1 Chenu ulaxu uni Jesuse scua lubee bene, che uninu lubee beneꞌnu:
2 ―Liꞌihua nediyaꞌhua nú xiucutsia bichia rriꞌi nú aca eliñi baxcu, nu liꞌá Bene enu uxeꞌla Diose deteꞌ cuenda bene liꞌá lubee bene para nú quieꞌe beei liꞌá lu cruse.
3 Chequie bee uleꞌya enu rnibiyaꞌ lubeelá bee uleꞌya, cuna bee ulaxcuela enu reca ley nu cuna bee usticiaꞌ bee bene Israel, uyetesaꞌ beei ruꞌu eleꞌya niꞌi uleꞌya Caifás enu rnibiyaꞌ lubeelá bee uleꞌya. 4 Nu zeꞌe ubedichiaꞌ beei nú xa modo zequienu beei Jesuse para nú naꞌtse beei liꞌinu nú uti beei liꞌinu. 5 Pero unibeei lusaꞌbeei:
―La riaꞌahua scua diqui nú reca eliñi para nú la tsu reche bee bene.
Tucu unaꞌa uduꞌ perfume equie Jesuse
(Mr. 14:3-9; Jn. 12:1-8)
6 Chenu nzu Jesuse eyeche Betania, niꞌ Simón enu riꞌchia bene leproso, 7 che uriña tucu unaꞌa lunu nu nuyaꞌnchu tucu frasco perfume nú chiquiꞌ huaxi seca, nu uduꞌnchue equienu chenu nzucunu lu mexa.
―¿Xinu utiꞌchianchu perfume cuaꞌ scua? 9 Alaꞌ aꞌla aiqui perfumecuaꞌ para nú riꞌinchu elietsa lubee bene enu seca elitsi.
10 Nu chenu ubeneꞌ Jesuse nú uni beella, che uninu:
―¿Xinu rlehua lu unaꞌa quieꞌ? Nu lunú uriꞌinchu lua neca nzeꞌcae. 11 Xne bee bene elitsí siempre nucuaꞌa letahua, pero liꞌá la tsua siempre letahua. 12 Nu lunú uduꞌ unaꞌa quieꞌ perfume equiea, neca nucuaꞌ nú nzucheꞌla cuerpoa chenu achiꞌa. 13 Liꞌá nia luhua nu catse lu iliulabe elu ixiuleꞌe bee bene bedichiaꞌ nzeꞌcaꞌ Diose, leꞌca nibee bene nú uriꞌinu unaꞌa quieꞌ liꞌá, para nú elluꞌcu arquiꞌ bee bene liꞌinchu.
Udeteꞌ cuenda Judas Jesuse
(Mr. 14:10-11; Lc. 22:3-6)
14 Che tucu lu chiꞌchiucu bee beneꞌnu enu lee Judas Iscariote, uya lubee uleꞌya enu rnibiyaꞌ lubeela bee uleꞌya, 15 nu uni Judas lubeella:
―¿Calu liquiꞌhua para nú dete cuendaa Jesuse luhua che?
Che udeteꞌbeella alallichiꞌi melu plata yai. 16 Nu desde bichia zeꞌe ucuaꞌna Judas xneca modo deteꞌ cuendai Jesuse lubee uleꞌya.
17 Bichia xee eliñi baxcu chenu racu bee bene Israel pa nú la chuꞌu levadura equie, che uyabica bee beneꞌ Jesuse lunu, nu unibeella lunu:
―¿Cá niarquiꞌlu nú nzerecheꞌru nú daꞌcuxeꞌahua reché baxcu?
18 Chequie uninu lubeella:
―Uquiahua Jerusalén, nzucu tucu bene enu nihua lu: “Singuie rni Maestro: Nzeꞌta riñala horaꞌnu, nu niarquiꞌnu nú acuxenunu bee beneꞌnu exee baxcu niꞌlu.”
19 Che uriꞌi bee beneꞌnu tucu nú unibiyaꞌnu nú riꞌi beella, nu urecheꞌ beella nú acuxee beella reché baxcu.
20 Chenu uyuꞌu rulaꞌ, uzucu Jesuse lu mexa cuna chiꞌchiucu bee beneꞌnu, 21 nu diquila nú racuxee beella, uninu lubeella:
―Nia luhua nú tucuhua deteꞌ cuenda liꞌá para nú atia.
22 Che chiquiꞌ nehuana utsu arquiꞌbeella nu uquixie unedichiaꞌ tucua tucua beella lunu, nu unibeella lunu:
―Detá, ¿liꞌá nzeꞌe la?
