1 Na' ca tiempa' rey Herodes bc̱hi bsaque' baḻ beṉe' ca' chesonxene' Jesucriston'. 2 Nach bene' mandadw gosote' Jacobo beṉe' biše' Juanṉa' len spada. 3 Na' gocbe'e rey Herodesen' chesyebe beṉe' Israel ca' dan' bene' mandadw gosote' Jacobon', nach bene' mandadw gosezene' Pedroa' cate' goḻa' ḻṉi cate' chesagüe' yetextil dan' bibi levadura nc̱hix̱en. 4 Nach Herodesen' gwdix̱jue'ene' ḻižya na' gwseḻe' šino'to soldadw beṉe' gosape' ḻižyan', tap güeje' do ža do yel. Herodesen' bene' xbab cueje'ne' ḻižyan' te ḻṉin' cont gone' yeḻa' justis c̱he' lao beṉe' že' ḻo ciudan'. 5 Soldadw ca' gosapchgüe' Pedroa' šlac de' ḻižyan', perw na' ca nac beṉe' ca' chesejnilaže' Jesucriston', goseṉabchgüede' Diosen' gaclene' Pedroa'.
Diosen' bebeje' Pedroa' ḻižyan'
6 Na' to že' ca gwx̱eze ngüia Herodesen' cueje' Pedroa' ḻižyan' cont gone' yeḻa' justis c̱he', Pedroa' de' chtase' ladjo c̱hope soldadw na' ncheje' c̱hope gden, na' ḻecze nita'te soldadw beṉe' chesape' cho'a puert ḻižyan'. 7 Cate'cze zejzenez to angl beṉe' gwseḻa' X̱ancho Diosen' bžine' ḻo' ḻižyan' gan' de Pedroa' na' gwyeni'chgua ḻo' ḻižyan'. Anglen' bte' cuit ḻe'e Pedroa' bosbane'ne', gože'ne':
―Ṉetec ṉa'a gwyas.
Na' ḻa' besyeyežte gdenṉa' zjanchej na' Pedroa'. 8 Nach gož anglen' ḻe':
―Bego'o xpanto' na' bolej xelon'.
Nach ben Pedroa' ca'. Nach gož anglen' ḻe':
―Becheḻe xadoṉ c̱hio' na' beyo'o len neda'.
9 Nach bechoj Pedroa' zena'ogüe'ne' perw bi gocbe'ede' še da' ḻi anglen' chon ca' len ḻe', con gocde' še chle'edagüede'. 10 Beyož besyedie' c̱hop cuen gan' nita' soldadw ca' chesape' ḻižyan', besyežine' gan' zoa puert zaguanṉa' dan' nac de ya gan' chesechoje' cont chja'aque' la cay, con to gualazze puerten' byaljon cont besyechoje', na' cate' ba gosa'aque' late' nach anglen' bocua'aṉe' Pedroa' toze'. 11 Cana'ch gocbe'e Pedroa' da' ḻi ba bechoje' ḻižyan', nach gwne':
―Ba cheyacbe'eda' da' ḻicze X̱ana' Diosen' ba gwseḻe' angl c̱he'na' na' bosle' neda' ḻo na' Herodesen' na' bosle' neda' ḻo yogo' da' ca' chesaque beṉe' Israel gualaž c̱hia' ca' yesonde' neda'.
12 Na' ṉe' chonte Pedroa' xbaben' ca', gwze'e gwyeje' liž María xṉa' Juan ben' ḻecze le Marcos. Na' liž Marían' zjandop zjanžag beṉe' zan chosoḻ güiže' Diosen'. 13 Nach bsiže' cho'a puert zaguanṉa' na' ḻa' bchojte to bi' no'ole le Rode jaṉa'be' non'. 14 Na' cate' bžimbe' cho'a puerten' beyombia'be' ši'i Pedroa', na' tantw bebebe' bi gwsaljwbe' puerten' san beyejsesbe' gan' že' beṉe' ca' jayežbe' ḻegaque' ba bla' Pedroa'. 15 Nach gose'ebe':
―¿Gague chactonto'na'?
Perw ḻebe' ṉezczebe' ḻe'na'. Nach ḻegaque' gose'ebe' naquen bx̱in c̱he'.
16 Perw Pedroa' ṉe' chsižcze' cho'a puerten'. Nach ja'aque' gosesaljue'. Cate'cze besele'ede' ḻe'na' besyebande'. 17 Nach Pedroa' bene' señw len ne'e cont gosenite' šize bosozenague' be'e diža' can' goc bebej X̱ancho Diosen' ḻe' ḻižyan'. Nach ḻecze gože' ḻegaque' cheyaḻa' yosozende' Jacobon' na' yezica'chle beṉe' ḻježgaque' can' ba goquen'. Nach beze'e zjayde' ga yoble.
18 Nach cate' gwyeni', yeḻa' güeban juisyw gwnita' soldadw ca' na' goso'e diža', gosene':
―¿Bixen' goc len Pedroa'?
19 Nach rey Herodesen' bene' mandadw jasyediljue' Pedroa' na' gwṉabde' soldadw gop ca' nac goquen' bele'. Perw soldadw ca' bibi rson bosonežjue'. Nach bene' mandadw gosote' soldadw ca'. Nach gwza' Herodesen' distritw Judean' jazoe' ciuda Cesarea.
Got rey Herodesen'
20 Ca horan' Herodesen' chža'achgüe' beṉe' ciuda Tiro na' beṉe' ciuda Sidón ca'. Perw na' beṉe' ca' beseyažjde' yesezi'e da' yese'ej yesagüe' gan' chnabia' rey Herodesen'. Da'na'na' bosocode' ḻjež beṉe' Tiro na' beṉe' Sidón ca' cont jasenežjue' mechw c̱he ben' nac ḻo ne'e gan' mbane Herodes, ben' le' Blasto. Gosone' ca' cont Blaston' gwṉe' c̱hegaque' lao reyen', ḻe gosaclaže' gwzenag reyen' c̱hegaque' cate' šja'aque' lagüe'na' šjaseṉabe' yesenite' binḻo len ḻe'. 21 Nach rey Herodesen' bžie' bia' to ža gwtobe' ḻegaque' cont güe'e diža' laogaque'na'. Na' cate' bžin žan', reyen' gwyaz xaḻane' dan' nac xdan dan' chaze' cate' chone' yeḻa' justis, nach gwchi'e xišne'e gan' chnabi'e na' be'e diža' lao beṉe' ca' že' žana'. 22 Nach beṉe' ca' bososye'e, gosene':
―Diosen' choe' diža', gague beṉac̱hen'.
23 Na' ḻo hora' gwseḻa' X̱ancho Diosen' to angl ben' ben cont gocšene reyen' gwže'e bzoga' ḻo' ḻe'e na' gote'. Goc c̱he' ca' dan' be'e latje gosonxen beṉe' ḻe' gualaz da' yesonxene' Diosen'.
24 Perw ca nac xtiža' X̱ancho Jesucriston' gos gwlaḻjchguan.
25 Na' Bernabén' len Saulon' beyož gosone' yogo' da' cheyaḻa' yesone' ciuda Jerusalénṉa', nach besyeya'aque' jaya'aque' ciuda Antioquían'. Na' gosec̱he'e to beṉe' le Juan na' ḻecze lie' Marcos.
