1 Bets, bzian, nana par gni naa lo to dieṉ pe guidze te guieel guiaad me, choot ndioṉda. 2 Goḻgacnaṉ gaṉle, lega nacle zeeṉe gaṉ miech laa me ziaadle, zig nac zeeṉe rzëëb ngbaan yu guieel, ¿cho dieṉ naṉpaa pa hor sëëb ngbaan? 3 Zeeṉe laa grë miech guiab: “Nasi wen ndxie ne, peet guieḻxtseeb nodraa”, tibaque zeeṉe guieṉ zho laa dze ne nitlo zho bdziṉle, ni gasi grieelodraa cho csilaa zho. Sac zig znuse rnaaz yoob meṉ wnaa ne bdziṉle dze gap xpëëd; scadaa gdziṉ dze co.
4 Saṉgue to, bets, bzian, nacdraa to zha ne nonziaab lo ncow, teḻ pa hortaa guiaad me nsinle zo to; sacdraa to dze co zig rzac miech ngbaan, lega nacle zeeṉe raṉ zho laa ngbaan rdziṉ. 5 Miech ne nole lo xbiini Dios nac to, niini zo to; nacdraa to zha ne no glowtaa guieel, zha ne no lo ncow; 6 gacxe nagoṉ waa, niini goḻso, tsienaḻde to miṉe ruṉ zha ne zienaḻ guieḻntseeb; sac nac grë zha co zig nac zha ne nixguies, tibaque guieel no zho. 7 Sac teḻ guieela, guieel raaguies miech, niicle zha ne rzuudzgaaw guieel rzudz zho. 8 Saṉgue ne ne nac ne zha ne niini zo, none guieṉ ne pe nac ncuaaṉe noyac. Tibaque dib zdoo ne gliladz ne Dios, gleynie ne samiech ne, zeeṉa csaaca ne zig rsaac ncuaaṉe racw meṉguiib lo grë ncuaaṉe gnitlo zho; ni csoladz ne gaṉle laa Dios psilaale ne lo guieḻgut, gotsaa ziaac new zig rzac meṉguiib pchog ne rzob guic zho rsilaaw zho lo guieḻgut. 9 Sac goṉ bredzdaxe Dios ne waa ygaa ne guieḻnëdox ne no guiaad, sinque laa me bredz ne csilaa me ne lo guieḻnë co. Ni lëë miṉ co rac zeeṉe laa ne rliladz Jesús. 10 Zeeṉe gut Jesús, ga bdiizh me xtoḻ ne; zeeṉa yase mban ne o gutlegaa ne gaḻ dze ne guiaad me, per me gbannie ne.
11 Nana sca, tib tib to goḻdeed xfuers zha ne nacgrë to, niapse diidz ne guṉ xyudar zho choobraa zho lo Xtiidz Dios, miṉ co goḻnee lo zho; zigne quiayuṉaque to niina.
14 Teḻ cho zha ne nacgrë to i, rsilo quiayacgbech, goḻgactox lo zho, zeeṉa guieṉ zho guṉ zho dziin. Grë zha ne quiasaan Xtiidz Dios, goḻnee lo zho zeeṉa gleynie zhow stib; grëgaa zha ne gard tsoguicpaa zha naca, goḻguṉ xyudar zho tsoguic zhow; niicle grëragaa zha ne nacgrë tow, ib guieedniede to zho. 15 Goḻguieṉ teḻ pe guieḻntseeb ne ruṉ miech lo to, guiabde to ne scaque guṉ to zho; sinque mazd goḻtsoxco tibaque niowse goḻgac lo grëse miech, niicle lo zha ne nacgrë tow, niicle lo grëragaa miecha.
16 Tibaque nley goḻco zdoo to.
17 Tibaque goḻzodiidznie Dios.
18 Goḻdeed xquizh lo Dios, niicle zeeṉe noyaṉ to guieḻnëw, zeeṉa nogaa to guieḻbleya, sac sca racladz me guṉ grëse zha ne no xnëz Jesús.
19 Goḻquiaadiag miṉe rnee Espíritu Sant lo to, ni goḻguṉa.
20 Goḻquiaadiag miṉe rnee grë zha ne rnee grë diidz ne rsiaab Dios guic zho; 21 wen wen goḻwi dieṉ pe nac miṉe rnee zho, dzigo miṉe rzac to rquiinraa lo to, miṉ co goḻseed.
22 Goḻbiche lo grëse guieḻntseeb ne no.
23 Dios, meṉ ne rtiche grëse dzeb, grëse zhgab, mezhal csaṉmbe to lo grëtaa guieḻntseeb; dib nacse to (zhiespíritu tow, xalm tow, xcuerp tow) zeeṉa ni tib doḻ rapde to gaḻ dze ne laa Jesús meṉ ndzon ne rnabey ne gbiire guiaad stib. 24 Me bredz to, ni mesi ruṉ me miṉe rnee me, gane ndioṉ no ne ib zuṉ me miṉ rii.
25 Grëse to bets, grëse to bzian, laa naa rnab lo to goḻsiguieḻ goḻnab lo Dios gacnieṉ me no.
26 Goḻcaania zhibdiuzh no i, iṉe goḻxeṉ nia grë zha ne nacgrë to, goḻlu ne nli rleynie to zho.
27 Meṉ ndzon ne rnabey, me rnabey naa laa naa rso diidz lo to, glab to guits rii lo grëse zha ne nacgrë to i.
28 Jesús, meṉ ndzon ne rnabey ne, me glu lo to gaṉle pa lotaa noxco me to.