1 Nu mwii na lee Mbakxiil mchaz tub sey. Nu mbin na lee tub xaa mban nii kwenta nzhech ngwzi, nu nzhé xaa:

—¡Te!

2 Mwii na nu myun tub kabay rus lo na; nu lee xaa nzob tich ma nzho tub wez yaa. Nu mkayaa xaa tub koron nu mroo xaa kwenta tub soldad, xaa nzha lo dil zee le xaa gan.

3 Zeera mchaz Mbakxiil stub sey kwaan nak sey rop, nu mbin na lee stub xaa mban nzhé:

—¡Te!

4 Nu mroo stub kabay naxne na, nu lee xaa nzob tich ma mkayaa yalnabeyy zee yo dil lo yizhyo, zee gut re xaa wechxinn xaa; nu mkayaa xaa tub espad kwaan ndok.

5 Zeera mchaz Mbakxiil stub sey, kwaan nak sey yon, nu mbin na lee stub xaa mban nzhé:

—¡Te!

Nu myun tub kabay nagaas lo na, nu lee xaa nzob tich ma nzho tub xobex yaa. 6 Nu xsaww lo dap xaa mban mbin na tub bos kwaan nzhé:

—Gwa, lux nzhobxtil nu sebad zee kar nkee nzhobxtil nu sebad, axta nebse kix xaa tub kil nzhobxtil ka xaa kee xaa zhiin tub mbizh nu nebse kix xaa chon kil sebad ka xaa kee xaa zhiin tub mbizh; per naluxt lu anseyt nixa xis ub.

7 Zeera mchaz Mbakxiil stub sey, kwaan nak sey dap, zee mbin na lee stub xaa mban nzhé:

—¡Te!

8 Mwii na nu myun stub kabay mor lo na, nu lee xaa nzob tich ma le Yalgut. Nu tich lee xaa nze Hades, xaa nabeyy xkyizhyo re xaa ngut. Nu mkayaa xaa yalnabeyy lux xaa tub part lo tap part yizhyo, zee gut xaa re xaa nzho baa lo dil, nu lo yalnlaan, nu lo yalyizh, nu lo re ma wen ma nakap nak.

9 Zeera mchaz Mbakxiil stub sey, kwaan nak sey gaay. Nu myun lo na, xan mdo cheen Dios, re xaa mbit xaa kwent cheen xtizh Dios nel mzaa xaa xkwent Jesucrist. 10 Nu dublegan nii re xaa:

—Lu nak Xaa Nabeyy, nu xaa nzhul nu xaa nali nak. ¿Cho gor naab lu kwent lo re myet yizhyo, nu ted lu re xaa bid kwentaxa mle re xaa nu?

11 Zee mzaa Dios ler rus gak re xaa, nu nzhé xaa lo re xaa:

—Kwaz re gu xep, axta gorna lee re wech gu nu re bzan gu, xaa nzhaal yet, gut re xaa, kwentaxa mbit re xaa gu, nel rese gu nak xmos na.

12 Zeera mchaz Mbakxiil stub sey, kwaan nak xop. Zee mwii na mgun tub xog nye doo. Lee mbizh nguna nagaas, mod ler nagaas; lee mbee nguna naxne mod ren, 13 nu lee re mbal yiba ngob lo yizhyo, mod nzhab ig lo yag leezha nroo mbi nye doo. 14 Lee yiba ta namlutra nu myuna mod tub lee yech kwaan nduuzh, nu rese yi nu rese yizhyo kwaan nzho leen nistoo mcheeya pa nzoba. 15 Nu lee re rey mkaxlaan leen re yeer nu leen kelag. Nu re xaa nabeyy lo re soldad mkaxlaan kwaan lee xaa, nu noka re xaa rik mkaxlaan kwaan lee xaa, nu noka re xaa nabeyy nu re xmos xaa, nu re xaa sbaasa mkaxlaan kwaan lee xaa. 16 Nu mbezh re xaa lo re yi nu lo re ke:

—¡Bla re gu tich re nu, nu bkaxlaan nu lo Dios, xaa nzob naz pa nabeyy xaa, nu lo yalnayii cheen Mbakxiil! 17 Nel mzhinla mbizh gro doo kwaan ted rop xaa ne re myet bid, ¡nu nyent xaa ye ded bid ne!

<- Apocalipsis 5Apocalipsis 7 ->