Gálatas 4

1 To beṉe' gwṉi'a še zoa xi'iṉe', bi'nan' gac ḻo na'be' da' de c̱he'. Perw na' šlac ṉe' nacbe' bidao' bitw ṉacho mbalazech chac c̱hebe' clel ca c̱he to beṉe' güen žin ḻa'czḻa' žin ža gac ḻo na'be' yogo' dan' de c̱he x̱aben'. 2 Beṉe' güen žin ca' nite' ḻo' yo'o chosogüia cheseṉe'ebe' na' chesenabi'ebe' šlac biṉa' c̱ha'obe' na' šlac žin ža co'o x̱aben' ḻo na'be' dan' de c̱hen'. 3 Can' goc len neto' beṉe' Israel šlac biṉa' yid Criston', gwxaca'lebto' ca xi'iṉ beṉe' gwṉi'an'. Na' leyna' gwzaca'leben ca beṉe' ca' chesenabia' xi'iṉ beṉe' gwṉian' šlac biṉa' žin ža si'be' dan' de c̱he x̱aben'. 4 Perw cate' bžin ža bžia Diosen' bia' gwseḻa' Xi'iṉen' yežlio nga, gwxan to no'ole ḻe'. Na' Xi'iṉ Diosen' ḻecze benen byen bzenague' c̱he leyna'. 5 Na' ḻen' bedeyene' cont yogo' chio' chejnilaže'chone' ba non Diosen' chio' ca xi'iṉe' na' zoacho mbalaz dan' ṉezecho bich chonen byen gonxencho costumbr ca' da' zjanyoj ḻe'e ley c̱he neto' beṉe' Israel.

6 Na' cont ṉezecho ba non Diosen' chio' ca xi'iṉe', ba gwseḻe' Spiritw c̱hen' dan' ḻecze naquen Spiritw c̱he Xi'iṉe' Criston', zoan lo' lažda'ochon'. Na' Spiriton' chaclenen to tocho cont choḻ güižcho Diosen' che'chone': “X̱a'”. 7 Nachen' dan' ba non Diosen' chio' ca xi'iṉe' bich cheyaḻa' soacho ca to esclavo len dan' non leyna' mandadw goncho. None' chio' ca xi'iṉe' na' chone' güen len chio' doxen can' gwne' gone' len xi'iṉ diaža c̱he da' Abrahanṉa'.

Pablon' chi' yic̱hje' nac cheson beṉe' ca' chesejnilaže' Criston'

8 Cate' biṉa' gombia'le Diosen', gwyejnilaže'le da' ca' bi cheyaḻa' šejnilaže'cho, na' ḻegaquen gosenabian' xbab c̱hele. 9 Perw ṉa'a ba nombia'le Diosen', o še güench ṉacho Diosen' ba nombi'e le'e. Na' chebanchgüeda' c̱hele dan' chebiga'le cosx̱anḻe na' da' yoble chonxenḻe costumbr ca' ca no c̱he da' ye'ej gagwcho, c̱he ža ca', na' c̱he cuerp c̱hechon', na' cho'ele latje chesenabian' xbab c̱hele ḻa'czḻa' bitw zjazacan' cont yesaclenen chio'. 10 Ba chonxenḻe costumbr c̱he no ža ḻṉi, c̱he bio' ca', c̱he tiemp ca' na' c̱he iz ca'. 11 Chžeba' še bich chzenagle c̱he dan' ba bsed blo'eda' le'e, ḻe še bich chzenagle c̱hen, ba gwžiayi' dan' bena' len le'e.

12 Beṉe' migw, chata'yoeda' le'e gacbe'ele costumbr c̱he neto' beṉe' Israel dan' zjanyoj ḻe'e leyna' bi yesaclenen le'e lao Diosen' ca chacbe'eda' bi yesaclenen neda' lao Diosen'. Na' caten' bedesoa' len le'e cana', bitw ṉacho ba benḻe mal len neda'. 13 Ṉezeczele bega'aṉlena' le'e da' nechw dan' gocšenda' na' gwdix̱jue'eda' diža' güen c̱he Criston' len le'e. 14 Na' dan' gocšenda' ca hora' zacan' gue'ele neda', perw bitw bgue'ele neda', san do yic̱hj do laže'le bleble neda' ca šale bleble to no angl c̱he Dios o ca šale cuin Jesucriston'. 15 Mbalaz gwzoale cate' gwzoa' len le'e cana'. ¿Bixc̱hen' bich chebele xtižan' ṉa'a? Ṉezda' da' ḻeca goquele neda' bzanele bite'teze da' de c̱hele na' goclaže'le lente cuinḻe zanele gaclenḻe neda'. 16 Na' ṉa'a ¿ba chaquele chgue'eda' le'e dan' choe'lena' le'e diža' ḻin'?

