1 Bwiitsi raꞌn, ayi xclaaꞌdzihn dxiaꞌlda stoꞌ tu xcweenta ziga guzahca raꞌ guehtu xtaada guldooꞌ raꞌ nuꞌh; guzah raꞌ ba xpacaala tuhbi xcahyi, cun gudiiꞌdxi garaa raꞌ ba galaayi ñihsadoꞌ xñaa. 2 Pwihsi xcweenta ziga guzah raꞌ ba xpacaala xcahyi nee cun ziga gudiiꞌdxi raꞌ ba nez galaayi ñihsadoꞌ xñaa, niꞌchi guhca tuhbi guelrohbañihsa para laꞌh raꞌ ba laasii gwah naꞌhla raꞌ ba guehtu Moisehs. 3 Ziꞌchi gahca za garaa raꞌ ba naa nin gudahw tuhbiloh chiꞌh zi guelwahw nin bateta Dxiohs nez llaaꞌndxibaaꞌ. 4 Ziꞌchi gahca za garaa raꞌ ba gwaaꞌ raꞌ ba ñihsa tihxi dxiah rooꞌ laasii ayi ñihsa ñeeꞌ raꞌ ba, per Spíritu Crixtu guzahnee raꞌ ba nez chiꞌh zi gucaꞌnzaa raꞌ ba nez loh dahan desiertu, ya niꞌchin pur xquelrnabwaꞌ Ñiꞌh biriaꞌh ñihsa tihxi dxiah rooꞌ chi nin naa zigazi tihxi Ñiꞌh. 5 Per ya ziga guyuuꞌ llahn stoꞌ Dxiohs xcweenta ziahan raꞌ ba, niꞌchin ziahan raꞌ ba guhchi nez loh dahan desiertu.

6 Garaa raꞌ dxyiꞌdxyi raꞌ ca naa ziga tuhbi guelruuꞌyidxyiꞌdxyi loh raꞌ nuꞌh, tin ayi saꞌbi stoꞌ raꞌ nuꞌh guidiꞌhnn nuꞌh laꞌhgahca duhlda nin bwiꞌhnn raꞌ xtaada guldooꞌ raꞌ nu. 7 Pwihsi niꞌchin laꞌhtu ayi gaann tu dxaan raꞌ ziga bwiꞌhnn nuhn raꞌ ba ziga rñiꞌ loh Xchihtsi Dxiohs xcweenta raꞌ ba: “Bwiinn raꞌ guzohba raꞌ ba tin gudahw raꞌ ba nee gwaaꞌ raꞌ ba, ya seguihdu guzaꞌloh riidzihta raꞌ ba.” 8 Nee ayi za guunn xtuꞌh tu stuhbi gunnaꞌh nin ayi naa cheꞌhla tu, ziga bwiꞌhnn raꞌ ba. Ya pur xcweenta raꞌ ba riiꞌ niꞌchin nin guhchi galdabi chohnnaa mihyi raꞌ ba tuhbi dxiꞌh dxyih. 9 Nee ayi za chyu gudiꞌhi llahn laꞌh Dxiohs cun xtuhlda raꞌ nuꞌh ziga bwiꞌhnn nuhn raꞌ bwiinn raꞌ chi, chin gudaꞌwyaaꞌ bweꞌlda laꞌh raꞌ ba ya guhchi raꞌ ba. 10 Nin ayi za xi guiñiꞌnah tu pur laꞌh Dxiohs, ziga bwiꞌhnn nuhn raꞌ ba, niꞌchin baxeꞌhla Dxiohs aanjla xteenn guelguhchi gudxiinntiiꞌ ziahan raꞌ ba.

