1 Zigne nagoṉ zac guṉ to grë ncuaaṉe wen ne racladz to, scaquegaa naa, zac gnab naa ncuaaṉe wen ne racladz naa. Teḻ naa goṉlo naa Jesús meṉ ne rnabey ne, Dioszhal bzo naa pxeeḻ me naa none naa Xtiidz me. Ne squi ptsëë Dios lo xquieḻmban to zeeṉe biaḻseed naa to, i rlu gaṉle me nacnie naa.

2 No zha ne rzac nlid Dios pxeeḻ naa, saṉgue to naṉwen to gaṉle me pxeeḻ naa, sac goṉlo to miṉe beṉ naa, miṉe blu naa; ni scagaa niina, lo xquieḻmban to i rlu gaṉle ne nli xtsiiṉ me quiayuṉ naa. 3 Grë zha ne sca rzac nlid Dios pxeeḻ naa, rzac zho peet raguiaḻd naa, gacnaṉ zho gaṉle: 4 ¡Raguiaḻ naaw goṉ! Ni grëragaa zha ne rdziuuṉgza no xtsiiṉ Dios, rioguiaḻ no gneedz to ncuaaṉe yquiin no, gneedz to zaatne gbiaaz no. 5 Teḻ naa, haxta raguiaḻ yquianie naa tib meṉ wnaa ne gac tsieel naa, iṉe sënie naa me zigne ruṉ grëraa zha ne rdziuuṉgza no dziin rii, zig nac Pedr, zig nacgaa grë zha bets meṉ ne rnabey ne. 6 ¿Te loxaque grop no Bernabé naye znu zhaaque no dziuuṉ no stib dziin, par gdziniaa no ncuaaṉe dioow no? 7 Goḻgaṉ gaṉle, zig nac zha ne rzëëb lo xtsiiṉ meṉguiib, ¿niacxe zhaa lo dziin ne rdziniaa zho ncuaaṉe row zho rio zho lo xtsiiṉ meṉguiib? ¿Zha ne rangaa, niacxe rieguiaḻd zho yquiin zho ncuaaṉe rac zaatne ran zho? ¿Zha ne na raṉgaa ma, niacxe rieguiaḻd zho yquiin zho ma zigne racladz zho?

8 Guiabde to togo bod guicse naa riab miṉe rne naa nu, goḻgaṉ gaṉle haxta lo ley ne psaṉ Moisés 9 no tib zaatne rnee: “Zeeṉe guṉcuṉ to xcon to dziin gzëëni ma mzion zhobxtil gacmbew, code to guiex ro ma, goḻsaan gow ma miṉe ygaa ro ma.” Goḻwi gaṉle zha rnee Dios, nana pe naṉ to ngonse rquia zdoo me. 10 Lëda goṉ, grëse ne rquia zdoo me ne. Ga rlu me gaṉle, zha ne ruṉ xtsiiṉ me, ible rieguiaḻ zho ycaa zho miṉe non xtsiiṉ zho. Zig nacaque guieḻgon, zigtaa zha ne rana, zigtagaa zha ne ruṉmbe grë guieḻnzaac co, ible rieguiaḻ zho yquiin zhow. 11 Teḻ no, rrieequia nazho tib gon i bdziuuṉ no biadseed no to Xtiidz Dios, ¿niacxe rioguiaḻd no dzigo gneedz to ncuaaṉe yquiin no?

12 Blalaa zha ne nale griiṉ riaadted lo to i, rnabey zho to rdeed to ncuaaṉe rquiin zho, ¿pe leḻ no dzigo rioguiaḻd gnaba lo to? Mazdraa goṉ rioguiaḻ no gnab now, per haxta lo nadze gard dziuuṉ no miṉ co, notaa naṉ zha rdziniaa no ncuaaṉe rdioow no; zeeṉa guiaaṉd zdoo to, lozh ga laa to csaan miṉe nac Xtiidz Dios. 13 Led naṉle to gaṉle, grë zha ne ruṉ dziin leṉ xyadoo Dios, psaṉ me diidz grë ncuaaṉe nac gon, ga xeṉ zho pe yquiin zho, zig nac zha ne ruṉ dziin zaatne nac lo pcoog, lo ncuaaṉe rielogon miech ga, ga rdioob ncuaaṉe row zho. 14 Ni scaquegaa psaṉ Jesús diidz, zha ne cseed miech Xtiidz me, ib none lo dziin co gdziniaa zho pe yquiin zho. 15 Per teḻ naa goṉ, wlaltaa peet gard gnab naa lo miech.