23 Nu ucuaqui Jesuse lubeella:
―Enu seꞌe pa leꞌca liñi pliato elu seꞌa pa nzeꞌe neca enu deteꞌ cuenda liꞌá lubee bene enu uti liꞌá. 24 Neli nú liꞌá Bene enu uxeꞌla Diose, rquiꞌña nú zecaa tucu nú rni lu ichiꞌ Stichiaꞌ Diose; pero ¡cueꞌ bene enu deteꞌ cuenda liꞌá! Máse neca nzeꞌca lu cuendaꞌ bene zeꞌe nú né alaxulla.
25 Chequie Judas enu deteꞌ cuenda liꞌinu, uni lunu:
―Maestro, ¿liꞌá nzeꞌe la?
Che uni Jesuse lui:
―Ahuaꞌ, liꞌilu nzeꞌe.
26 Diquila nú racu beella, unaꞌtse Jesuse tucu pa nu udeteꞌnu cheꞌtsa lu Diose, nu chu uleꞌenu pa zeꞌe udeteꞌnu ya beella, nu uninu lubeella:
―Udacuhua pa quieꞌ, ninguieꞌ neca cuerpoa.
27 Che chu unaꞌtsenu tucu copa biñu, nu udeteꞌnu cheꞌtsa lu Diose nu chu udeteꞌnu copa cuaꞌ ya beella, nu uninu lubeella:
―Uhueꞌ yehua biñu quieꞌ, 28 xne neca nucuaꞌ renea nú riꞌchia chenu atia para nú tsilaꞌa huaxi bee bene iliulabe, xne equie cuendaꞌ nú atia yaꞌla tucu inziu cuqui nú riꞌi Diose perdona stula bee bene. 29 Pero nia luhua nú la huaꞌa biñu nú necacheꞌe uva niꞌ stucu bese, hasta bichia nú huaꞌanuahua biñu cuqui liñibe elurnibiyaꞌ Diose.
Udixiuleꞌe Jesuse nú ni Pedro nú la chululla liꞌinu
(Mr. 14:26-31; Lc. 22:31-34; Jn. 13:36-38)
30 Chenu ulaxu ungula beella canto lu Diose, che chu nzuebeella dañi nú lee Olivos. 31 Che uni Jesuse lubeella:
―Yehua tsanaꞌ arquiꞌhua liꞌá rulaꞌ quieꞌ, tucu nú rni lu ichiꞌ Stichiaꞌ Diose elu rni: “Utia bene enu rriucu bee sanchi, nu riꞌchialetse beeií.” 32 Pero chenu huañi zecaa, rlutilaa nzaꞌa Galilea, cheelá riñahua zeꞌe.
33 Chequie uni Pedro lu Jesuse:
―Añinzuca nú tsanaꞌ arquiꞌ yebeella liꞌilu. Pero liꞌá la tsana arquia liꞌilu.
34 Che uni Jesuse lu Pedro:
―Nia lulu nú nee rulaꞌ quieꞌ ante nú bixia tiula, unilalu chuna bese núla chululu liꞌá.
35 Pero uni Pedro lunu:
―Mase nú atia cuna liꞌilu, la cachia nú nuꞌlua liꞌilu.
Nu leꞌca scua uni ye beelá bee beneꞌnu lunu.
Unacuꞌ Jesuse lu Diose tucu luhuare elu lee Getsemaní
(Mr. 14:32-42; Lc. 22:39-46)
36 Che uriña Jesuse cuna bee beneꞌnu tucu luhuare nú lee Getsemaní, nu uninu lubeella:
―Ucuaꞌahua caꞌa, diquila nú nzenacua lu Diose inchiuꞌ.
37 Che chu nzenunu Pedro cuna rucu llianaꞌ Zebedeo, nu uquixie nú chiquiꞌ nehuana nzu arquiꞌnu hasta nú lixiuaꞌ nzu arquiꞌnu, 38 nu uninu lubeella:
―Chiquiꞌ nehuana nzu arquia hasta nú seꞌca nú atia, yaꞌnascaꞌhua caꞌa, nu ucuaꞌa naahua cuna liꞌá.
39 Che chu nza Jesuse lleꞌna enza lu zeꞌelá, nu utsu lliquinu hasta nú utiꞌnu tequienu lu yuu, nu unacuꞌnu lu Diose nú uninu:
―Paa, tunu nuꞌ modo utsilaꞌa liꞌá lunú nehuana enta zecaa, pero la acatsia tucu nú niarquia, acatsia tucu nú niarquiꞌlu.
