1 Nach ble'eda' yeto angl gual gwze'e yaban' betje' ḻo yežlion'. To bejw nyec̱hjen ḻe' na' zoa to pita' yic̱hjen'. Cho'alagüen' chṉa'titen ca gwbiž, na' yeṉi'e ca' ble'edan' zjanaquen ca bdope da' chaḻa'ṉiṉ. 2 Anglen' nox̱e' to yiš dao' da' ba beyašen. Na' bzoa šḻa'a ṉi'e ḻicha ḻo nisdaon' na' yešḻa'an bzoe' ḻo yežlion'. 3 Na' bosye'e zižje ca zižje chosya'a be nzi' león. Na' cate' bosye'e gwṉe gwzio' gaž ṉi'a na' to to gwzion' zoa da' gosenan. 4 Beyož goc ca' na' ba zoa gwzoja' diža' da' benda' šlac gwṉe gwzion' cate' to beṉe' zoa yaba gože'nda':

―Bi gwzojo' dižan' bendo' šlac gwṉe gwzion', san gwdapen ḻo' yic̱hjlažda'oguo'.

5 Nach angl ben' zoa šḻa'a ṉi'en ḻo nisdaon' na' yešḻa'an ḻo yežlion' gwḻis ne'e ḻichan' yabale. 6 Na' gwlo'e da' baḻi gac can' ža Dios ben' zoa toḻi tocaṉe, ben' ben ḻe'e yaba len yogo'te da' chle'echo ḻe'enṉa', bene' yežlion', beṉac̱h, beyix̱e', na' bite'tezechle da' de ḻo yežlion', na' bene' nisdaon' len be ca' na' da' ca' že' ḻo'enṉa'. Gwne':

―Bich cuez Diosen' gone' can' ba nžie' bia' gone'. 7 San cate' žin ža gwcuež angl gažen' trompeta c̱hen', cana'ch gac da' nžia Diosen' bia' gac, can' ba gože' beṉe' ca' goso'e xtižen', da' nono gwṉeze cani'.

8 Nach da' yoble ben' zoa yaban' ben' ba benczeda' gwṉie' neda', gwne':

―Gwyej jax̱i' yiš dao' dan' ba beyaš dan' nox̱e' angl ben' zecha zoa šḻa'a ṉi'en ḻo nisdaon' na' yešḻa'an ḻo yežlion'.

9 Da'nan' gwya'a gan' zoa anglen' jaṉaba' yišen'. Na' anglen' gože'nda':

―Bex̱on' gwdagon'. Ḻo' cho'on gacdon' zix̱ ca šina' beser, perw ḻo' ḻi'on yeyaquen zḻa'.

10 Nach bex̱oa' yišen' nox̱e' anglen' gwdaguan'. Na' ḻo' cho'an goquen zix̱ ca šina' beser, perw cate' bedaguan' beyaquen zḻa' ḻo' ḻi'an. 11 Nach anglen' gože' neda':

―Da' yoble cheyaḻa' go'o xtiža' Diosen' na' ṉao' can' gac c̱he zan yež, c̱he zan nación, c̱he beṉe' chesac gwde gwdele diža' da' de yežlion', na' c̱he zan beṉe' gwnabia'.

<- Apocalipsis 9Apocalipsis 11 ->