1 Ya yiꞌh lliiꞌnahn, banaann nuꞌh rahcanee Dxiohs laꞌh garaa raꞌ nin nuu tuhsi nezloh Jesucristu, niꞌchin guzuhchihpa loh nin rahcanee Ñiꞌh yiꞌh. 2 Dxyiꞌdxyi raꞌ nin babihndxiahga luꞌh guñiꞌn loh ziahan raꞌ bwiinn, laꞌgahca dxyiꞌdxyi raꞌ chi guñiꞌ loh raꞌ bwiinn raꞌ nin riachii stoꞌ ñiꞌh tin zahca guluuꞌyi raꞌ za ba dxyiꞌdxyi ca loh snuhn raꞌ bwiinn. 3 Pwihsi yiꞌh, bazuhchihpa stoꞌ luꞌh gutiꞌdxiloh luꞌh loh guelrzaꞌcazii ziga tuhbi suldahdu xteenn Jesucristu. 4 Ayi tuhbi suldahdu nin guunn gahca dziꞌn nin bwiꞌhnn ba chin nagahdxi gaca ba suldahdu, sino que ruhnn ba xtsiꞌn bwiinn nin gulii laꞌh ba naa ba suldahdu tin ziꞌchi ruzoꞌbadxiahga ba xchiꞌdxyi nin gulii laꞌh ba. 5 Ziꞌchi gaca za, nin rdzihta ayi nuu xi guicaꞌha ba sidela laꞌh ba ayi tsita zaꞌca ba ziga nahpa tsita ba. 6 Nee bwiinn nin ruhnn dziꞌn loh dahan dela xclaaꞌdzi ba gutiaaꞌha ba liꞌhn nahpa galoh gunnee ba loh xuh ba dziꞌn gusiaa ban. 7 Bwiꞌhnn lligaaba pur nin cañiꞌn loh luꞌh, ya laꞌh Daada Jesucristu guunn nasiin yiꞌh tin gacabwaꞌ luꞌh garaatiiꞌ.
8 Bazaꞌstoꞌ luꞌh laꞌh Jesucristu, nin babahn loh guelguhchi nee naa Ñiꞌh llahga guehtu Davihd. Deeꞌ naa xchiꞌdxyi Dxiohs nin rusiaꞌpitii duhlda ziga nin ruluꞌyiꞌhn, 9 ya pur xchiꞌdxyi Dxiohs riiꞌ cazaꞌcaziin hasta lahtsi dxiꞌba nuuꞌhuhn ziga zi tuhbi gubaꞌn, per xchiꞌdxyi Dxiohs ayi ñieꞌwun lahtsi dxiꞌba. 10 Pwihsi niꞌchin cazaꞌcaziin tin gacanee raꞌn bwiinn raꞌ nin gulii Dxiohs tin neezaa raꞌ ba chechiistoꞌ raꞌ ba xchiꞌdxyi Ñiꞌh tin guibahan raꞌ ba loh llaꞌñih xteenn Jesucristu para tuꞌpazi. 11 Guchii duxa naa dxyiꞌdxyi raꞌ riiꞌ:
14 Basazaꞌstoꞌ bwiinn raꞌ dxyiꞌdxyi raꞌ riiꞌ; gunabwaꞌ loh raꞌ ba pur lah Daada Jesucristu ayi childxineedxyiꞌdxyi raꞌ ba pur xiilla tuhbi dxyiꞌdxyi laasii lasaaꞌ dxyiꞌdxyi raꞌ riiꞌ ayi xi guilasahca raꞌn, sola nin ruhnnan ruxiꞌnzin loh xigaaba raꞌ nin rucaꞌdxiahga raꞌn. 15 Bazuhchihpa stoꞌ luꞌh tin gadzihn luꞌh loh Dxiohs ziga tuhbi bwiinn nin ruhnn zaꞌca dziꞌn, nin ayi chuu xi pur gatuhyi loh luꞌh laasii xnehza ruluuꞌyi luꞌh xchiꞌdxyi guchii xteenn Dxiohs. 16 Guleꞌhestoꞌ luꞌh dxyiꞌdxyi rñiꞌyah raꞌ, neezaa ziahan dxyiꞌdxyi raꞌ nin ayi xi galluꞌyi raꞌ laasii nin zohba dxyiꞌdxyi dxaaba raꞌ riiꞌ rwaaꞌ raꞌ ñiꞌh chin rñiꞌ raꞌ ban mahzi ru zezaꞌbi raꞌ ba loh duhlda, 17 ya lligaaba raꞌ nin nuu loh dxyiꞌdxyi raꞌ chi rlliiꞌdzi raꞌn ziga tuhbi gueldxyihdxyi duxa nin ruxiꞌntiiꞌ tihxi bwiinn. Deeꞌ nin cazahca Himeneu cun Filetu 18 pur nin bañihchi raꞌ ba loh dxyiꞌdxyi guchii; cañiꞌ raꞌ ba laꞌh ziga gabahan raꞌ bwiinn loh guelguhchi gudiiꞌdxi la, ziꞌchi cayuhnn raꞌ ba cariaꞌgahn raꞌ paaldaa bwiinn loh xchiꞌdxyi Dxiohs. 19 Per Dxiohs laꞌh Ñiꞌh bazuh tuhbi dxiah nin baguzuh, nin caa tuhbi dxyiꞌdxyi nin rñiꞌ: “Laꞌh Daada Dxiohs nuꞌnbwaꞌ Ñiꞌh bwiinn raꞌ nin naa xpwiinn Ñiꞌh”, nee caa za: “Nahpa chyu guiriaꞌcaa loh nin ayi naa xnehza garaa raꞌ nin guchii paꞌh naa xpwiinn Daada Jesucristu.”
