MARCOS 3

Biac tib mgui ne mband tib nia

(Mt. 12:9‑14; Lc. 6:6‑11)

1 Goḻ stib dze ne rdziiladz zho lo dziin, güey Jesús leṉ yadoo win ne zob lad guiedz co. Lad grë miech ne no leṉ yadoo co, no tib mgui ne mband tib nia. 2 Nzian zha ne ndxie ga, quialeets zho Jesús dieṉ pe zuṉguiac me nia mgui co dze ne rdziiladz zho lo dziin. Quiambëz zho dieṉ pe guṉ me, par gdziel pe yquiaaqui zho me. 3 Dzigo bredz me mgui co, bnabey me bzo mgui groḻtaa lo grë zha ne ndxie ga; 4 blozh ga rëbchaa me lo zho:

―¿Pe nadieṉ rzac to nonguieḻ guṉ ne dze rii? ¿Pe nonguieḻa guṉ ne ncuaaṉe yquiin, te nonguieḻa guṉ ne guieḻntseeb ye? Zig nac samiech ne zha ne noxtseeb xquieḻmban, ¿pe maase csaan ne guet zho?

Ni tib zho pquiabd. 5 Dze bui me lo zho grëse zho, wbiṉladz guic me, ni mban goc zdoo me goṉ me scataa ntseeb zdoo zho; dzigo rëb me lo mgui co:

―Bzigaa nia luu.

Zigne bzigaa mgui nia mgui, laaw biac.

6 Grë zha farisé, ni grë zha ne nacnie rey Herod, zigne briee zho ga laa zho psilo bnediidz dieṉ zha gdeeda diidz gut zho Jesús.

7 Leṉ dze co, tib vuelt bdziṉ Jesús ro nisdoo grë xpëëdscuel me. Miech guizhiu ne naḻ zhits zho, ga zie grë zha ne ziaad nëz Galilé, grë zha ne ziaad nëz Judé, 8 grë zha Jerusalén, grë zha ne ziaad nëz Idumé, grë zha no dib nëz daṉ ro guiubee Jordán, grë zha ne no dib gax guiedz Tiro ni guiedz Sidón. Miech guizhiuw, sac ron zho grëtaa milagr ne ruṉ me.

9 Dzigo bnabey Jesús xpëëdscuel me, yguib zho tib leṉ barcw zaatne gac so me zeeṉa ctaagwd grë miech co me. 10 Zëëble diidz ndal miech ziyuṉguiac me, dzigo grëse zha ne rlan pe guieḻguidz, rbigbe zho dieṉ zha grieelo maase lad xab me xeṉ zho.

11 Grë meṉdox ne noguitnie miech, zeeṉe raṉ ma me, ruṉquiitsgzhib ma zha ne noguitnie ma lo me ni rquiaadan ma redz rnee ma:

―¡Xpëëd Dios nac luu!

12 Per ractox me lo ma, rsaand me gnee ma parne xoobneṉd cho nac me.

Ble Jesús gza tsiipchop xpëëdscuel me

(Mt. 10:1‑4; Lc. 6:12‑16)

13 Blozh ga biep me tib guic gui win zob ga, ga bredz me zha ne gocladzse me. Zeeṉe pcaalsa zho grë zho, 14 dzigo lad co ble me tsiipchop zha ne sënie me, zha ne cxeeḻ me tsieseed miech Xtiidz Dios. Lëë zha co bleelë me poxtl, 15 ni bdeed me poder lo zho guṉcxooṉ zho meṉdox.

16-19 Znu lë gza tsiipchop zha ne ble me ga:

Simón (lëë Simón co bleelë me Pedr),

Jacob ni Juan (xingan Zebedé, zha ne bleelë me “Zhin Nguzi” “Boanerj”).

Ndrés,

Lip,

Bartol,

Matew,

Mazh,

Jacob (xingan Alfé),

Tadé,

Simón (zha ne nacgrë zha ne racladz cuee zha Roma xtan zho)

ni Judas Iscariot (zha ne güeyto me).

Rëb zho meṉdox nacnie Jesús

(Mt. 12:22‑32, 46‑50; Lc. 8:19‑21; 11:14‑23; 12:10)

20 Wbire Jesús ga, laa me bdziṉ ro yu grë me zho. Scasaque ndal miech ne pcaalsa ga stib, ni rdeetew diidz gownie me zho. 21 Zeeṉe bin meṉlidz mew, dzigo briee zho ziexi zho me, sac rëb zho bod rzhiṉle guic me.

22 Haxta grë maistr ley, zha ne briee nëz Jerusalén bdziṉ ga, rnee zho:

―Beelzebú, ma ne rnabey lo meṉdox, ma co nacnie me gane rrieelo ruṉcxooṉ me meṉdox.

23 Dzigo bredz me zho bzodiidz me tib cuent lo zho, rëb me:

―¿Pa naṉ to na grieelo lëëque meṉdox guṉcxooṉ sameṉdox ma? 24 Teḻ tib guiedz nadieṉ gac miech chop dii, csilo zho tiḻlsa zho, ¿niacxe nitlod guiedz co? 25 Tib diigaa miecha, teḻ csilo zho lëëque zha tiḻnie meṉlidz zho, ¿niacxe nitlod zho? 26 Scaquegaa meṉdox nagoṉ, teḻne lëëque lëë ma tiḻnie sameṉdox ma, ¡pe nale na bnitlo ma! 27 Masaque nac meṉdox zig tib zha ne no xfuers, zha ne gacladz cuee grë ncuaaṉe no lidz zha co, none cxidoogazh zho zho.

28 ’Gneli naa lo to gaṉle, grëse doḻ ne ruṉ miech, grë teḻ zha rguie zho, rdzibdee zho, bii zuṉ Dios zho perdon miṉ co; 29 saṉgue zha ne gneenë Espíritu Sant, doḻ nroob ga ruṉ zho, gdziṉd dze ne guṉ Dios zho perdon.

30 Sca rëb me lo zho, sac sca quianee zho rëb zho meṉdox nacnie me.

31 Horco laa xniaa me ni zha bets me bdziṉ, per leyse blëz zho; dzigo pxeeḻ zho zha ne zietsedz me. 32 Blalaa zha ne zob gaxpaa lo me, zha co beeṉ vis rëb zho:

―Laa xniaa luu goṉ, ni zha bets luu ziaadguib luu.

33 Pquiab me rëb me:

―¿Xnia naa ye, bets naa ye?

34 Dze bui me lo grë zha ne ndxie ga, dzigo rëbchaa me:

―To goṉ nac xnia naa, to nac bets naa. 35 Sac grëse zha ne ruṉ miṉe racladz Dios, lëë bets naa ga, lëë bzian naa ga, lëë xnia naa ga.

<- MARCOS 2 MARCOS 4 ->