1 Ayica riiꞌ gahn ziga chyu guiñiꞌ zaꞌca ziga xcweenta gahca raꞌ nu, mas guiñiꞌn xcweenta bacaꞌlda neezaa xcweenta bihsi nin basagwaꞌha Dxiohs naꞌh. 2 Nuꞌnbwaꞌn tuhbi ndxiꞌhw nin riachii stoꞌ ñiꞌh xchiꞌdxyi Jesucristu, nin baguhca tsiꞌdah yihza gwah hastayi naa nin riohnna dxibaaꞌ. Ayi gaꞌnnahn gu cun gaduhbi ziga naa tihxi ba gwah ba, o ganaalla xaalma ba gwah; sola Dxiohs naann. 3 Dxiohs chiꞌh zi naann gu gaduhbi tihxi ndxiꞌhw chi o ganaalla xaalma ba, sola laꞌh chiꞌh zi Ñiꞌh naann Ñiꞌh. 4 Gwah ba hasta naa lahdxyi Dxiohs nin nabahan dziꞌtsi dxibaaꞌ hasta bihn ba dxyiꞌdxyi raꞌ nin ayi nuu guuyidxyiꞌdxyi ba loh raꞌ bwiinn. 5 Naꞌh ñahca nayaachi stoꞌn xcweenta ziga ndxiꞌhw chi, per ayi nuu guelnnayaachi stoꞌn pur xcwenta gahcan. ¿Xa guiñiꞌ chiꞌhn dxyiꞌdxyi nin ayi naa guelsiisii xteꞌnnahn? 6 Per sidela naꞌh xclaaꞌdzihn guiñiꞌ zaꞌcaꞌhn pur xcweeꞌntahn, niꞌchi nin ayi gacan dxyiꞌdxyi nin riagadziiba zi yiꞌcahn, laasii naꞌh cañiꞌn pur dxyiꞌdxyi nin naa guchii; per ayi cayuhnn dxiꞌhñin tin para guunn bwiinn lligaaba mahzi ru bwiinn lasahcaruhn loh nin rwaꞌhaloh tu ruꞌnnahn o nin rihn dxiahga tu rñiꞌn.

7 Bwiꞌhnn Dxiohs baluuꞌyiloh ziahan rooꞌ duxa raꞌ cohsa loon, per ayi pur niꞌchi dxiꞌh chuu guelnayaachi stoꞌn, sino que guzahca stoꞌn ziga zi nin gudiiꞌdxi tuhbi guihchii tihxi ñiꞌh pur xcweenta bwiinndxaaba nin laa Satanahs tin dxiaabaꞌhn loh guelrzaꞌcazii xteenn ba tin ayi gacaꞌhn ziga tuhbi bwiinn nin gaca lasahca. 8 Biohnnala bweelta laꞌn gunaaba loh Daada Jesucristu tin guziaꞌtii Ñiꞌh xcweenta guelrzaꞌcazii riiꞌ, 9 per nah Jesucristu loon squiiꞌ: “Guelrahcanee nin guniꞌhiꞌhn ayi xi dxiaꞌdxi luꞌh”, pwihsi niꞌchin nin naꞌh riahxiꞌhn naan bwiinn siisii tin ziꞌchi guluuꞌyiloh ru xquelrnabwaꞌ Jesucristu pur xcweeꞌntahn. 10 Pwihsi niꞌchin nin riahxiꞌhn pur guelsiisii nee riahxi zahn loh guelrñiꞌyah nin rñiꞌ raꞌ bwiinn pur naꞌh nee chin cachiꞌhnaꞌhn ziga garaaloh, nee neezaa chin rutiꞌdxiloon guelrzaꞌcazii pur xcweenta Jesucristu, laasii chin siisiitiiꞌhihn, chiꞌchi runiꞌhi Dxiohs mahzi ru guelnadxiipa cun guelnadaꞌn naꞌh.

11 Laꞌn guhca ziga tuhbi bwiinn nin bagaduhbi loh xigaaba ñiꞌh, per laꞌh gahca tu bwiꞌhnn tu guhca squiiꞌ, laasii laꞌhtu ruhnn tucahri ñiñiꞌ zaꞌca tu xcweeꞌntahn laasii ayi xi riaꞌdxiꞌhn nez loh raꞌ snuhn raꞌ bwiinn raꞌ nin naa raꞌ pooxtla nicala naꞌh ayi chyu naan. 12 Loh dziꞌn nin bwiꞌhnnaꞌhn cun paseensi nez loh tu, bwiꞌhnnañin ziga tuhbi nin guchii naa tuhbi pooxtla xteenn Jesucristu, laasii bwiꞌhnnañin cun milahgru raꞌ nee cun sehn raꞌ. 13 ¿Xi bwiꞌhnnaꞌhn loh tu tin nah tu ruꞌnnahn lligaaba gulliaaꞌ lasahca tu que snuhn raꞌ xpwiinn guidoꞌ Jesucristu? Nin bwiꞌhnn chiꞌh zihn naa deeꞌ: ayi bataalahn xtsiꞌn tu, naann tu ayi xi gunaꞌbaꞌhn loh tu para ñahcanee tu naꞌh, ziga cumpahñu nin bwiꞌhnn raꞌ guriin raꞌ bwiinn guidoꞌ naꞌh. ¡Gulguiꞌhnn pardohn naꞌh pur nin ayi xi gunaꞌbaꞌhn loh tu!

