CART DANꞋ BZOJ POSTLW SAN PABLO C̱HE BEṈEꞋ CAꞋ ŽE' ROMA

1 Neda' Pablo chzoja' le'e. Chona' bite'tez dan' ža X̱ancho Jesucriston'. Diosen' gwleje' neda' cont naca' postlw c̱he', na' gwseḻe' neda' cont chyix̱jue'eda' diža' güen c̱he'. 2 Diosen' ba gwzolagüe' bzende' beṉac̱hen' diža' güen c̱he', bene' cont gwnita' beṉe' goso'e xtižen' cani' na' bozozojen'. 3 Na' diža' güen c̱he Diosen' chzejni'in chio' c̱he Xi'iṉe' X̱ancho Jesucriston'. Ḻen' golje' beṉac̱h ḻo diaža c̱he da' rey David. 4 Na' Spiritw c̱he Diosen' blo'en X̱ancho Jesucriston' naque' dogualje Xi'iṉ Dios na' nape' yeḻa' guac, ḻe Jesucriston' bebane' ladjo beṉe' guat ca'. 5 Na' neto', da' chejnilaže'to' X̱ancho Jesucriston', Diosen' bene' da' güenchgua len neto', ḻe gwleje' neto' na' gwseḻe' neto' chyix̱jue'eto' xtižen'. Na' gwseḻe' neto' chyix̱jue'eton' cont šanch beṉe' yesejnilaže'ne' na' yosozenague' c̱he'. Na' X̱ancho Jesucriston' soe' blaoch cate' beṉe' že' yogo' nación yosozenague' c̱he Diosen'. 6 Can' naquen, Diosen' ba gwleje' le'e cont nacle ḻo na' Jesucriston'.

7 Chzoja' da' nga par yogo' le'e že'le Roman' le'e ba mbej Diosen' cont nacle ḻo ne'e. Diosen' chacde' le'e. Na' chṉaba' lao X̱acho Diosen' len X̱ancho Jesucriston' yesaclene' le'e na' yesone' cont soa cuezle binḻo len xbab da' yo'o ḻo' yic̱hjlažda'olen'.

Pablon' goclaže' šjaṉe'e beṉe' ca' chesejnilaže' Jesucriston' ciuda Roma

8 Zgua'tec ṉi'a le'e Jesucriston' zoe' chaclene' neda' cont choa' yeḻa' chox̱clen c̱he Diosen' par yogo' le'e, ḻe beṉe' ca' že' doxen ḻo yežlion' cheso'e diža' can' chejnilaže'le Criston'. 9 Ṉezcze Diosen' yogo' ṉi'a cate' choḻ güiža'ne' chṉaba' gaclene' le'e. Naque' ben' chejnilaža' do yic̱hj do laža' na' chona' xšinen' choa' diža' güen c̱he Xi'iṉe' Jesucriston'. 10 Chṉaba' lao Diosen' goṉe' latje yedeṉa'a le'e še ca' chnalaže' gona', ḻe ba chac sša zelaža' yida'. 11 Chaclaža' yedeṉa'a le'e na' gwzejni'ichda' le'e cont soac̱hac̱hle šejnilaže'le Diosen'. 12 Na' le'e len neda' soacho gonc̱hac̱hlaže' ḻježcho dan' chejnilaže'cho Jesucriston'.

13 Beṉe' migw, che'nda' ṉezele zan ṉi'a ba goclaža' yida' yedeṉa'a le'e, perw biṉa' gac yedeṉa'a le'e. Chaclaža' yida' gona' xšin Diosen' gan zoale cont šanḻe gwzenagle c̱he Jesucriston' ca ba goc yezica'chle yež ga ba gwya'a. 14 Ṉezda' cheyaḻa' gua' diža' güen c̱he Jesucriston' len yogo'ḻoḻ beṉe', beṉe' že' ciudan', na' beṉe' že' yix̱e', na' beṉe' chesac letr na' beṉe' cbi chesac letr. 15 Da'nan' che'nchgüeda' gua' xtižen' len le'e že'le Roman' can' ba bian' ga yoble.

Diža' güen c̱he Jesucriston' nsan' yeḻa' guac c̱he Diosen'

16 Bi cheto'eda' gua' diža' güen c̱he Jesucriston', ḻe xtižen' nsan' yeḻa' guac c̱he Diosen' cont beṉe' chesejḻe' c̱hen gata' yeḻa' mban c̱hegaque' toḻi tocaṉe. Nsan' yeḻa' guac len neto' beṉe' Israel, na' ḻecze len le'e bi nacle beṉe' Israel. 17 Na' diža' güen c̱he Jesucriston' chzejni'in chio' še beṉe' yesejnilaže' Jesucriston', Diosen' gone' ḻegaque' beṉe' güen, na' bi de bichle da' gac goncho cont gaccho beṉe' güen len ḻe'. Can' nyoj Xtiža' Diosen' žan: “Diosen' že' beṉe' chejnilaže' ḻe' naque' beṉe' güen len ḻe' na' gata' yeḻa' mban c̱he' toḻi tocaṉe.”

