1-2 Na' bich gwzoeto' dan' bi chle'e ḻježchon'. Da'nan' bec̱hoglaže'to' gwseḻa'to' beṉe' ḻježcho Timoteon' gan' zoalen' na' neto' bega'aṉto' Atenas. Timoteon' chone' xšin Diosen' na' chone' txen len neto' chyix̱jue'eto' diža' güen da' chzejni'in beṉe' c̱he Criston'. Gwseḻa'to'ne' bedeyata'yoede' le'e bi soayaše'le na' bedeyene' c̱hac̱h laže'le cont zoac̱hac̱hle chejnilaže'chle Criston'. 3 Gwseḻa'to'ne' gan' zoalen' cont ṉe tole bi gacžejlaže'le bixc̱hen' chyi chzaca'le. Ba ṉezele chio' chejnilaže'cho Criston' cheyaḻa' saca'zi'cho ḻo yežlio nga. 4 Caten' gwzoalento' le'e bzeneto' le'e ḻeca yosoc̱hi yososaca' beṉe' chio'. Na' ṉezele ba chac can' gwnato'na'. 5 Na' dan' bi gocxenḻaža' dan' biṉa' la' rson c̱helen', nachen' gwseḻa' Timoteon' gan' zoalen' cont ṉezda' še do laže'le chejnilaže'le Criston'. Ḻe bena' xbab gocda' še ba gwzoe gwxiyen' benḻen le'e. Ḻe še ba benḻen le'e, con bendadzeto' xšin Diosen' len le'e še ca'.

6 Perw na' bela' Timoteon' dan' bide' gan' zoalen' na' be'lene' neto' diža' güen, gwne' zoale chejnilaže'le Criston' na' chaquele yogo'ḻoḻ beṉe'. Na' ḻecze gwne' chjayze'ele neto' na' zelaže'le yežagcho da' yoble ḻecze can' chaclaže' neto'. 7 Ca'czen' beṉe' migw, chžaglaoto' na' chyi chzaca'to', perw ba beyacxenḻaže'to' gwṉezeto' can' zoateze zoale chejnilaže'le Criston'. 8 Da' ḻi ba beyacxenḻaže'to' na' zoato' mbalaz dan' zoac̱hac̱hle chejnilaže'le X̱ancho Criston'. 9 Na' da'nan' ḻeca chbeto' lao Diosen' can' chonḻe na' ḻeca choe'chguato' yeḻa' chox̱clen c̱he' can' chonḻen'. 10 Ḻeca choḻ güižto'ne' do ža do yel chṉabeto'ne' gone' ga yele'e ḻježcho da' yoble cont gwzejni'ichto' le'e na' šejchle šejnilaže'chlene'.

11 Chṉabeto' X̱acho Diosen' len X̱ancho Jesucriston' yesone' latje yedeṉa'to' le'e. 12 Na' chṉabeto' X̱anchon' gone' cont gaquech ḻježle tole yetole na' gone' ga gaquechle yogo' beṉac̱hen' con catezen' chaqueto' le'e. 13 Chṉabeczeto'ne' gone' cont soac̱hac̱hle šejnilaže'lene' na' gac lažda'olen' xilaže' lao X̱ancho Diosen' sin cbibi doḻa' gaple cate' yid X̱ancho Jesúsen' da' yoble nc̱he'e yogo'ḻoḻ beṉe' ba gwlej Diosa' cont zjanaque' ḻo ne'e.

<- 1 Tesalonicenses 21 Tesalonicenses 4 ->