1 Beṉe' migw, da' yoble chnia' le'e ca gac cate' yid X̱ancho Jesucriston' yeto, yotobe' chio' šjayzoacho txen len ḻe'. 2 Chṉeyoeto' le'e bitw gacžejlaže'le o žeble še no yid yedezejni'ide' le'e, ṉe' Spiritw c̱he Diosen' žan ba bžin ža yid Jesucriston' da' yoble. Na' ṉeca gacžejlaže'le še bi da' yenele o še la' no cart güenḻaže' da' chesena beṉe' gwseḻa' neto', žan ba bžin ža yid Jesucriston'. 3 Bi güe'le latje no siye' le'e še bi yeseṉe' o še bi da' yesone'. Ḻe cate' za' yid X̱ancho Jesúsen' da' yoble, beṉe' zan yesase' yesyedabague' Diosen'. Ḻecze cana' choj to beṉe' blao beṉe' gonchgüe' güedenag len Diosen'. Benan' ba naquen yeyeje' ḻo yi' gabiḻen'. 4 Gaque' beṉe' ya'laže' na' gue'ede' Diosen' na' ḻecz ca' gue'ede' bite'tezech da' chesejnilaže' beṉe'. Na' cui'e ḻo' yodao' blao gan' chesonxene' Diosen', gon cuine' ca Dios cont yesonxen beṉe' ḻe'.

5 ¿Bi za'laže'le cate' gwzoa' len le'e bzejni'ida' le'e can' gac cate' yid Jesucriston' da' yoble? 6 Na' ṉa'a ṉezeczle bi dan' chžon choj beṉe' blao ben' gonchgua güedenag len Diosen', perw cate' ba bžin ža bžin hor, cana' choje'. 7 Ba nita' beṉe' chesonchgüe' güedenag len Diosen' ṉa'a, perw ṉe' ngaše' can' chesone'. Na' gwžin ža cate' bich soa dan' gwžon yesyedabaga'chgüe' Diosen'. 8 Cana'chen' choj beṉe' blaon' ben' gonchgua güedenag len Diosen'. Nach X̱ancho Jesúsen' yide' nyec̱hjchgüede' be'ni', na' cate' beṉe' blaon' le'ede' ḻe' nach X̱anchon' güe'e diža' na' ši'en goten ḻe'. Can' gone' yoṉitlagüe'ne'. 9 Na' cate' choj beṉe' blaon' ben' gonchgua güedenag len Diosen', Satanás dan' chnabia' da' x̱igüe' ca' gonen cont gapchgüe' yeḻa' guac, na' gone' da' yesyebane beṉe' contze gonḻede' ḻegaque'. 10 Yogo'te da' mal gone' gonḻede' beṉe' ba naquen yesebiaye'e toḻi tocaṉe. Yesebiaye'e da' bi chesejḻe'e diža' ḻin', ḻe ḻenṉa' zaca' yesejḻe'e cont gata' yeḻa' mban c̱hegaque' toḻi tocaṉe. 11 Na' da'nan' Diosen' güe'e latje yeseziye'e ḻegaque' cont yosozenague' diža' güenḻaže'. 12 Nach yesezaca'zi'e toḻi tocaṉe da' bitw gosejḻe'e diža' ḻi c̱he X̱anchon' san besyebede' da' malen'.

13 Beṉe' migw, chaque X̱ancho Jesucriston' le'e. Na' neto' cheyaḻa' soatez soato' güe'to' yeḻa' chox̱clen c̱he Diosen' da' gwleje' le'e cate' biṉa' x̱e yežlion' cont šjayzoale len ḻe'. Na' cate' gwzolao chejḻe'le diža' ḻi c̱he Diosen' nach gwseḻe' Spiritw c̱hen' chonen cont nacle beṉe' laždao' xilaže'. 14 Ṉec̱he da'nan' gwlej Diosen' le'e, na' dan' gwyejḻe'le diža' güen c̱he Jesucriston' da' be'lento' le'e, žin ža gon Diosen' cont soale mba juisyw can' zoa X̱ancho Jesucriston'.

15 Da'nan' beṉe' migw, ḻe soa c̱hac̱h ḻe gwzenag do yic̱hj do laže'le c̱he dan' bzejni'ito' le'e, diža' dan' ba be'lento' le'e na' dan' ba bzojto'. 16-17 X̱acho Diosen' chacde' chio'. Gague da' te c̱he dan' bene' cont beyone'xenḻaže'cho, na' zoacho lez gonche' güen len chio', ḻe nži'ilaže'de' chio'. Na' chṉabda' cuin X̱ancho Jesucriston' len X̱acho Diosen' yesone' c̱hac̱h laže'le na' yesaclenšque' le'e cont yogo' da' gonḻe na' diža' da' güe'le yesaquen güen.

<- 2 Tesalonicenses 12 Tesalonicenses 3 ->