1 Cani' Diosen' gože' da' x̱ozxta'ocho ca' gaclene' ḻegaque' na' gac güen c̱hegaque' še yesone' can' ža ley c̱hen'. Na' šlac ṉe' chon žin da' nechw da'na' gože' ḻegaque' cani', Diosen' bžie' bia' nacle yesonxene' ḻe' na' nacle yesone' yodao' gan' yesonxene' ḻe' yežlio nga. 2 Gosone' yodao' da' nsan' c̱hope cuart. Na' ḻo' cuart nechon' bosozoe' to candeler na' to mes gan' bosocue'e yetextil da' naquen c̱he Dios. Na' cuartna' bososi'en Latje c̱he Dios. 3 Na' bosozie' to lache' ḻo' yo'ona' cont bchojen c̱hope cuart, na' cuart gwchopen' bososi'en Latje ga Zoa Dios. 4 Na' ḻo' cuart gwchopen' bosozie' yeto mes de oro gan' bosozeye' yal. Na' goseyix̱jue' to caj da' bosoguazje' oro doxenen. Na' ḻo' cajen' gosegüe'e to yeso' de oro gan' gosegüe'e late' yeḻa' guagw da' nzi' maná, na' gosegüe'e carrot c̱he da' Aarón dan' bex̱eje. Ḻecze ḻo' caj nan' gosego'ošagüe' yej ta'a ca' gan' byoj yogo' dan' bžia bia' Diosen' yesone' cont gaclene' ḻegaque'. 5 Na' cože' cajen' bosonite' c̱hope ḻ gua'a ḻsaca' beṉe' gosone' ca angl beṉe' bososi'e querubines, cont nacbia' zoa Diosen' gan' žia cajen' na' naque' beṉe' zaca' juisyw. Na' cože' cajen' ladjo angl ca' gan' nžiljo x̱ilgaquen', bosoži'e xc̱hen beyix̱e' cate' goseṉabe' yezi'xen Diosen' xtoḻa' beṉe' Israel gualaž c̱hecho ca' to to iz. Perw bi chonen byen güe'cho diža' ṉa'a doxen can' goca'.

6 Na' beyož gosone' yodaon' na' bosonite' yogo' da' ca' ḻo'enṉa', nach yogo' ža bx̱oz ca' goso'e ḻo' cuart nechon' na' gosone' can' bžia bia' Diosen' gosone' gosonxene' ḻe'. 7 Na' cuart gwchopen', toz bx̱oz blao goc gwyo'e ḻo'enṉa' tṉi'a tgüiz. Na' cate' gwyo'ena' benen byen bex̱oe' chen c̱he beyix̱e' bži'en ḻo cajen' cont Diosen' bezi'xene' xtoḻe' na' bezi'xente' xtoḻa' yezica'chle beṉe' Israel gualaž c̱hecho ṉec̱he da' xiṉj da' gosone' sin cbi gosacbe'ede'. 8 Na' da' bi de ḻsens šo' nochle beṉe' ḻo' cuart gwchopen', Spiritw c̱he Diosen' chzejni'in chio' biṉa' gac šo' beṉac̱hen' gan' nac latje ga zoa Diosen' šlac ṉe' chon žin yodao' nechua' ḻo yežlion'. 9 Na' yodaon' len yogo' da' cheson bx̱oz ca' ḻo'enṉa' chlo'en chio' zoacho ṉa'a can' chac yaban' gan' zoa Diosen'. Na' ḻa'czḻa' da' zan chesoe' beṉe' Diosen' na' be zan beyix̱e' chesote' chesonxene' ḻe', bibi yeḻa' guac zjansa' da' ca' cont yeseṉezde' bibi doḻa' zjanape' len Diosen'. 10 Na' da' ca' cheson beṉe' gualaž c̱hechon' ḻo' yodaon' naquen costumbr c̱he no nis yeḻa' guagw, no beyix̱e' chesote', na' nacle cha' chyib cuingaque', na' bichle da' zjazacan' par cuerp c̱hegaque' na'ze. Na' ba gosonen žin šlac Diosen' biṉa' gwše'e costumbr ca' len da' coben'.

11 Na' ṉa'a Criston' naque' bx̱oz blao c̱hecho na' ba bžin ža bx̱ie' costumbr güen ca'. Na' zoe' yaban' naque' bx̱oz c̱hecho lao Diosen', na' gan' zoen' zaca'chen ca yodao' da' goson beṉac̱hen' yežlio nga. 12 Na' bi bex̱oe' chen c̱he no šib no go'ṉ dao' cate' gwyo'e gwṉabe' cont Diosen' bezi'xene' xtoḻa'chon', san da' bnežjw cuine' gosote'ne' na' blalj xc̱hene' ṉec̱he xtoḻa'chon' tṉi'aze ḻe'e yag cruzen', da'nan' goc gwyo'e gan' zoa Diosen' na' ba beque'e xtoḻa'chon' toḻi tocaṉe. 13 Na' ley da' bzoj da' Moisésen' nyojen žan da' zan da' cheson beṉe' da' chonen cont bi chesaque' xilaže' len Diosen'. Na' cont yesyeyaque' xilaže' len Diosen' da' yoble, chyažjen gwže'e bx̱ozen' ḻegaque' xc̱hen no šib no go'ṉ na' nc̱hix̱en len de da' chega'aṉ cate' chosozeye' to vaca' dao'. 14 Na' xc̱hen Criston' da' bedelalje' ṉec̱he xtoḻa'chon' zaca'chen ca xc̱hen beyix̱e' ca', ḻe xc̱henen' cheyonen yic̱hjlažda'ochon' xilaže' len da' xiṉj da' ba bencho. Da'nan' bich nchoglaon c̱hecho gatcho ṉec̱he xtoḻa'chon', san soaczcho gonxencho Diosen' ben' zoa toḻi tocaṉe. Spiritw c̱he Diosen' goclenen Criston' bnežjo cuine' beque'e xtoḻa'chon', na' bibi xtoḻa' Criston' gota'.