40 Chenu ubenchilaꞌ zecanu elu nucuaꞌa bee beneꞌnu, ullunaꞌnu beella nú raꞌtse beella, nu uninu lu Pedro:
―¿Xieꞌ lá riquiꞌhua acuaꞌanahua masia tucu hora cuna liꞌá la? 41 Ucuaꞌa nahua nu unaꞌcuhua lu Diose para nú la riꞌi bezeꞌlu ana luhua. Xne liꞌisihua chiquiꞌ nuꞌ ana arquiꞌhua nú riꞌihua tucu nú neca nzeꞌca, pero la riquiꞌ cuerpoꞌhua.
42 Bese rrucu nú uya naꞌcunu lu Diose uninu:
―Paa, tunu leca modo nu la zeca lunú nehuana nzu nú zecaa, acatsia tucu nú niarquiꞌlu che.
43 Chenu ubenchilaꞌ zecanu elu nucuaꞌa beella, ulañiꞌnu nú raꞌtseaꞌla beella stucu bese xne uriꞌi calaꞌ ana lubeella. 44 Nu utsaꞌnanu beella zeꞌe nu uya naꞌcuꞌnu lu Diose bese rriuna cuna bee bedichiaꞌ nú unilanu. 45 Chenu ubenchilaꞌnu elu nucuaꞌa beella, uninu lubeella:
―¿Xieꞌ raꞌtsescaꞌhua nu sulachiscaꞌhua la? Nu liꞌá Bene enu uxeꞌla Diose, uriñala hora nú deteꞌ cuenda bene liꞌá lubee bene enu necha rriꞌi. 46 Uzetehua ne chaꞌahua nee, xne axula nzeꞌta enu deteꞌ cuenda liꞌá.
Unaꞌtse bee bene Jesuse
(Mr. 14:43-50; Lc. 22:47-53; Jn. 18:2-11)
47 Rdichiaꞌnuscaꞌ Jesuse bee beneꞌnu chenu uriña Judas, enu neca tucu lu chiꞌchiucu bee beneꞌnu, uriñayui huaxi bee bene enu nuyaꞌ espada cuna acarute lunu. Nu unaꞌtse beei Jesuse xne unibiyaꞌla bee uleꞌya enu rnibiyaꞌ lubeela bee uleꞌya cuna bee usticia Israel nú acane scua. 48 Nu Judas enu udeteꞌ cuenda Jesuse unilai lubee bene zeꞌe xa riꞌi chenu deteꞌ cuendai liꞌinu, nu uni lubeella:
―Nee enu acua bichiuꞌ xeca, nzeꞌella nu nzeꞌe naꞌtsehua.
Che chu unaꞌtse bee bene zeꞌe Jesuse para nú uyaꞌ beei liꞌinu.
51 Che tucu bee bene enu nzunu Jesuse zeꞌe uhua espadaꞌ nu uchiecuꞌlla tucu diaca mosoꞌ uleꞌya enu rnibiyaꞌ lubee uleꞌya. 52 Chequie uni Jesuse lulla:
―Uduꞌcheꞌ espadaꞌlu xne ye bee bene enu rriꞌi xu cuna espada, leꞌca cuna espada atilla. 53 ¿Xieꞌ la riꞌilu beyaꞌ nú nuꞌ modo nacua lu Paa liñibe, nu chu xeꞌlanu huaxi mili bee ángeleꞌnu enu riꞌi elietsa lua la? 54 Pero tunu riꞌá scua, ¿xneca modo yalu tucu nú nequie lu ichiꞌ Stichiaꞌ Diose elu rni nú scua riala zecaa?
55 Che chu uninu lubee bene zeꞌe:
―¿Xinu nzeꞌtahua cuna espada nu cuna acarute para nú uyaꞌhua liꞌá xi neca tucu huanaꞌ? Ye yeꞌe nzua letahua uzeteahua Stichiaꞌ Diose liñi indu llene Jerusalén, nu né naꞌtsehua liꞌá. 56 Pero ye bee nucuaꞌ unga para nú yalu tucu nú nequie lu ichiꞌ Stichiaꞌ Diose nú uquieꞌe bee profeta.
Chequie ye bee beneꞌnu utsanaꞌ arquiꞌbeella liꞌinu nu uyecaxuꞌu beella nzuebeella.
57 Che bee bene enu unaꞌtse Jesuse unguyaꞌ beei liꞌinu niꞌi Caifás, uleꞌya enu rnibiyaꞌ luye bee uleꞌya, zeꞌe neyeteꞌsaꞌ bee ulaxcuela enu reca ley cuna bee usticiaꞌ bee bene Israel. 58 Nu istu istu nzequie Pedro Jesuse hasta ruꞌu niꞌi uleꞌya zeꞌe, nu chenu uriña Pedro ruꞌu niꞌi uleꞌya zeꞌe uzuculla leta bee bene enu rriucu zeꞌe para nú lañiꞌlla xi riꞌinu bee benecuaꞌ Jesuse.