11 Garaa raꞌ cohsa raꞌ riiꞌ guzahca raꞌ guehtu xtaada guldooꞌ raꞌ nu, niꞌchin biaꞌhanan loh Dxihtsi ziga tuhbi jeemplu tin gaca nasiin raꞌ nuꞌh ayi chyu guunn cweenta ziga bwiꞌhnn raꞌ ba, tin ayi guinaꞌzu raꞌ cohsa raꞌ chi laꞌhnuꞌh loh dxyih raꞌ riiꞌ. 12 Niꞌchin chyu chiꞌh zi nin ruhnn lligaaba nabahan zaꞌca niꞌchi nez loh Dxiohs, gaapa niꞌchi cwidadu tin ayi dxiaaba niꞌchi loh duhlda. 13 Pwihsi ziga guelrzaꞌcazii raꞌ nin nugatiꞌdxiloh tu naan laꞌhgahca guelrzaꞌcazii nin cagatiꞌdxiloh raꞌ la garaa raꞌ lasaaꞌ tu loh Jesucristu. Per ayi cweꞌhe stoꞌ Dxiohs laꞌh tu nee ayi za gusaaꞌn Ñiꞌh sacazii ru tu loh nin zahca guunn tu waanta, tin loh raꞌ guelrzaꞌcazii nin dxieꞌdxiahlda raꞌ guunn Ñiꞌh cumpahñu laꞌhtu xa taꞌh tu loh raꞌ guelrzaꞌcazii raꞌ chi.

14 Niꞌchin nin rñiꞌn loh tu bwiitsi raꞌn, ayiru gaann tu dxaan yuh raꞌ. 15 Rñiꞌn loh tu ziga zi loh tuhbi bwiinn nasiin; gulgachaꞌga lasaaꞌ xigaaba tu xcweenta dxyiꞌdxyi nin rñiꞌn loh tu; 16 chin riidaꞌw nuꞌh xchih xteenn Daada Jesucristu, xchih chi naan tuhbi sehn nabahannee nuꞌh laꞌh Daada Jesucristu. Cun chin rachidwaa nuꞌh vihnnu nin nuu laꞌn copa guhcataaꞌyi, rñiꞌ laꞌn lastoꞌ nuꞌh gudxihlli Daada Jesucristu xcweenta xtuhlda nuꞌh loh cruhzi cun llarihn Ñiꞌh. Niꞌchin chin riidaꞌw raꞌ nuꞌh pahn, rzaꞌloh ziga naa xcweenta nuꞌh, naa nuꞌh tuhsi loh tihxi Ñiꞌh nin batiꞌdxi Ñiꞌh gucah loh cruhzi xcweenta raꞌ nuꞌh. 17 Nicala ziahan naa nuꞌh per naa raꞌ nuꞌh ziga tuhsi tihxi laasii garaa nuꞌh riidaꞌw nuꞌh tuhsi pahn chin riidaꞌw nuꞌh xchih pascu xteenn Daada Jesucristu.

18 ¡Gulguiaꞌha xa ruhn raꞌ bwiinn Israel raꞌ! Rahw raꞌ ba xpweꞌhla raꞌ guidxaꞌh raꞌ nin rudiꞌhi guhn raꞌ ba nez loh Dxiohs loh bacuꞌga laꞌn guidoꞌ rooꞌ, ya garaa raꞌ bwiinn nin caꞌha costumbre raꞌ riiꞌ naa raꞌ ba tuhsi cun laꞌh raꞌ ba. 19 Ayi cañiꞌn lasahca raꞌ ziga dxaan yuh raꞌ, o lasahca raꞌ bweꞌhla raꞌ nin rdziiꞌba raꞌ loh dxaan yuh que ziga xiilla stuhbi clahsa bweꞌhla raꞌ. 20 Nin rñiꞌn naa xcweenta ziga bwiinn raꞌ nin ayi nuꞌnbwaꞌ laꞌh Dxiohs laasii cohsa raꞌ nin rudiꞌhi guhn raꞌ ba loh dxaan yuh raꞌ ayi cayuhn raꞌ ban loh dxaan yuh si sino que nee loh bwiinndxaaba, ya naꞌh ayi xclaaꞌdzihn guidxaꞌga tu loh raꞌ bwiinn nin rudiꞌhi guhn nez loh bwiinndxaaba. 21 Ayi nuu guee tu nin nuu laꞌn xcohpa Daada Jesucristu nin rusiaa lastoꞌ nuꞌh loh duhlda nee cun neegaꞌh cohpa nin rudiꞌhi raꞌ ba loh bwiinndxaaba; nee ayi za nu gahw raꞌ za nuꞌh xchih xteenn Daada Jesucristu sidela neegaꞌh guidaꞌw za nuꞌh xchih nin rudiꞌhi raꞌ ba loh bwiinndxaaba, 22 o ¿ta xclaaꞌdzi nuꞌh gachyiꞌchi nuꞌh laꞌh Daada Jesucristu? ¿Gu mahzi guelrnabwaꞌ ru nadxiaapa nuꞌh que laꞌh Ñiꞌh?

