HEBREOS 8

Jesúsle nac meṉ ne rteed xtiidz ne

1 Lo grë miṉe quiane naa nu, miṉe racladzpaa naa gacnaṉ to nac miṉ rii: Jesús nac zhipxoz nroob ne, ni zaatne zob Dios, meṉ nroob ne rnabey, ga zob me. 2 Gbaa no me, ga quiayuṉ me dziin zaatne nacpaa yadoo, Dios bzaa yadoo co, led yedraa miṉ co bzaa miech.

3 Ndioṉ ne gaṉle, zha ne rac pxoz nroob, laa zho rzo, zeeṉa grë ma, grëgaa ncuaaṉe rgogon miech, zha rdeeda lo Dios; scaquegaa Jesús, ye me bdeed me gon lo Dios. 4 Teḻ niaca miṉe bii no me lo guidzliu niina, grieelod gac me pxoz nroob, sacne nole pxoz nroob ne rdeed grë gon co lo Dios, zigne rnabey ley. 5 Grë dziin ne ruṉ grë zha ne rac pxoz nroob lo guidzliu rii, lega nacsew zig zhimlë grë miṉe rac gbaa; yadoo ne rio zho lo guidzliu riiw, lega nacsew zig zhimlë yadoo ro ne zob gbaa. Goḻsoladz gaṉle, zeeṉe laa Moisés gzaa yadoo, rëb Dios lo me: “Zigne goṉ bluse naa lo luu guic gui ga, sca none gzaa luuw.” 6 Gacxe waa, teḻ Jesús meṉ ne nac zhipxoz nroob ne niina, mazdraa non dziin ne quiayuṉ me; sac goṉ, zeeṉe pso Dios me gac me pxoz nroob, psaṉ Dios diidz stib zha grieelo ygaa ne grë guieḻnzaac nroob ne gneedz Dios lo ne, ni me guṉctsiṉ ne lo Dios.

7 Wenraa nac diidz ne psaṉ Dios ga, sac teḻne niaca nlëb diidz ne biaaṉ glo ga zeeṉe rëb me zha guiaaṉwen miech lo me, dzigo nod pe nacne mbiire nsaṉ me stib xtiidz me. 8 Ni bzeetlegaa me ne laa me csaṉ stib xtiidz me, sac grë zha ne biaaṉnie xtiidz me glo, loxaque beeṉctal zho xtoḻ zho. Miṉ co ga raquiet lo Xtiidz me, zaatne znu rnee:

Rnee meṉ ndzon ne rnabey: Zdziṉ dze ne gbiire guiaaṉ no diidz grë no zha Israel, ni zha Judá.

9 Per gacdraaw zig diidz ne biaaṉ no grë no xmeṉgol zho,

zeeṉe rrieequia bzheeṉ naa nia grë zha gol co, blee naa zho lo caxtigw ne noded zho Egipt;

sac ni lalnu güeynaḻd zho diidz ne biaaṉ no ga,

nacne niicle naagaaw, psaanladz naa zho.

10 Zeeṉe gdziṉ dze co,

znu nac diidz ne guiaaṉ no grë no zha Israel:

Grëse xley naa, nis nis gacnaṉ zhow,

zig nac zeeṉe haxta leṉ zdoo zho, leṉ guic zho zhobneew.

Dzigosi laa zho guṉbey naa ne naa nac xDios zho,

ni niicle naagaaw, laa naa guṉbey zho ne lo naa ngab zho.

11 Dzigosi yquiindraa tso zho gnee zho lo meṉlidz zho, lo meṉladz zho: “None guṉbey luu Dios goṉ.”

Sac leṉ dze co, grëse zho ruṉbeyle zho naa,

niicle zha ne mazdraa wina, niicle zha ne mazdragaa nona.

12 Teḻ pe nactaa xquieḻntseeb zho, zuṉ naa zhow perdon;

gdziṉdraa dze csoladz naa grë falt ne beeṉ zho lo naa.

13 Zeeṉe sca bzeet me ne laa me csaṉ stib xtiidz me, ga rlu ne rquiindraa miṉe biaaṉ glo ga; sac nac grë ncuaaṉ gox rquiindraaw, laaw nole par nitlow.

<- HEBREOS 7 HEBREOS 9 ->