59 Chequie bee uleꞌya enu rnibiyaꞌ lubee uleꞌya, nu cuna ye bee usticia ucuaꞌna beella xa modo taꞌ beella eluquichiaꞌ Jesuse para nú atinu. 60 Pero lá llelaꞌ beella xi eluquichiaꞌ ataꞌ beella liꞌinu añinzuca nú huaxi bee bene uni nú la neli contra liꞌinu, che luzeꞌelá uriña xiucu bene enu leꞌca uni nú la neli contra liꞌinu, 61 nu unibeei:
―Benequieꞌ uni: “Liꞌá aca chila induꞌ Diose nu recheꞌ zecane lu chunatsia bichia.”
62 Chequie utsuli uleꞌya enu rnibiyaꞌ lu ye bee uleꞌya nu unilla lu Jesuse:
―¿Xiquie nú lecalí xi cuaquilu? ¿Xi nucuaꞌ rnibeei lu cuendaꞌlu?
63 Pero lecalí xi ucuaqui Jesuse. Che uni uleꞌya zeꞌe lunu:
―Equie cuendaꞌ Diose enu nehuañi, uniꞌi nú neli neca lua tunu liꞌilu necalu Cristo lliꞌñi Diose.
64 Che ucuaqui Jesuse nú uninu:
―Liꞌá nzeꞌe. Nu leꞌca nia luhua nú lañiꞌhua liꞌá Bene enu uxeꞌla Diose nú nzucuaꞌa cueꞌtsenu chúbe, liꞌinu enu rluꞌcu ye poder, nu leꞌca lañiꞌhua nú nzela liñi xcabe enza liñibe.
65 Chenu ubeneꞌ uleꞌya zeꞌe nucuaꞌ che utsalla xuculla, nu unilla:
―Lu Diose rni nucuaꞌ bedichiaꞌ nú necha neca, ¿xinu laꞌnaꞌláꞌahua testigo? Liꞌihua ubeneꞌláꞌhua bee bedichiaꞌ nú necha neca uni nucuaꞌ lu Diose. 66 ¿Xa nihua nee?
Che ucuaqui bee bene zeꞌe nú unibeei:
―Riala nú ati nucuaꞌ.
67 Che utsuxene beei lunu nu udiñi beei liꞌinu, nu nuꞌ beei enu udichiue lunu. 68 Nu unibeei lunu:
―Tunu liꞌilu necalu Cristo, ¡uniꞌ ti udiñi liꞌilu!
Uni Pedro nú la chululla Jesuse
(Mc. 14:66-72; Lc. 22:56-62; Jn. 18:15-18, 25-27)
69 Diquila nú nzucu Pedro ruꞌu eliꞌyaꞌ niꞌi uleꞌya zeꞌe, che uyabica tucu criadaꞌ uleꞌya zeꞌe lu Pedro, nu uninchu lulla:
―Seꞌca nú leꞌca nuulu enzenuulu Jesuse enu neca bene lu iliu Galilea.
70 Pero utsacuꞌ arquiꞌ Pedro nú nuꞌlulla Jesuse lubee bene zeꞌe, nu unilla:
―La riꞌá beya xi rnilu.
71 Che chu nza Pedro enza ruꞌu puerta eliꞌyaꞌ zeꞌe, nu zeꞌe ulañiꞌ stucu criada liꞌilla nu uninchu lubee bene enu nucuaꞌa zeꞌe:
―Leꞌca nuu benecuaꞌ enzenu Jesuse bene eyeche Nazaret.
72 Chequie utsacuꞌ arquiꞌ zeca Pedro stucu bese nú la chululla Jesuse, nu uquieꞌella Diose nú unilla:
―La chulua benecuaꞌ.
73 Nu luzeꞌetsia bee bene enu nucuaꞌa zeꞌe uyabica beei lu Pedro, nu unibeei lu Pedro:
―Ache nzeꞌca rlubeꞌ nú necalu tucu beneꞌ bene cuaꞌ, xne rdichiaꞌlu tucu nú rdichiaꞌ beei.
74 Pero utsutaꞌ Pedro nú unilla:
―Deteꞌ Diose castiya liꞌá tunu la nia nú neli neca la chulua bene cuaꞌ.
Nu che hora zeꞌe ubixia tucu tiula.
75 Che ulluꞌcuꞌ arquiꞌ Pedro lunú uni Jesuse lulla: “Ante nú bixia tiula unilálu chuna bese nú la chululu liꞌá.” Che chu uchiuꞌu Pedro ruꞌu eliꞌyaꞌ zeꞌe nu chiquiꞌ ungunaꞌlla nú nehuana nzu arquiꞌlla.
