1 Pedro 3

Can' cheyaḻa' yeson beṉe' zjanšagna'

1 Na' ḻecze le'e no'ole nšagna'le, to tole cheyaḻa' gwzenagle c̱he beṉe' c̱hele. Baḻe' biṉa' yosozenague' xtiža' Diosen', na' še gwzenagle c̱hegaque', yesacbe'ede' xtiža' Diosen' naquen da' güen ḻa'czḻa' bibi ye'lne'. Na' yosozenague' c̱he Diosen' 2 cate' yesele'ede' chaple ḻegaque' bala'aṉ na' chi' yic̱hjle soa cuezle cont lažda'olen' gaquen xilaže' len Diosen'. 3 Na' le'e no'ole, bi ṉacho naquen da' žialao gon cuinḻe xdan yopa'a no yic̱hjle, gwguaḻa' yenḻe no bga', gwguaḻa'le no ret, co'ole no niy de oro, na' c̱hazle lache' šagüe'. 4 Dan' nac da' žialao, gac lažda'olen' güen, ḻa'czḻa' nono chle'e ḻen. Zaca'chguan len Diosen' gaccho beṉe' nex̱jwlaže' na' beṉe' xenḻaže', ḻe bi te c̱he yic̱hjlažda'ochon'. 5 Gosenita' no'ole cani' no'olen' gosejnilaže' Diosen' na' goson cuine' ḻo ne'e. Ḻegaque' gosaque' beṉe' nex̱jwlaže' na' beṉe' xenḻaže' na' bosozex̱jwyic̱hje' cont gosone' bin' gwna beṉe' c̱he to toe'. 6 Da' Sara, no'ol c̱he da' x̱ozxta'oto' Abrahanṉa', gwzoe' bzenague' c̱he beṉe' c̱he' na' gože'ne': “X̱ana'”. Na' le'e še soatezle gonḻe da' güen na' bi žeble, nach yesena beṉe' nacle xi'iṉ da' Saran' lagüe chonḻe can' benen'.

7 Na' le'e beṉe' byo nšagna'le, ḻecze cheyaḻa' gacle beṉe' šagüe' len no'ol c̱hele na' gaplene' bala'aṉ, ḻe bi zjanaque' beṉe' gual can' nac chio' beṉe' byo. Na' ḻecze can' ba nži'ilaže' Diosen' chio' na' noṉe' chio' yeḻa' mban toḻi tocaṉe, ca'tezeczen' ba none' len ḻegaque'. Nachen' cheyaḻa' goncho güen len ḻegaque' cont bibi gwžon gwzenag Diosen' c̱hecho cate' choḻ güižchone'.

Can' goncho še yosoc̱hi yososaca' beṉe' chio' ḻa'czḻa' choncho da' güen

8 Yogo'cho cheyaḻa' goncho toze xbab na' cheyaḻa' yeyaše'cho ḻo' lažda'ochon' še bi da' chac c̱he beṉe' ḻježcho. Cheyaḻa' gaque ḻježcho do laže'cho ca beṉe' biše' ḻjezcho, na' cheyaḻa' gaccho beṉe' šagüe' len beṉe' ḻježcho na' bi gon cuincho beṉe' xen. 9 Še bi da' mal cheson beṉe' len chio', bi ṉacho ḻecze da' mal yebi'icho len ḻegaque'. Na' še beṉe' chesezi'diže' chio', bitw yoži'icho dižan' nac ca' len ḻegaque', san ṉabcho gac da' güen c̱hegaque'. Ḻe Diosen' ba gwleje' chio' cont goncho ca' na' cont goṉe' latje soacho mbalaz. 10 Goncho ca' ḻe nyojen, žan:

Beṉe' chaclaže' soa cueze' mbalaz,

cheyaḻa' gwsaque' bich güe'e bite'teze diža' mal,

na' gwsaque' bich güe'e bite'teze diža' güenḻaže'.