14 Pwihsi nnah laꞌn caguꞌguihn tin gazaaꞌ chohnna bweelta nin rieꞌldaguiaꞌhahn cuun tu, nee ayi xi gutiꞌdxi dziꞌnaꞌhn laꞌhtu ziga guicaꞌhn nin nahpa tu, sino que laꞌhtu xclaaꞌdzihn tin cheezah zaꞌca tu loh xneziuh Dxiohs; laasii laꞌh daada raꞌ rguꞌchaꞌyi raꞌ mweeyi para laꞌh raꞌ lliiꞌn raꞌ ba ayi laꞌhgaꞌh dxiꞌh lliiꞌn ba cuꞌchaꞌyi mweeyi para laꞌh ba. 15 Ya naꞌh cun gaduhbi stoꞌn gunaann chiꞌhn cun gaxtu cun nin guichiꞌhnaꞌhn, nee hasta guunnzahn gaxtu naꞌh pur xaalma tu nicala rluuꞌyi mahzi ru rucaꞌh stoꞌn laꞌh tu per laꞌhtu gulliaaꞌ rucaꞌh stoꞌ tu naꞌh.

16 Per mahzi ziga ayi batiꞌdxi dziꞌnaꞌhn laꞌhtu, nicala nuu raꞌ nin cañiꞌ basaguiꞌhihn laꞌhtu laasii nadxeela laaꞌdzihn loh guelrsaguiꞌhi. 17 ¿Xa naa ziga rusaguiꞌhihn laꞌhtu? ¿Ta naan pur tuhbi raꞌ bwiinn raꞌ nin guxeꞌhlaꞌhn loh tu? 18 Chin guxeꞌhlaꞌhn Titu cun stuhbi bwihtsi lasaaꞌ raꞌ nuꞌh nin bieꞌguiaꞌha xa nuu tu, ¿ta basaguiꞌhi Titu laꞌhtu? ¿Tayi guchii dxiꞌhn garoopa nu tuhsi naa xigaaba nu nee tuhsi za xtsiꞌn nu?

19 Ya gaduhbi nin cayuꞌlda tu loh dxihtsi riiꞌ, pwehda cayuhnn tu lligaaba dxuugannaaba nu loh tu xa dxiaꞌlda stoꞌ tu xtuhlda nu, per ayi ziꞌchi dxiꞌh; dxuñiꞌ nu squiiꞌ nez delaanta loh Dxiohs nee cun lah Daada Jesucristu, tin ziꞌchi chioo ru tu loh xchiꞌdxyi Dxiohs, bwiitsi raꞌn nin nadziiꞌhiduuxaraꞌn, 20 laasii rdxyiibihn ziga chin cheguiaꞌhahn cuun tu, mas ayi rii tu ziga xclaaꞌdzihn nee naꞌh ayi za gwaꞌha tu naꞌh ziga xclaaꞌdzi tu. Rdxyiibihn chuu dxixiꞌhw, guelrzaꞌbi stoꞌ lasaaꞌ xixteenn ñiꞌh, llahn, guelrlaaꞌha lasaaꞌ, guelrñiꞌyah, bwiinn rsah dxyiꞌdxyi, cun nin ruhnn nayaachi raꞌ nin riahsa-rcaꞌnee laꞌh bwiinn lasaaꞌ ba. 21 Rdxyiibihn ayi nnagah loh dxieꞌldaguiaꞌhn cuun tu stuhbi, guunn Xchiohsaꞌhn para gaziꞌxtuhyiꞌhn nez loh tu, nee dxieꞌsuh za guꞌnaꞌhn xcweenta xtuhlda tu nin nuu ca chieempa laasii ayi riigasaaꞌn tu dziꞌn dxaaba raꞌ tin guibahan nayaa tu; sola nuu tu nin naꞌhla nez cayuhnn xtuꞌh gunnaꞌh nin ayi naa cheꞌhla tu cun ziahan ru raꞌ dziꞌn raꞌ nin ruhnn tu.

<- 2 Corintios 112 Corintios 13 ->