15 Criston' bedelalj xc̱hene' cont gwzolao chac da' coben' dan' gwna Diosen' gone' cont soacho binḻo len ḻe'. Na' ba bx̱ie' da' coben' cont baḻteze beṉe' ba gwlej Diosen' šjasyenite' len ḻe' toḻi tocaṉe. Na' da' got Criston' bedelalj xc̱hene', da'nan gwnitlao xtoḻa' beṉe' ca' gosejnilaže' Diosen' šlac ṉe' chon žin dan' gwdix̱jue' da' nechw dan' gwne' gone' cont chio' beṉe' Israel soacho binḻo len ḻe'. 16 Cate' to beṉe' ba bene' testament, cate'ch ba gota'bia' ba got bena' ben testamenta', cana'ch gac can' žanṉa'. 17 Ḻe to testament bi gac can' žan šlac ṉe' mban ben' ben ḻen. Cate'ch ba gote' canan' gac can' žanṉa'. 18 Na' goc ca' len da' nechon' da' gož Diosen' da' x̱ozxta'ocho ca' gone' gaclene' ḻegaque'. Da'nan' bžie' bia' bosolalje' xc̱hen beyix̱e' cont gwxen. 19 Cate' da' Moisésen' beyož be'lene' da' x̱ozxta'ocho ca' diža' c̱he yogo' dan' bžia bia' Diosen' yesone' can' ža ley c̱hen', nach Moisésen' bži'e ḻegaque' xc̱hen go'ṉ dao' na' xc̱hen šib dao' na' nis. Bži'e ḻegaque' da' ca' len late' yiša' xa xila' da' mben color xṉa na' len to xis yix̱e' dao' da' nzi' hisopo. Ḻecze bži'en lao libren' gan' nyoj ley c̱hen'. 20 Na' da' Moisésen' gože' ḻegaque': “Chen ni ben Diosen' mandadw gwžia' le'e cate' gože' chio' nac goncho cont gaclene' chio' gac güen c̱hecho can' gwnen'.” 21 Na' ḻecz ca' bene' bži'e chenṉa' yodaon' na' yeso' ša' ca' bosoc̱hine' gan' gosonxene' Diosen'. 22 Ley dan' bzoj Moisésen' nžian bia' gwže'e bx̱ozen' chen ḻo yogo'ze bi da' chosoc̱hine' cont yesyeyaquen xilaže' lao Diosen'. Na' leyna' ḻecze žan še biṉa' lalj chen, Diosen' bi yezi'xene' xtoḻa' beṉac̱hen'.

23 Can' goc benen byen bosoži'e xc̱hen beyix̱e' ḻo' yodaon' na' ḻo da' ca' bosoc̱hine' yodaon' cont gosonen žin lao Diosen', na' yodaon' naquen con to ḻ gua'a ḻsaca' da' chzejni'in can' nac yaban'. Perw da' de yaban' byažjen to chen da' zaca'ch. 24 Na' gan' gwyo'o Criston' gague naquen to yodao' da' naquen con to ḻ gua'a ḻsaca' cont ṉezecho can' nac yaban'. Ḻe' beyepe' yaban' na' gwyo'e gan' zoa Diosen' cont chṉe' gualaz chio' lagüen'. 25 Bx̱oz blao c̱he beṉe' Israel gualaž c̱hecho ca' cheso'e yodaon' tṉi'a tgüiz gan' nzi' Latje gan' Zoa Dios na' chosoži'e chen c̱he beyix̱e', perw Criston' bi bnežjw cuine' zan ṉi'a gosote'ne'. Tṉi'aze blalj xc̱hene' ṉec̱he xtoḻa' beṉac̱hen'. 26 Šaca' byažjen blalj xc̱hene' zan ṉi'a, ba gote' zan ṉi'a gwzolaon cate' gwxete yežlion', perw bi benen byen gac c̱he' ca'. Bedelalj xc̱hene' tṉi'aze cate' gwna Diosen' ba bžin ža c̱he', cont chac cheque'e xtoḻa' beṉac̱h. 27 Na' can' chac c̱he beṉac̱hen', žin ža gat to toe' na' te yesate' nach ṉa Diosen' c̱he to toe' še yesezaca'zi'e o še yesenite' mbalaz. 28 Na' can' yesat beṉac̱hen' tṉi'aze, ca'cze bnežjw cuin Criston' tṉi'aze gosote'ne' cont chac cheque'e xtoḻa' beṉac̱hen'. Nach žin ža yide' da' yoble perw gague cont yeque'e xtoḻa' beṉac̱hen', san cont yec̱he'e beṉe' ca' chesebeze' batcan' yide' nach ṉite' mbalaz len ḻe'.

<- Hebreos 8Hebreos 10 ->