Laa naa rzet miṉ rii lo to, per guiabde to togo ruṉ naaw parne csilo to pe gneedz to lo naa. Ib zanaḻd naa miṉ co, sac rley naa znu quiayazhd naa quiayuṉ naa xtsiiṉ Jesús, mazd maase guetgbin naa, lëdle ctiche zho guieḻbley rii lo naa. 16 Niicle ne znu quiayazhd naa quiayuṉ naa dziin rii, per ni lalnu racniatsd naa, sacne ible laa Dios bzo naa par gne naa Xtiidz me lo miech; ni, ¡probsaxe naa teḻne gned naaw! 17 Noyuṉd naaw par dieṉ pe premio ygaa naa, sac zig rne naa ga Dios bzo naa, me rnabey naa quiayuṉ naaw, masaque nacse naa zig tib nguṉdziin. 18 Par naa, lëële premio nu nac guieḻbley rii ne znu liga quiaseed naa miech Xtiidz Dios, rnabd naa gneedzpaa zho ncuaaṉe yquiin naa niicle ne raguiaḻ naa gnab naaw.

19 Stiba mazdragaa wena, znu choot noneedzd ncuaaṉe yquiin naa, sac sca grieelod cho gnabey naa; per niicle ne nagoṉ choot rnabeyd naa, zhaal naa rac naa zig tib nguṉdziin lo grëse miech, parne gdeeda diidz tso guic zho sëëb zho xnëz Jesús. 20 Gacxe waa zeeṉe no naa lo grë zha Israel, rac naa zigne rac zho, zeeṉa tso guic zho gliladz zho cho nac Jesús. Zeeṉe nogaa naa lo grë zha ne zienaḻ xley zha Israel, niicle ne rnalodraa naa ley, per ruṉ naa grë ley ne zienaḻ zho, zeeṉa sca grieelo yquiabladz zho sëëb zho xnëz Jesús. 21 Scaquegaa zeeṉe no naa lo grë zha ne ruṉbeyd ley co, rioxco naa rac naa zig tib zha ne ruṉbeyda; per guiabd ne togo haxta grë ncuaaṉe rleyniedraa Dios ruṉ naa. Laa naa ruṉ miṉ co, zeeṉa ye zho sëëb xnëz Jesús. 22 Grë zha ne pense quiayacnaṉ zha nac Xtiidz Dios, zeeṉe no naa lo zho, ruṉd naa gne naa grë ncuaaṉe gard guieṉ zho zha nac, ruṉd naa csaṉwin naa zho, sac miṉe rioxco naa lozh gliladz zho cho nac Dios. Tib tib miech, rguib naa rac naa zigne rac zho, parne grieelo gzodiidz naa lo zho cho nac Jesús, zeeṉa gacnaṉ zho zha sëëb zho xnëz Dios. 23 Laa naa ruṉ miṉ co, parne gdeeda diidz gnee naa Xtiidz Dios grëse lo miech, ni scagaa, gley naa gaṉ naa ye zho ygaa lo guieḻndzon ne zhobnee lo Xtiidz Dios.

24 Naṉle to gaṉle zha rzac zha ne rie tib lo corr, nzian zho nac zha ne rie per tibaque zha ne ruṉ gan, zha co rcaa tib premio. Goḻguṉ cuent nasca tib lo corr i no to, grëse to goḻtsoxco xooṉ to zeeṉa grëse to ygaa tib premio. 25 Grë zha ne sca rio tib lo wguit, par grieelo guṉ zho gan rioxco zho raṉ zho xcuerp zho, ruṉd zho ncuaaṉe csiaab xfuers zho. Nroob cuidad ne rap zho zho par guṉ zho gan tib coron guizh nguia ne znuse rgooḻ. Scase nac premio ne rgaa zho, saṉgue ne goṉ, laa ne noxco ygaa ne tib premio ne gdziṉd dze nitlo. 26 Gacxe waa, teḻ naa tibaque noxco naa dieṉ zha xooṉraa naa. Naṉpaa naa pa gdziṉ naa, nacd naa zig zha ne rieṉd dieṉ pa gdziṉ, zha ne lega rquiaagaa puñet, rdeete zhow zaatne no ygaaw. 27 Ni lalnu rdete naa diidz gac miṉe racladztaa xcuerp naa, tibaque rnabey naaw parne guieṉa ncuaaṉe nonguieḻ miṉ co none guṉa, led guṉda ncuaaṉe racladztaaw. Laa naa ruṉ miṉ co zeeṉa guṉ naa gan, sac goṉ, guieḻtodox ga grieequia naa znu no naa none naa lo miech zha guṉ zho, ni teḻ lozh ga naapaze biaaṉ beṉd naa gan.

<- 1 CORINTIOS 81 CORINTIOS 10 ->