1 Cheyaḻa' gacbe'ele neto' ba gwdix̱jue'eto' xtiža' Diosen' len le'e nacto' beṉe' güen xšin Diosen'. Diosen' ba bzejni'ide' neto' da' nono gwṉeze cani' cont gwsed gwlo'eton' beṉe'. 2 Na' chonen byen gonto' con can' ngüe'e ḻo na'to' gonto'. 3 Na' ca naca' neda', bibi nonen len neda' še no justis c̱he yežlio nga o še le'e ṉale bi chona' can' cheyaḻa' gona'. Na' ṉeca chnia' c̱he cuina' še chona' can' cheyaḻa' gona'. 4 Ḻo' lažda'ogua' chacda' bibi doḻa' napa' len bite'tez da' chona', perw gague da'nan' ṉa Diosen' c̱hia' bibi xtoḻa' de. X̱ancho Jesucriston' ṉe' še chona' can' cheyaḻa' gona' o še bi chonan'. 5 Da'nan' bi cheyaḻa' žialaole ṉale c̱he note'teze beṉe' še chone' can' cheyaḻa' gone' o še bi chone'. Caten' yid X̱ancho Criston' yeto, canan' gone' cont ṉezecho da' nono ṉeze ṉa'a, na' gone' cont gacbe'echo can' nac xbab da' yo'o ḻo' yic̱hjlaždao' beṉac̱hen'. Na' cana' ṉa Diosen' še nocho chon güen.

6 Beṉe' migw, ba be'lena' le'e xtiža' Apolosen' na' xtiža' cate' bzejni'ida' le'e, cont soale gonḻe can' ža Xtiža' Diosen', ḻe bi cheyaḻa' ga'laže'le da' nacle txen len to beṉe' chsedde' le'e na' gue'ele yetoe'. 7 Na' ¿bixc̱hen' chaquele zaca'chle ca yezica'chle beṉe'? Diosen' beṉe' yogo' da' de c̱hele, na' da' beṉ Diosen' yogo' da' de c̱hele, bi cheyaḻa' ga'laže'le. 8 Chacḻjele bibi chyažjele na' chacḻjele ba nacle beṉe' zaca'chgua len Diosen' na' guac ṉabia'le ca no rey, na' chaquele bi chyažjele neto'. Yebeto' šaca' da' ḻi nacle ca no rey can' chaquelen' cont soato' mbalaz txen len le'e. 9 Chacda' Diosen' ba bene' cont beṉe' že' yežlion' yesele'ede' neto' postlw ca beṉe' zjanac ḻa'zelagüe beṉe' bibi zaca', ca beṉe' nchoglaon c̱hegaque' yesate'. Na' beṉac̱hen' len angl ben' že' gan' zoa Diosen' cheseṉe'e can' chac c̱heto' ca to beṉe' chṉe'e to da' yežejde'. 10 Na' da' chonto' xšin Criston' da'nan' beṉe' zan chesacde' bibi zaca'to', perw le'e, dan' ba chejnilaže'le Criston' chaclaže'le yesacde' nacle beṉe' sina'. Chesacde' bibi chac gon neto', perw le'e chaclaže'le yesacde' guac gonḻe bite'teze. Chesonxen beṉe' le'e na' chesegue'ede' neto'. 11 Ža ṉa'aža zan ṉi'a chdeto' gwbin chbiḻ chdonto', bibi xaḻana'to' de, chesebaže' beṉe' neto' na' bibi ližto' de. 12 Len ṉi'a na'to' chonto' žin cont chacbanto'. Cate' chesezi'diža' beṉe' neto', con chṉabto' ṉite' mbalaz, na' cate' chosoc̱hi chososaque' neto', chyo chc̱hejto' bi da' chesonde' neto'. 13 Cate' cheseṉe' c̱heto', choḻ güižto' ḻegaque' diža' šagüe'. Na' ža ṉa'aža nita' beṉe' zan chesonde' neto' ca to no beb dao' o to no da' naquen zban da' ba becho'oṉen.

14 Chzoja' da' nga gague cont gaquele zto' san cont gwzejni'ida' le'e, ḻe nacle ca xi'iṉa' na' chacda' le'e. 15 Na' ḻa'czḻa' beṉe' zan yesaclaže' yososed yosolo'ede' le'e c̱he Criston', bi yesenita' zane' yesacde' le'e ca x̱ale. Perw neda' naca' ca x̱ale, ḻe neda' gwžialagua' gwdix̱jue'eda' le'e diža' güen c̱he Jesucriston' cont chejnilaže'lene'. 16 Na' da'nan' chṉeyoeda' le'e gonḻe can' chonan'.

17 Da'nan' chseḻa' Timoteon' gan' zoalen'. Ḻecze ba nona'ne' ca xi'iṉa', ḻe bzejni'ida'ne' cont chejnilaže' X̱ancho Jesucriston', na' zoacze' chone' can' cheyaḻa' gone'. Na' chseḻa'ne' cont šjayse'ede' laže'le can' gwzoa gwleza' šlac bzejni'ida' le'e c̱he Criston', na' da' bzejni'ida' le'e naquen lebe len da' chzejni'ida' beṉe' gate'teze chesedop chesežague' chesonxene' Criston'. 18 Na' baḻle cha'laže'le chaquele bich yida' gan' zoalen'. 19 Perw chacda' yob yida' gan' zoalen' še Diosen' goṉšque' latje. Na' cate' yida', cana'ch yedeṉa'a beṉe' ya'laže' ca' še yesone' can' chesenen'. 20 Cate' Diosen' chnabi'e yic̱hjlaždao' beṉe', dan' chesonen' chlo'en yeḻa' guac c̱hen', gague xtiža'gaque' na'zen' gwlo'en še chnabi'e yic̱hjlažda'ogaque'. 21 ¿Nac chaclaže'le gona'? ¿Yida' gan' zoalen' na' gona' le'e castigw, še yida' gwlo'a chacda' le'e na' yedeya' diža' šagüe' len le'e? Ḻe gon xbab naquen' chaclaže'le yedeyena'.

<- 1 Corintios 31 Corintios 5 ->