez guidxyiꞌchi lliiꞌn tu, mas gulchiꞌhyi xa gusiꞌdxi tu laꞌh raꞌ bi cun gulguiñiꞌnee laꞌh raꞌ bi tin gaapaa raꞌ bi guelnadziiꞌhi xteenn Daada Jesucristu.
5 Laꞌhtu mooza raꞌ, gulgazoꞌbadxiahga xchiꞌdxyi bwiinn nin ruhnn tu xtsiꞌn raꞌ ñiꞌh; gulguiꞌhnnan cun gaduhbi guelnadoꞌlaadzi xteenn tu, nee gulcuuꞌ guelnadxyiꞌbi laꞌn lastoꞌ tu ziga tin ayi gadxeela tu cayaaꞌlla tu loh xtsiꞌn ballwaaꞌn tu mas gulguiꞌhnnan zigazi cayuhnn tu laꞌgahca xtsiꞌn Jesucristu. 6 Gulguiꞌhnn xtsiꞌn ba cun gaduhbi stoꞌ tu ayi chin zuu si dxiꞌh ba loh tu tin ayi para guunn si dxiꞌh dxiaꞌhan zaꞌca tu loh ba; maz gulguiꞌhnnan ziga guluuꞌyi naa paꞌh tu xpwiinn Jesucristu ziga cayuhnn tu cun gaduhbi stoꞌ tu ziga xclaaꞌdzi Dxiohs gaca. 7 Gulguiꞌhnn xtsiꞌn ba cun gaduhbi stoꞌ tu zigazi guluuꞌyi cayuhnn tu tuhbi dziꞌn nezloh Daada Jesucristu, ayi nezloh dxiꞌh tuhbi ndxiꞌhw, 8 laasii banaann tu cada tuhbigah tu nicala naa tu bwiinn nin gudooꞌ loh dziꞌn o bwiinn nin ayi gudooꞌ loh dziꞌn, zicaꞌha ba loh Daada Jesucristu ziga naa xcweenta dziꞌn zaꞌca nin bwiꞌhnn ba.
9 Ya laꞌhtu nin naa raꞌ ziga ballwaaꞌn raꞌ, gulgahca nadoꞌlaadzi za nezloh raꞌ xmooza tu nee ayi gusaꞌcazii tu laꞌh raꞌ xmooza tu laasii banaann tu laꞌhtu cun laꞌh raꞌ ba nacweenta tu ziga mooza gahca nezloh Daada Jesucristu nin nuu dxibaaꞌ laasii laꞌh Ñiꞌh ayi ruhnn Ñiꞌh guriin-guriin nezloh cada tuhbigah bwiinn.
Nin rulaloh laꞌh raꞌ xpwiinn Jesucristu loh xiichiꞌhzi
10 Yannah bwiitsi raꞌn, gulgahca bwiinn nadxiipalaaꞌdzi loh guelrahcanee xteenn Daada Jesucristu pur xcweenta guelrnabwaꞌ rooꞌ nin nahpa Ñiꞌh. 11 Gulgahcu ziga lahdxi dxiꞌba xteenn Dxiohs nin gulaloh laꞌhtu, tin ziꞌchi guunn tu gahn gutiꞌdxiloh tu loh garaa raꞌ guelrusaguiꞌhi xteenn bwiinndxaaba, 12 laasii ayi chyu cadxihndxinee laꞌh tuhbi bwiinn nin caa bweꞌhla cun nin nuu dzihta, sino que dxudxihndxinee nuꞌh laꞌh spíritu raꞌ nin naa raꞌ ziga bwih nin zaꞌbi nezloh bwih nez llaaꞌndxibaaꞌ nin caꞌha guelrnabwaꞌ cun nin caꞌha guelguxchisi, cun nin rnabwaꞌ raꞌ za loh guidxyiyuh nacahyi riiꞌ, nee cun neezaa nin nahpa guelrnabwaꞌ nezloh bwih gadiidxi guidxyiyuh. 13 Pwihsi niꞌchin gulcuꞌguihn gacu tu zigazi tuhbi lahdxi dxiꞌba nin gulaloh gaduhbi tihxi tu nin naa xteenn Dxiohs, tin ziꞌchi zahca gutiꞌdxiloh tu loh garaa raꞌ dxyih dxaaba raꞌ tin chin ba batiꞌdxiloh tu loh dxyih raꞌ chi zahca suh dziꞌtsi tu. 14 Gulsudziꞌtsi pwihsi loh ganaalla nin naa nanchii paꞌh, nee gulgaca nayaatiiꞌ loh dxyiꞌdxyi nanchii. 15 Gulcwihnasiin, pwihsi, tin guzee tu chegaluuꞌyi tu xchiꞌdxyi Jesucristu nin rbahchidxyii lastoꞌ raꞌ bwiinn, 16 laasii guelriachiistoꞌ tu gaca ziga nin suu caa loh raꞌ bahza raꞌ nin zohba bwehla yihca raꞌ ñiꞌh nin naa xteenn bwiinndxaaba. 17 Pwihsi nin gulaꞌloh loh xigaaba tu naa naann paꞌh tu gulaꞌh tu loh duhlda, ya xchiꞌdxyi Dxiohs naa ziga tuhbi spahda nin runiꞌhi Spíritu Saantu laꞌhtu. 18 Pwihsi ayi gusaaꞌn tu ziga cwiidxyi-guinaaba tu loh Dxiohs garaa dxyih cun guelrahcanee xteenn Spíritu Saantu, nee gulgahca nasiin cun ayi guiriaꞌhgahn tu, nee gulcwihdxyi-gulguinaaba pur xcweenta garaa raꞌ xpwiinn guidoꞌ Dxiohs. 19 Gulguinaaba za loh Dxiohs pur xcweeꞌntahn tin ziꞌchi guniꞌhi Dxiohs dxyiꞌdxyi nin guiñiꞌn nee tin ayi guidxyihbihn guiñiꞌn dxyiꞌdxyi nagaꞌtsi xteenn Jesucristu. 20 Dxiohs guxeꞌhla naꞌh tin guluꞌyiꞌhn dxyiꞌdxyi riiꞌ, nee pur xcweentan nin nuuñieꞌwꞌhn nnah. Gulguinaaba loh Dxiohs tin ziꞌchi guiñiꞌn dxyiꞌdxyi riiꞌ sin ayi guidxyihbihn, nee guigaꞌha guiñiꞌñin.
Lulchima guelrgahpa Dxiohs
21 Tíquicu, nin naa bwihtsi dziꞌtsi nuꞌh loh xcweenta Jesucristu, nee nanchii naa xigaaba bi loh xtsiꞌn Daada Jesucristu; laꞌhbi dxiꞌ bi tin guuyidxyiꞌdxyi bi loh tu cweenta ziga cazaꞌcaꞌhn. 22 Pwihsi niꞌchin guixeꞌhlaꞌhn bi para laꞌhtu tin nnaa bi loh tu xa dxuu nu tin ziꞌchi cuꞌguiꞌw bi lastoꞌ tu.
23 Daada Dxiohs nee cun Daada Jesucristu guniꞌhi guelridxyiistoꞌ cun guelrucaꞌhstoꞌ lasaaꞌ nee cun guelriachiistoꞌ laꞌhtu nin naa raꞌ bwihtsi lasaaꞌ raꞌ nuꞌh loh Jesucristu. 24 Ya zuhnntaaꞌyi Ñiꞌh yihca tu garaatiiꞌ tu nin zeezahdziꞌtsi rucaꞌhstoꞌ laꞌh Daada Jesucristu. Ziꞌchi gaca pwihsi.