De xtoḻa' beṉacẖen'

18 Diosen' zoe' yaban' na' ba blo'ede' beṉac̱hen' toḻi tocaṉe yesesaca'zi' yogo' beṉe' cbi chesejnilaže' ḻe' na' chesone' da' xiṉj. Na' da' chesone' da' xiṉjen' bi chesaclaže' yesombia' beṉe' yoble diža' ḻi c̱he Diosen'. 19 Na' Diosen' gone' yesezaca'zi'e, ḻe ba zjaṉezde' zoe' da' ba blo'ede' ḻegaque' can' ba benen'. 20 Bi chle'echo can' nac Diosen', na' bi chle'echo can' zoe' chnabi'e, perw ṉezecho de yeḻa' guac c̱he' can' bene' bx̱ie' yežlion', na' yogo' beṉac̱h chesele'ede' da' ca' ba bene'. Da'nan' bibi de da' yosode'e beṉac̱hen' yesene' bi zjaṉezde' še zoe'. 21 Ḻa'czḻa' zjaṉezde' zoa Diosen', bi chesonxene' ḻe', ṉeca cheso'e yeḻa' chox̱clen c̱he'. Xbab c̱hegaquen' bibi zacan' na' zjanc̱hoḻ yic̱hjlažda'ogüen' yeḻa' bi chejḻe' c̱hegaquen'. 22 Chesene' zjanaque' beṉe' sina' perw chesone' xbab da' bibi zaca'. 23 Chosozoe' Diosen' to šḻa'ale ḻa'czḻa' naque' ḻa'zelagüe' beṉe' zaca' na' zoe' toḻi tocaṉe. Na' gualaz ḻe', chesejnilaže' no ḻ gua'a ḻsaca' c̱he beṉac̱h beṉe' te c̱he, na' no ḻ gua'a ḻsaca' c̱he be zoa x̱il, c̱he be žia tap ṉi'a na'ba' na' c̱he no be x̱igüe'.

24 Da'nan' Diosen' ba gwlejyic̱hje' ḻegaque' cont chesone' da' xiṉj can' ža ḻo' lažda'ogaquen', na' baḻe' ba chesonchgüe' da' nac yeḻa' zto' len cuerp c̱hegaquen' toe' len yetoe'. 25 Diosen' gwlejyic̱hje' ḻegaque' cont chesone' yeḻa' zto', ḻe ḻegaque' gosebejyic̱hje' diža' ḻi c̱he Diosen' na' chesejḻe'e c̱he da' güenḻaže'. Chesejnilaže' da' ca' ben Diosen' na' bi chesejnilaže' Dios ben' cheyaḻa' šejnilaže'cho na' gonxencho toḻi tocaṉe. Ca'czen' gacšca.

26 Da'nan' Diosen' gwlejyic̱hje' ḻegaque' cont chesone' yeḻa' zto' con da' žan ḻo' yic̱hjlažda'ogaque'. Can' chac, nita' no'ole beṉe' bich chesone' can' cheyaḻa' yeson no'olen', san cheseque'e ḻjež no'olgaque' cont chesone' len ḻegaque' da' bi cheyaḻa' yesone'. 27 Na' nita' beṉe' byo beṉe' bitw chese'nde' yesenita'lene' no'ole, san chesezelaže' ḻjež beṉe' byogaque' nach cheseca'a ḻježe' cont chesone' yeḻa' zto'. Na' dan' ba chbiayi' cuerp c̱hegaquen', naquen castigw da' cheyaḻa' yesezi'e yeḻa' güen da' xiṉj c̱hen'.

28 Bi chesaclaže' beṉac̱hen' yosozenague' c̱he Diosen', da'nan' ba gwlejyic̱hje' ḻegaque' len xbab mal c̱hegaquen'. Da'nan' nite' chesone' da' bi cheyaḻa' yesone'. 29 Chesonchgüe' yogo' da' xiṉj. Beṉe' byo chesata'lene' no'ole bi nac no'ol c̱hegaque', na' no'olen' chesata'lene' beṉe' byo bi nac beṉe' c̱hegaque'. Chesexi'e beṉe'. Chesezelaže' bi da' de c̱he beṉe'. Zjanaque' beṉe' xi'a juisyw, chesegue'e ḻježe', chesot ḻježe', chesediḻe', cheseziye'e, zjanacchgüe' beṉe' güedenag, na' chja'aque' chjaseleje' diža' c̱he beṉe'. 30 Cheseṉe' mal c̱he beṉe' yoble, chesegue'ede' Diosen', na' bibi bala'aṉ chesezoe' beṉe' yoble. Chesa'laže'. Chesonxen cuine' cheso'e diža' zjanaque' beṉe' güen. Chesaljlaže' bichle da' mal da' yesone'. Bi chosozenague' c̱he x̱axṉe'e. 31 Bi chesejni'ide'. Bi chesone' da ba gosene' yesone'. Bi chesacde' beṉe' yoble. Bi chesyezi'xen c̱he ḻježe' na' bi chesyeyaše' ḻježe'. 32 Zjaṉezde' Diosen' že' toḻi tocaṉe yesezaca'zi' ben' cheson da' ca'. Na' ḻa'czḻa' zjaṉezde' can' že', con nita'cze' chesone' da' xiṉjen' na' chesyebede' cate' beṉe' yoble chesone' can' cheson ḻegaquen'.

Romanos 2 ->