11 Cheyaḻa' cuejyic̱hje' yogo' da' mal na' gone' da' güen.

Cheyaḻa' cuec yic̱hje' gone' con ga zelao saque'de' cont soe' binḻo len beṉe' ḻježe'.

12 Ḻe X̱ancho Diosen' chgüia chṉe'e beṉe' ca' cheson da' zej to ḻicha,

na' chzenague' c̱hegaque' cate' chosoḻ güiže'ne'.

San beṉe' ca' cheson da' xiṉj, Diosen' ngüie' gone' cont yesezaca'zi'e.

13 Na' nono zoa no gone chio' mal še zoatezcho choncho da' güen do yic̱hj do laže'cho. 14 Na' ḻa'czḻa' še tgüej cate' yosoc̱hi yososaca' beṉe' chio' lagüe choncho da' zej to ḻicha, Diosen' gone' soacho mbalaz. Na' bi cheyaḻa' žebcho beṉe', ṉeca gacžejlaže'cho. 15 San cheyaḻa' gonxencho Criston' ḻo' lažda'ochon', ḻe naque' X̱ancho. Na' bate'teze cheyaḻa' soacho probnidw cont yoži'icho xtiža' beṉe' še yeseṉabde' chio' bixc̱hen' zoacho lez šjayzoacho len Diosen' toḻi tocaṉe. Na' cheyaḻa' gapcho ḻegaque' bala'aṉ na' güe'lenchone' diža' šagüe'. 16 Tža tža cheyaḻa' goncho cont ṉezecho ḻo' yic̱hjlažda'ocho bibi doḻa' napcho len Diosen'; nachen' cate' yesezi'diže' chio' da' chejnilaže'cho Criston', yesacbe'ede' ḻe choncho güen na' yesacde' zto'. 17 Yejṉi'a saca'zi'cho ṉec̱he choncho da' güen, še can' chaclaže' Diosen' gac c̱hecho, clel ca saca'zi'cho ṉec̱he choncho da' xiṉj.

18 Ḻe Criston' ḻecze gwdi gwxaque'. Ḻa'czḻa' gwyejcze' to ḻicha len Diosen', bnežjw cuine' gote' ṉec̱he xtoḻa' beṉac̱h tṉi'aze, na' da' bene' ca' zaca'czen' toḻi tocaṉe. Gote' cont ba bozoe' chio' binḻo len Diosen'. Perw ḻa'czḻa' gosote'ne', beyas bebane' ladjo beṉe' guaten', dan' ṉe' zoa spiritw c̱hen'. 19 Na' len Spiritw c̱hen' gwyeje' jatix̱jue'ede' xtiža' Diosen' len beṉe' ca' ba zjanyeyw gan' yesezaca'zi'e toḻi tocaṉe. 20 Ḻegaque' bi bosozenague' c̱he Diosen' ža gwlaste, ḻa'czḻa' gwdape' yeḻa' chxenḻaže' len ḻegaque', gwleze' yosozenague' šlac da' Noén' bene' to barcw xen. Na' to c̱hopga beṉe' goso'o ḻo' barcon' na' bi gosebiaye'e ḻo' nisen', con x̱ono'gue' besyela. 21 Na' dan' goc ca' cani' zaca'leben can' ba gwzoacho nisen' lagüe dan' ba de yeḻa' mban c̱hecho toḻi tocaṉe. Na' gague gwzoacho nisen' cont beyaccho xilaže' len cuerp c̱hechon', san gwṉabecho Diosen' beyone' lažda'ochon' xilaže' cont ṉezecho bibi doḻa' napcho. Na' ba nac lažda'ochon' xilaže' ṉa'a lagüe beban Jesucriston' ladjo beṉe' guaten'. 22 Na' ṉa'a Jesucriston' ba beyepe' yaban' gan' chnabi'e txen len Diosen', na' chosozex̱jw yic̱hj yogo' angl na' yogo' nochle no nape yeḻa' chnabia' chosozenague' c̱he'.

<- 1 Pedro 2 1 Pedro 4 ->