1 Zig zobwi Jesús meṉ ndzon ne rnabey, laa no rso diidz lo to: zigse zie dze goḻtsoxcoraa gban to zigne rdziladz Dios, 2 beṉque naṉle to zhaw, sac lëë miṉ co bnabey Jesús no biadseed no to guṉ to. 3 Sac goṉ, laa Dios racladz mbe guiaaṉ to lo me, guṉde to guieḻyozh yquiangob to zha ne led tsieelde to.

4 Grë zha bgui, zeeṉe laa zho gnee lo tsieel zho, none niowse ndzinli gac zho; 5 guṉd zho zigne ruṉ grëraa miech ne naṉd zha nac Xtiidz Dios; sac teḻ zha co, rzac zho loxaque par gdeedse guxt xcuerp zho, miṉcose rquiin wnaa. 6 Niicle yquiangobde to tsieel sabgui to; sac zha ne sca ruṉ, sabgui zho ga rguitnie zho; ni doḻ co ible tedsod zuṉquizh Dios zhow. Goḻsoladz gaṉle psole no diidz rii lo to glo, ni na laa no rneequew stib. 7 Goḻguieṉ gaṉle, bredzdaxe Dios ne waa parne dziuuṉ ne grë guieḻyozh, sinque laa me bredz ne gban ne zigne racladz me. 8 Gacxe waa, zha ne zienaḻd wseed rii, gacnaṉ zho gaṉle xtiidz Dios ga (meṉ ne rdeed Espíritu Sant lo zha ne ngab lo me) noguiits zho, led xtiidzd choḻze samiech zhow.

9 Laa zig nac guieḻwleynie, naṉle to zha no gleynie to grë zha ne nacgrë to. Rquiind cso no diidz lo to dieṉ zha guṉ to, sac Dioszhal pseed to zha gleynie to zigtaa zha ne nacgrë tow, zigtagaa grë samiech tow. 10 Zig nac grë zha bets ne, zha bzian ne, zha ne no xtan zha Macedon, zëëb diidz rleynie to grë zha co. Goḻtsoxco sca, goḻleynieraa samiech to.

11 Ni stib miṉe rso no diidz lo to: niowse goḻbannie samiech to. Miṉe nac xtsiiṉ to tib tib to, miṉ co goḻtsoxco, tozhal goḻdziniaa ncuaaṉe yquiin to; 12 zeeṉa peet guṉfalte lo to, ni scagaa grë zha ne gard gliladz Xtiidz Dios, haxta gzee zdoo zho gaṉ zho zha mban to. Goḻsoladz gaṉle psole no diidz rii lo to glo.

13 Bets, bzian, nu na gaṉle laa naa gzodiidz lo to zha gac grë zha ne ret, zha ne ngable lo Dios; zeeṉa tsode to guieḻnë zig rzac grë miech ne gard guieṉ gnalo Jesús.

14 Ne, ne dib zdoo ne rliladz ne nli gut Jesús ni bleeban Dios me; scaquegaa none gliladz ne ible zbeeban Dios grëse zha ne dib zdoo rliladz Jesús, zeeṉe laa Dios cxeeḻ me guiaad me stib. 15 Goḻgacnaṉ sca gaṉle, znu goṉ nac xtiidz me: Grëse zha ne ngab lo me, zha ne bii zomban gaḻ dze co (gaḻ dze ne guiaad Jesús) tednerd zho lo grë zha ne gutle. 16 Zeeṉe laa me guiet gbaa, redz ro ne yquia, zlu zëëb tsi tib zha ne quianabey, tsi tib anjl ne nonraa, ni tsi zhitrompet Dios; hor co laa me guiet gbaa, laa grë zha ne ngab lo me, zha ne gutle, laa zho grieeban. 17 Dzigo tipse gac zho grë zho zha ne bii zomban ga, laa zho soquia laglaa lo xcow tsiedzieelo zho me; dzigosi gdziṉdraa dze ne gbiche zho lo me.

18 Nana sca miṉe rne naa nu, goḻsodiidza lo grëse zha ne nacgrë to; zeeṉa conley to zdoo zho.

<- 1 TESALONICENSES 31 TESALONICENSES 5 ->