2a de Corintios 6

1 Lee nal, nel nkee nu xchiin Dios, naab nu lo re gu kayaa gu re kwaan nzelazh Dios, nu nakayaat guya mod tub kwaan sbaasa. 2 Nel lo Xkyech Dios nzhé Dios:

Leezha nzho mod le na yudar lu,

mroo na xjabor lu,

nu mbin na xtizh lu;

mbizh kwaan nle xaa gan yalnaban. [Is. 49:8]

Bwii gu, nalzhe nak mbizh kwaan nroo Dios xjabor be. ¡Nalzhe nak mbizh le xaa gan yalnaban!

3 Nu nik tub welt zer le nu zee ralnii tub xaa lo xcheen Dios, zee snee nyent mod nii xaa nawent nak xchiin nu. 4 Per nela gu xomod nle nu rese kwaan mod xmos Dios, axta nyela nu nded nu re bid nu re yalzi, 5 nu mzaa xaaya yenn nu, mlo xaa nu lozhyib, nayii xaa ngune xaa nu, mkee doo nu zhiin, nu namlat mkaal lo nu pa mlaz nu yaal, nu mded nu bid lo yalnlaan. 6 Noka nlu lee nu nak xmos Dios lo re kwaan nali nle nu, lo re kwaan nzhak nu, nu mod nyela nu nded nu bid, nu mod nadoo nak nu, nlu nzho Mbi Naban cheen Dios lextoo nu, nel nkela nu wechxinn nu. 7 Noka nlu nak nu xmos Dios nel nii nu kwaan wli, nu nlu nkano nu yalngezh cheen Dios nseed nu re myet nu ndildiizhka nu kwaan myet. 8 Lak mbizh ngwii re xaa respet lo nu zlak mbizh nayii xaa ne nu, lak mbizh nzhedizh nawent xaa nu, zlak mbizh nzhedizh wen xaa nu. Mod tub xaa nkade nle xaa nu, nixa kwaan wli nii nu. 9 Nle xaa nu mod tub xaa nanlabeyyt xaa, nixa nlabeyy wen xaa nu. Nle xaa nu mod tub xaa ngut per seetaka mban nu; nchezi xaa nu, per nanzhuta xaa nu. 10 Nle xaa nales nzhak nu per tubka nix nzhak lextoo nu; nlu nu mod tub xaa prob per nle nu zee ngok rik zyen xaa; nal nik tub kwaan nankanot nu per nixa sneeya rese kwaan nkano nu.

11 Wech nu bzan, xaa yezh Corinto, ngunii nu duzna kwaan wli lo re gu, nu noka kwaan dub lextoo nu nkela nu re gu. 12 Per namlaat nu kela nu re gu per lee re gu nankelat gu re nu. 13 Kwaanzee, naab na lo re gu mod naab tub xaa lo xinn xaa, bkela gu nu mod nkela nu gu, modxa nzhaal kela gu.

Be nak yidoo cheen Dios xaa mban

14 Nyent mod yo tub xaa Jesús kwaan tub xaa nanakt xaa Jesús, kwaanzee nyent mod yo kwaan wen lo re kwaan nawent, nu nyent mod zhaal xni kwaan yalnakaw. 15 Nyent mod yo Jesucrist kwaan Maxuu, nu nixa nachult yo tub xaa Jesús kwaan tub xaa nanakt xaa Jesús, nel nalalt nle xaa xgab. 16 Nu nik tub kwaan nanakt lal lo yidoo cheen Dios nu lo yidoo cheen re maj. Nel re be nak mod yidoo cheen Dios, xaa mban. Mod né Dios:

Yoo na kwaan re xaa ne,

nu nzheze na kwaan re xaa ne;

na gak Xdios xaa,

nu lee xaa gak xaa na. [Lv. 26:12; Ez. 37:27]

17 Nu kwaanzee noka né Xaa Nabeyy:

Broo gu lo re xaa ba,

bachii gu lo xaa,

nagalt gu kwaan nanzhult lo Dios,

zee kayaa na re gu, [Is. 52:11]

18 nu na gak Xuz rese gu,

nu gu gak re xgaan na nu re xchap na,

snee né Xaa Nabeyy, xaa nkano gro doo yalngezh. [2 Sam. 7:14; 1 Cr. 17:13; Is. 43:6; Jer. 31:9]

<- 2a de Corintios 5 2a de Corintios 7 ->