Mateo 14

Xomod ngut Juan Xaa Nchubnis

(Mr. 6:14-29; Lc. 9:7-9)

1 Re mbizh zee lee rey Herod, xaa nabeyy Galilea, mbin zyen doo kwaan kale Jesús. 2 Zee nzhé xaa lo re xaa nkee zhiin lo xaa:

—Xaa ne nak Juan xaa mchubnis nu mroban xaa stub welt, zee nle xaa re kwaan gro ne.

3 Sbaa nzhé Herod nel Herodías, xngwnaa wech xaa Lip, mle zee mkado Herod Juan kwaan kaden, nu mlo xaa Juan lozhyib. 4 Sbaa mle Herod nel Juan nzhé lo Herod:

—Nawent kano lu me mod xngwnaa lu.

5 Zee nzhekla Herod gut Juan, per nzheb xaa ne xaa re xaa yezh, nel lee re xaa yezh mbezh lee Juan nak tub xaa nzaa kwent kwaan nzhé Dios lo xaa.

6 Gorna nguxoob Herod liin zee mle Herod tub yalni. Nu lee xchap Herodías mzelo mkanii lo re xaa nzhi baa, nu ngula doo Herod mod mkanii me, 7 zee mcheroo xaa lo me nu nzhé xaa lo me:

—Naab loka kwaan nzhekla lu lo na, na zaaya.

8 Xnaa me nzhé lo me xana kwaan nzhaal naab me, zee nzhé meya lo Herod:

—Choog yek Juan Xaa Nchubnis nu blooya leen yann nu zaaya lo na.

9 Nales doo ngok lextoo Herod. Per zyen doo xaa mbin lee Herod nzhé kwaane lo me, zee nzhé Herod lo tub xaa, zee zaa xaaya lo me. 10 Zee mxaal xaa xaa yachoog yek Juan leen lozhyib. 11 Zee mbe xaa yek Juan nu mloo xaaya lo tub yann, nu mzaa xaaya lo me, nu lee me mzaaya lo xnaa me. 12 Mzhin re xaa mseed lo Juan nu mbe xaa kwerp cheen Juan zee kach xaa xkwerp xaa. Gwluzh zeera ngwa xaa nu ngwayé xaaya lo Jesús.

Jesús mzaa kwaan ndaw gaay mil xaa

(Mr. 6:30-44; Lc. 9:10-17; Jn. 6:1-14)

13 Gorna mbin Jesús lee Juan ngut, zee nguxoob xaa leen tub kano, zee ya xaa pa nyent myet. Per ngune re myeta nu mroo re xaa yezh nu nzenii xaa nzhake xaa tich Jesús. 14 Zee mla Jesús leen kano, zee mwii xaa lo zyen doo myet nzhake tich xaa. Mles lextoo xaa ne xaa re xaa, zee msekwen xaa re xaa ne nzak, xaa nzhano re xaa lo xaa. 15 Gorna nzhazhela yizhyo lee nu, xaa mseed lo Jesús, mbii gax lo xaa nu nzhé nu lo xaa:

—Ngulola mzhel yizhyo nu nyent yoo nee to kwaan gaw re be. Xaal re xaa zee yakwaan xaa kwaan gaw xaa re yezh nzhi gax nee.

16 Lee Jesús mkeb lo re nu né:

—Nankint nya re xaa. Zaa gu kwaan gaw xaa.

17 Per re nu nzhé lo xaa:

—Nankanot nu kwaan zaa nu gaw re xaa, nebse gaaya pan nu chopaka mbal nkano nu.

18 Jesús né:

—Teno guya nee.

19 Zee nzhé Jesús lo re myet:

—Bzob gu lo yixyi wen.

Nu mzen xaa gaaya pan nu rop mbal, nu mwii xaa naz yiba, nu mzaa xaa dixkix lo Dios. Nu mle rol xaa pan nu mzaa xaaya lo re nu, xaa mseed lo xaa, zee kiiz nuya lo re myet. 20 Rese xaa ndaw axta paro nguzhe lextoo xaa. Nu chiibchop chekwid pan byog mlake gorna ngulo ndaw re xaaya. 21 Nu gaay mil xaabyi nak xaa ndawa nu namloot xaa kwent re ngwnaa nu re madwin.

Jesús mze lo nistoo

(Mr. 6:45-56; Jn. 6:16-21)

22 Gwluzh ngulo mded kwaane, Jesús mxaal re nu, xaa mseed lo xaa, zee yixoob nu leen kano zee deed nu stub ta roo nistoo. Per lee Jesús mlakeka lo re myet axta yilo chech xaa re xaa. 23 Gorna ngulo mxaal xaa re myet nya, nu lee xaa nguxoob yek yi pa wdizhno techosa xaa Dios. Gorna ngulo mzhel yizhyo techo xaa nzo baa. 24 Nu lee kano nzha xsaww leen nistoo gorzee. Nu lee mbi nze naz lo kano zee ngit doo nistoo, nu nanlat nis nzeno nu kano naz delant. 25 Nzhaka xnila yizhyo lee Jesús nzhaze lo nistoo nu nyaad gax lo re nu. 26 Gorna ngune re nu lee xaa nzhaze lo nistoo, mbazhe nu nel mzheb doo nu, zee nzhé nu:

—¡Besa!

27 Per Jesús nguné lo nu:

—Blo gu balor lextoo gu, nazhebt gu, nel naya.

28 Zee lee Pér nzhé:

—Xaa Nabeyy, cheleeya luya, ble zee noka na ze lo nistoo yal lo lu baa.

29 Jesús nzhé lo xaa:

—Te nee.

Zee lee Pér mla leen kano nu nzhaze xaa lo nistoo nzha lo Jesús. 30 Per gorna ngune Pér nroo doo mbi zee mzheb doo xaa, nu nzhala Pér naz leen nistoo. Zee mbazhe Pér nzhé Pér:

—Xaa Nabeyy, nalaat lu la na leen nistoo.

31 Gorzee lee Jesús mzen yaa xaa, nu nzhé lo xaa:

—¡Chepse ngwii lu lo na! ¿Chozhiin nzho stub xgab yek lu?

32 Gorna nguxoob xaa leen kano lee mbi mlaz. 33 Zee lee re nu, xaa nzho leen kano mkichxub lo Jesús nu mbill nu lo xaa, nu nzhé nu lo xaa:

—Wlipa lu nak Xgann Dios.

34 Zee mded nu stub ta roo nistoo, mzhin nu tub yezh kwaan le Genesaret. 35 Gorna ngokbeyy Jesús lo re xaa, dubse yizhyo ba mdizh xaa kwent cheen Jesús. Kwaanzee ngulaa re xaa xaa ne nzak lo Jesús. 36 Nu ngunaab re xaa lo Jesús, zee zaa Jesús diizh gal re xaa ne cho xab Jesús, nu re xaa mgal cho xab Jesús nzhakwen xaa.

<- Mateo 13 Mateo 15 ->