20 Ziga tuhbi yuuꞌ rooꞌ, ayi ganaalla si dxiꞌh nin guhcachaꞌyi cun ohro raꞌ cun plata raꞌ dxiꞌh rii raꞌn laasii neezaa rii raꞌ nin guhcachaꞌyi raꞌ cun yahga raꞌ cun nin guhcachaꞌyi cun yuh raꞌ, ya paaldaa raꞌn naa nin xchiꞌhn loh si tuhbi lañih ya nuu raꞌ nin rahca dziꞌn laꞌn raꞌ ñiꞌh garaatiiꞌ dxyih raꞌ. 21 Ziꞌchi gahca tuhbi bwiinn nin xclaaꞌdzi guunn tuhbi dziꞌn rooꞌ xteenn Dxiohs, nahpa guiriaꞌcaa ba loh xichiꞌhzi nin ayi xi guilasahca, ya zahcanee Daada Jesucristu laꞌh ba tin guunn ba dziꞌn rooꞌ xteenn Ñiꞌh.
22 Biriaꞌcaa loh garaalohtiiꞌ raꞌ dziꞌn dxaaba raꞌ nin ruhnn raꞌ bwiinn; gwazahnee guelnabahan nayaa, gwachiistoꞌ luꞌh laꞌh Dxiohs cun guntsiiꞌhi laꞌh bwiinn nee gudxiꞌhyi dxyiriistoꞌ luꞌh cun garaa raꞌ bwiinn, tin gaca luꞌh tuhsi cun laꞌh raꞌ nin ruhnn xtsiꞌn Dxiohs nayaa lastoꞌ raꞌ ba rbwihdxyi-rnaaba raꞌ ba loh Ñiꞌh. 23 Ayi gucaꞌdxiahga luꞌh dxyiꞌdxyi nin ruluuꞌyi raꞌ bwiinn guidxyiyuh, laasii naann luꞌh dxyiꞌdxyi raꞌ ca ruhnn rdxihndxinee raꞌ bwiinn lasaaꞌ raꞌ ba, 24 laasii tuhbi mooza xteenn Daada nin nuu dxibaaꞌ ayi nuu guchaꞌga raꞌ ba bwiinn raꞌ nin naa bwiinn dxixiꞌhw, neezaa nahpa gaca ba bwiinn zaꞌca cun chyuchiꞌhzi bwiinn. Nahpa za gaca ba tuhbi bwiinn nin ruluuꞌyi zaꞌca, nee nahpa chipastoꞌ za ba chin ayi xnehza dxiꞌh ruhnnee bwiinn laꞌh ba, 25 ya cun gaduhbi guelnadoꞌlaadzi xteenn luꞌh guluuꞌyi luꞌh laꞌh raꞌ bwiinn raꞌ nin rdxyiꞌchinee yiꞌh pur dxyiꞌdxyi nin ruluuꞌyi luꞌh; cweeza luꞌh Dxiohs guchaꞌh xigaaba ba tin Dxiohs guunn gacabwaꞌ ba dxyiꞌdxyi guchii xteenn Ñiꞌh, 26 tin dxiaꞌñih loh xquelrihn raꞌ ba tin taꞌh raꞌ ba laꞌn naa bwiinndxaaba, tin guunn raꞌ ba nin xclaaꞌdzi Dxiohs.