17 Beṉe' ca' chososed chosolo'ede' le'e ṉa'a ḻeca zjachi' yic̱hjgaque' le'e, perw gague cont yesone' güen len le'e, san cont yesyebeje' le'e bich gonḻe txen len neto', na' cont cue' yic̱hjle ḻegacze'. 18 Naqueczen güen yesebe' yic̱hj beṉe' le'e bate'teze, gague cate'zen' zoa' len le'e, con še yesone' güen len le'e. 19 Xi'iṉdagua', da' yoble chžaglagua' ḻo' lažda'ogua' ṉec̱he le'e can' chžaglao to no'ole beṉe' chzan, na' bich žaglagua' ca' cate'ch gac yic̱hjlažda'olen' can' nac yic̱hjlaždao' Criston'. 20 Yebechgüeda' šaca' ṉetec ṉa'a zoa' len le'e na' šaca' gac ṉia' chonḻe güen, perw ḻeca chacžejlaža' c̱hele.

Da' Agar na' da' Saran'

21 Le'e chaclaže'le gonxenḻe costumbr c̱he neto' beṉe' Israel dan' zjanyoj ḻe'e ley dan' bzoj da' Moisésen' ¿biṉa' yenele can' ža dan' nyojen? 22 Žan gwnita' c̱hope xi'iṉ da' Abrahanṉa' bi' byo, tobe' gwzan to no'ol ben' goque' esclava c̱he' na' yetobe' gwzan no'ol c̱hecze', no'ole nga bi goque' esclava. 23 Na' bin' gwzan no'ole esclavan' goljbe' dan' gwzoalen da' Abrahanṉa' ḻe', perw bi' gwzan no'ol c̱hecze', goljbe' ṉec̱he Diosen' gože'ne' san no'ol c̱hen' ḻa'czḻa' naque' no'ol güiž. 24 Na' dan' goc c̱he no'ol ca' chzejni'in chio' c̱he chop dan' gwna' Diosen' gone' cont gaclene' beṉe' Israel ca'. No'ole esclava ben' le Agar zaca'lebde' ca ley dan' ben Diosen' mandadw bzoj da' Moisésen'. Bzojen' par da' x̱ozxta'o neto' beṉe' Israel ḻo ya'a Sinaí, na' beṉe' ca' zjazaca'lebde' ca esclavos. 25 Na' doxen nación Israelen' zaca'leben ca da' Agaren' no'ole esclava c̱he da' Abrahanṉa'. Diosen' bnežjue' da' x̱ozxta'oto' ca' leyna' ḻo ya'a Sinaín' gan' nzi' Arabia, na' ža ṉa'aža beṉe' Israel gualaž c̱heto', beṉe' guac ṉacho beṉe' Jerusalén, ṉe' zjanaque' ca esclovos ṉec̱he chesacde' chonen byen yesa'ogüe' costumbr ca' dan' ža leyna'. 26 Perw chio' chejnilaže'cho Criston' naccho txen len yogo' beṉe' šjaya'aque' yaba gan' zoa Diosen' gan' ḻecze nzi' ciuda Jerusalén. Na' ṉezecho bitw chonen byen ga'ocho costumbr ca' dan' ža leyna'. 27 Quinga ža Xtiža' Diosen' dan' nyojen:

Bebe no'ole güiž, no'ole cbi chzan,

bosya'a yeḻa' chbe c̱hio', le' biṉa' gaco' bes c̱he yeḻa' sanṉa'.

Chacdo' bi chaque Diosen' le' da' nono xi'iṉo' zoa,

perw ṉita' zanch xi'iṉo' clel ca nita' c̱he no'olen' ba gwzan xi'iṉ beṉe' byon' gwzoalene'.

28 Beṉe' migw, xi'iṉ da' Abrahanṉa' bin' le Isaac goljbe' ṉec̱he gož Diosen' Abrahanṉa' san no'ol c̱hen' ḻa'czḻa' goque' no'ole güiž. Na' ca'cze chio' chejnilaže'cho Criston', Diosen' none' chio' ca xi'iṉ diaža c̱he da' Abrahanṉa' bin' goljbe' ṉec̱he goc dan' gož Diosen' ḻe'. 29 Bi' c̱he da' Agaren', bin' goljbe' ṉec̱he gwzoalen da' Abrahanṉa' ḻe', bc̱hi bsaca'be' Isaaquen' bin' ben Spiritw c̱he Diosen' cont gwzan da' Saran'. Ca'cze naquen ža ṉa'aža, beṉe' ca' chesa'o costumbr ca' dan' ža leyna' chosoc̱hi chososaque' chio' chejnilaže'cho Criston'. 30 Na' Xtiža' Diosen' dan' nyojen žan Diosen' gože' da' Abrahanṉa': “Bebej no'ole esclavan' len bi' c̱hen', ḻe bitw gwnežjua'be' dan' gwnia' gwnežjua' bi' gwzan no'ol c̱hio'na'.” 31 Da'nan' beṉe' migw, ṉezecho zaca'lebcho ca xi'iṉ da' Saran', gague ca xi'iṉ da' no'ole esclavan'.

<- Gálatas 3 Gálatas 5 ->