CART GWCHOPE DANꞋ BZOJ POSTLW SAN PABLO C̱HE BEṈEꞋ CAꞋ ŽEꞋ TESALÓNICA

1-2 Neda' Pablo chzoja' le'e chdop chžagle chonxenḻe X̱ancho Jesucriston' Tesalónica na' nacle txen len ḻe' na' len X̱acho Diosen'. Na' neda' len Silvano na' Timoteo chṉabto' lao X̱acho Diosen' na' lao X̱ancho Jesucriston' yesaclene' le'e na' yesone' cont soa cuezle binḻo len xbab dan' yo'o ḻo' yic̱hjlažda'olen'.

3 Beṉe' migw, neto' cheyaḻa' soateze soato' güe'to' yeḻa' chox̱clen c̱he Diosen' c̱he dan' chonḻen'. Cheyaḻa' gonto' ca' da' zejle chejnilaže'chle Diosen' na' zej chaquech ḻježle. 4-5 Da'nan' chbeto' choe'to' xtiža'len' len yezica'chle beṉe' ba gwlej Diosen' na' chesežague' chesonxene' Jesucriston' ga yoble. Choe'to' diža' ca güen chonḻe dan' chyo chc̱hejele chejnilaže'le Jesucriston' ḻa'czḻa' da' zan da' chac c̱hele na' chosoc̱hi chososaca' beṉe' le'e. Da'nan' ṉezecho Diosen' zejcze' to ḻicha da' nc̱hogbi'e zaca'le par yeyejle yaban' gan' zoe' chnabi'e.

6 Na' Diosen' zeje' to ḻicha da' gone' cont yesezaca'zi' beṉe' ca' chosoc̱hi chososaque' le'e. 7 Na' ḻecze zeje' to ḻicha da' gwcueze' yogo'te dan' chyi chzaca'chon'. Gwcuezen' cate' le'echo yetj X̱ancho Jesúsen' ḻe'e yaban' len angl c̱he' ca' beṉe' zjanse'e yeḻa' guac c̱he'. Yetje' nyec̱hjde' yi' beḻ. 8 Na' gwnežjue' da' yesezaca'zi' beṉe' ca' bi zjanombi'e Diosen', na' ṉeca chosozenague' c̱he diža' güen dan' chzejni'in c̱he X̱ancho Jesucriston'. 9 Ḻegaque' yesezaca'zi'e toḻi tocaṉe. Gwbat šjasyenite' len X̱ancho Jesucriston' ben' nac beṉe' zaca' juisyw na' nape' yeḻa' guac xen. 10 Cate' žin žan' yid Jesucriston' da' yoble, chio' chejnilaže'chone' na' naccho ḻo ne'e gwlo'echo naque' beṉe' zaca' juisyw na' yebanecho catec beṉe' güen naque'. Nacto' txen len le'e da' ba chejḻe'le c̱he diža' dan' be'lento' le'e.

11 Da'nan' zoatez zoato' chṉabeto' Diosa' gaclene' le'e gonḻe güen cont yebede' ba gwleje' le'e par nacle xi'iṉe'. Na' chṉabeto'ne' gaclene' le'e len yeḻa' guac c̱hen' cont yeyož gonḻe yogo' da' güen da' ba gwc̱hoglaole gonḻe na' len bica'chle dan' che'nele gonḻe dan' chejnilaže'lene'. 12 Chṉabto' gonḻe cont X̱ancho Jesucriston' gacxene', na' ḻe' gone' ga gacxenḻe txen len ḻe', ḻe Dios c̱hechon' na' X̱ancho Jesucriston' nita'cze' chesaclene' le'e.

2 Tesalonicenses 2 ->