1 Na' gwṉable nac cheyaḻa' goncho len yeḻa' guagw da' chosožie' lao ḻ gua'a ḻsacan' chesejnilaže'. Da' ḻi yogo'cho chejni'icho bibi zjazaca' ḻ gua'a lsaca' ca'. Na' cate' choncho xbab c̱he da' chejni'icho, con chonxen cuincho, perw cate' chaque ḻježcho, cheyiljwlaže'cho nacle goncho cont gaclen ḻježcho. 2 Na' še chaquecho ba gwyejni'icho to da' zejen, cheyaḻa' gacbe'echo bibi de da' chejni'icho ca cheyaḻa' šejni'ichon. 3 Perw cate' chaquecho Diosen', nachle Diosen' nombi'e chio'.

4 Gwṉable še guac gagwcho yeḻa' guagw da' chosožia beṉe' lao ḻ gua'a ḻsacan' chesejnilaže'. Ṉezecho ḻ gua'a ḻsaca' ca' bibi zjazacan', na' toz Diosen' zaque' šejnilaže'chone'. 5 Da' ḻi de da' zan da' chesena beṉac̱hen zjanaquen x̱angaque' da' chesejnilaže'. Na' ḻa'czḻa' nita' beṉe' chesejnilaže' da' de yaba na' yežlion' chesene' da' ca' zjanaquen x̱angaque', 6 chio' ṉezecho toze X̱acho Diosen' zaque' gonxencho, na' ḻe' bene' cont gwxe yogo'te da' zjade na' zoacho cont gonxenchone'. Na' ṉezecho toze Jesucriston' naque' X̱ancho, na' ḻe' bene' yogo' beṉac̱h, beyix̱e' na' bichle da' zjade, na' ḻe' choṉe' yeḻa' mban c̱hecho.

7 Gague yogo' beṉe' ḻježcho beṉe' chesejnilaže' Criston' chesejni'ide' da' nga ṉezecho. Baḻe' zjayolagüe' chesone' xbab beṉe' zaca' ḻ gua'a ḻsaca' ca', na' cate' chesagüe' yeḻa' guagw da' ba bžia beṉe' lao ḻ gua'a ḻsacan', chesacde' chesagüe' da' naquen c̱he ḻ gua'a ḻsacan'. Da'nan' ḻo' yic̱hjlažda'ogaque' chesacde' malen' chesone', ḻe biṉa' yesejni'išagüe'de' naquen' naquen. 8 Na' yeḻa' guagon' bibi zaca' gonen cont yebe Diosen' chio', ṉeca chžonen yebede' chio' še bi gagwcho to yeḻa' guagw o še gagwchon'. 9 Perw baḻ beṉe' biṉa' yesejni'išagüe'de' gague bi nonen len Diosen' še bin' ye'ej gagwcho. Na' ṉec̱he ḻegaque' cheyaḻa' gwsaca'cho can' goncho cont bi goncho ca yeselažoe' ḻo da' malen' ṉec̱he dan' che'ej chagwchon'. 10 Le'e ṉezele nono nac ḻ gua'a ḻsaca' ca', na' da'nan' guac cue'le ye'ej gagwle ga chesone' ḻṉi c̱he ḻ gua'a ḻsacan' sin cbi bi doḻa' gaple. Na' beṉe' biṉa' šejni'ide' cate' le'ede' che'ej chagwle da'na', nach gacde' ḻecze guac gone' ca', perw ḻo' yic̱hjlažda'ogüe' gacde' da' malen' chone'. 11 Na' guacte gwžiayi'cho beṉe' ḻježcho yeḻa' chejni'i c̱hecho, ḻa'czḻa' Criston' bnežjw cuine' gote' ṉec̱he ḻe'. 12 Cate' choncho cont beṉe' ḻježcho chesone' to da' ža yic̱hjlažda'ogaque' naquen da' mal, choncho contr Criston' še ca'. 13 Da'nan' chnia' še dan' chagua' bela' chonen cont beṉe' ḻježa' lažoe' ḻo da' mal, gwbatech gagua'ba' cont ca lažoe' ḻo da' malen'.

<- 1 Corintios 71 Corintios 9 ->