23 Guchii ca, zahca guidiꞌhnn nuꞌh xi chiꞌh zi nin xclaaꞌdzi nuꞌh, per ayi garaa raꞌ dxiꞌhn naa raꞌn cohsa raꞌ nin ralluꞌyi para laꞌh raꞌ nuꞌh. Per nuu raꞌ nin ayi gacanee gachiooꞌ raꞌ nuꞌh loh guelriachii stoꞌ xteenn Dxiohs. 24 Ayi guunn tu lligaaba chiꞌhyi tu xquelnazꞌaca gahca tu; mahzi bwen gulchiꞌhyi xquelnazaꞌca bwiinn lasaaꞌ tu. 25 Gulgahw xi chiꞌh zi bweꞌhla raꞌ nin rdooꞌ loh dxiaaꞌ sinque ayi guinaabadxyiꞌdxyi tu canehza zeꞌen tin ayi ziꞌchi nagah guinaꞌzu llahn loh xigaaba tu, 26 laasii loh Xchihtsi Dxiohs caa dxyiꞌdxyi raꞌ rii: “Guidxyiyuh, cun garaa raꞌ nin nuu raꞌ lohon, naa xteenn Dxiohs.”

27 Per sidela laꞌh tuhbi ziga bwiinn nin ayi riachii stoꞌ ñiꞌh xchiꞌdxyi Dxiohs raziꞌlaaꞌdzi ba yiꞌh tuhbi guelwahw, nee guiñiꞌ stoꞌ luꞌh chenee luꞌh ba, cun gudahw sinque ayi guinaabadxyiꞌdxyi luꞌh tin ayi gaca chiohpa loh xigaaba luꞌh. 28 Per sidela chyulla nnaa loh luꞌh: “Bweꞌhla riiꞌ nin gudziiꞌba loh dxaan raꞌ ziga guhn”, pwihsi ayi gahw luꞌhn, tin ayi pur niꞌchi guñihchi bwiinn nin guñiꞌ ziꞌchi, nee tin ayi za gaca chiohpa loh xigaaba chyu chiꞌh zi. 29 Cañiꞌn xcweenta ziga naa xigaaba stuhbi bwiinn chi, ayi xcweenta dxiꞌh luꞌh. Per ziuuꞌ tuhbi nin guinaabadxyiꞌdxyi: “¿Xixnaa zohbapaꞌcaa loh stuhbi bwiinn naꞌh pur nin rahca chiohpa xigaaba ba xcweenta nin ruꞌnnahn? 30 Nee sidela naꞌh rudiꞌhihn guelzuxchiilli nez loh Dxiohs pur xcweenta guelwahw nin raawuhn, ¿xixnaa chiꞌh rñiꞌyah raꞌ bwiinn naꞌh pur nin raawuhn?” 31 Pwihsi niꞌchin sidela laꞌhtu rahw tu o reeꞌ tu ziga xilla guelwahw raꞌ, o ruhnn tu xilla stuhbi cohsa, gulguiꞌhnnan para gaca lasahca lah Dxiohs, 32 nee ayi za gucheꞌh tu nin laꞌh raꞌ bwiinn Israel raꞌ, nee nin laꞌh raꞌ za bwiinn raꞌ nin ayi naa raꞌ bwiinn Israel, nee nin laꞌh raꞌ za bwiinn nin naa raꞌ xpwiinn xquidoꞌ Dxiohs. 33 Naꞌh ziga naa za xigaaꞌbahn, rdxiꞌhyihn tal ziga dxiuꞌ stoꞌ bwiinn; ayi cadxiꞌhyi dxiꞌhn xcweenta xquelnazaꞌcaꞌhn sino que cadxiꞌhyihn xquelnazaꞌca raꞌ ziahan duxa raꞌ bwiinn, tin taꞌh raꞌ ba loh duhlda pur nin gwachii stoꞌ raꞌ ba xchiꞌdxyi Dxiohs.

<- 1 Corintios 91 Corintios 11 ->